Esiteri 5 - Buki Tabu Lowaenei 1919

‘UPWA 5.

¹ Ga asiata ‘etonina gete ‘i apwesa, Esiteri ‘ana ‘oama esaesa i ‘e‘oama‘ena, ta ‘i tooro king ‘ina anua gamwanaia ‘enaia, king ‘ina anua serabenaia: ta king anua esaesa ‘enaia ‘ina ‘ebemi esaesa ‘ena ‘i miatoa, anua ‘ana ‘awa serabenaia.

² Ta nadigega, ni‘atu king Esiteri kuini i ‘itena anuaia ‘i tooro, ga matanaia ‘ana ‘ita ‘i nuanuana: ta king guna gola nimanaia ‘i miamiana ‘enega ‘i enimasusu Esiteri ‘enaia. Ga Esiteri ‘i laga serabenaia, ta guna garuna ‘i gitoona.

³ Ga king ‘i eonena, Kuini Esiteri, to‘ase nuanuaio? ta to‘ase ‘imu ‘awanoi? ia da ‘ebwaemu ga ‘ebeloina ‘ana ‘upwaruena.

⁴ Ta Esiteri ‘i gwae, ‘Abo ‘ana ‘ita bobo‘ana king ‘ena, tauna king ta Amana batua si da mai ‘e‘ai ni‘atu ia sa‘una manuna.

⁵ Ga king ‘i gwae, Wa da ona be Amana ‘i da lomaninima, be ‘enega si da guinua Esiteri ‘ina gwae na‘ieana. Ga king ta Amana si mai ‘e‘ai nina Esiteri ni‘atu ‘i sa‘una.

⁶ Ta oine ‘ana ‘e‘ai ‘ena king Esiteri ‘i eonena, To‘ase ‘imu ‘awanoi? ta ia da ‘ebwaemu: ta to‘ase ‘imu sidasida? ‘abo ‘ebeloina ‘ana ‘upwaruena ‘enaia ia da ‘ebwaemu.

⁷ Ga Esiteri ‘i ona limana, ta ‘i gwae, ‘Igu ‘awanoi ta ‘igu sidasida getei;

⁸ ‘Abo king matanaia oboboma ia lobena, ta ‘abo king ‘i nuanuana ‘aene ‘igu sida ‘i da ‘ebwaegu, ta ‘igu ‘awanoi ‘i da guinua, king ta Amana ‘e‘ai ia da sa‘u manudi ‘ena si da mai, ta gibua‘i ia da guinua king ‘ina ona na‘ieana.

⁹ Ga Amana asiata gote ‘i apwesa ta ‘i guausoara ta ‘atenega i ‘uiawana: ta ni‘atu Amana Modekai i ‘itena king ‘ina ‘awa ‘enaia, ta nigea ‘i da tooro nai matanaia ‘i da loniu, ga gamwasoara ‘i loemae Modekai manuna.

¹⁰ Ta Amana i ‘etobodena tauna, ta anuaia ‘i tauia; ta ‘i etune ta gosenao ta mwanena Seresa i ‘au‘ewedima.

¹¹ Ta Amana ‘ina gwegwe ‘adi esaesa ‘i sawedi ta, natunao ‘adi iau ta, iage iauiauna ‘ediega king ‘i gitu‘eiena ta, bubuna nina ‘enega ‘i gitu‘eiena, inapwanao ta to‐guinuao ‘edia ta.

¹² Wate Amana ‘i gwae, Tamo, Esiteri ‘ida kuini nigea ‘i da tagwara be mari tai ‘i da rugu king ma‘ieana ‘e‘ai nina kuini ‘i sa‘u ‘enaia tebweugu tugai; ta ‘i eonegu gibua‘i wate king ma‘ieagu.

¹³ Ta iage maibo‘ana gete nigea ‘e bweu ‘ana bobo‘ana ‘eguia, tuta iauna Modekai goma Iuda ia ‘itena king ‘ina ‘awa ‘ena ‘i miatoa ta ‘enega.

¹⁴ Ga mwanena Seresa ta gosenao iauiaudi ‘ena si gwae, Kaiwe ‘e bweu ‘ana kesorana kiubita ‘e pipiti si da guinuei, ta gonagonaia king ‘ena ‘u da ona be Modekai ‘ena si da loesane: ga ‘oio ma‘imu ‘uiawana king ma‘ieana wa da rugu ‘e‘ai ‘enaia. Ta iage nina Amana ‘i nuanuana; ta ‘i loina ga kaiwe si guinuena.