Esiteri 4 - Buki Tabu Lowaenei 1919

‘UPWA 4.

¹ Ta ni‘atu iage iauiauna si guinua Modekai ‘i sinapuna, ga Modekai ‘ana ‘oama ‘i gisabudi, ta ‘oama kwausa karikau ma‘ieana i ‘otena, ta ‘i apwesa ‘asa gamwagamwanaia, ta i ‘arabwau dedo toitoila darere ‘enega:

² ta king ‘ina ‘awa matanaia ‘i apwesa: nigea ‘e bweu king ‘ina ‘awa ‘ena ‘i da rugu ‘abo ma‘ana ‘oama kwausa.

³ Ta esena ‘e bweuna ‘e bweuna ‘enaia, ‘ena king ‘ina ona ta ‘ina loina ‘i apwesa, ‘ena me Iuda si ‘ewa‘ewabamu sinabwana, si ‘edidigura be, si dedoi be, si bwau‐bwau be; ta iauiaudi ‘idi ‘ebe‘eno ‘oama kwausa ta karikau.

⁴ Ta Esiteri ‘ina gomagweineao ta ‘ina eunakao si mai ta ‘ena si simana; ta kuini ‘atena ‘i uiauia sinabwana: ta ‘oama si etunena be Modekai ‘i da e‘oama, ta ‘ana ‘oama kwausa si da alolona: ta nigea i ‘ewena.

⁵ Ga Esiteri ‘i bwau Ataka manuna, king ‘ina eunaka ‘e bweuna, tauna ‘i aseiena ‘aene ‘i da lemena, ta ‘i eonena ‘aene ‘i da tauia Modekai ‘ena, be ‘i da nono to iage gete, ta to‘ase manuna iage gete.

⁶ Ga Ataka ‘i apwesa Modekai ‘ena ‘asa ‘atamanina bababana ‘enaia, tauna king ‘ina ‘awa matanaia.

⁷ Ta Modekai iage iauiauna ‘ena ‘i apwesa ‘ena ‘i simana, ta mani ‘ana iau ‘ai‘aila Amana ‘i ona‘upa‘upa‘ena be king ‘ina gwegwe ‘ana ‘ebesa‘u ‘ena ‘i da ‘ebwaeae me Iuda manudi, be si da loemwawasidi.

⁸ Wate loina nina ‘ana ‘etoladi si ‘ebwaea dadane Susa ‘ena be si da loemwawasidi i ‘ebwaena, be Esiteri ‘ena ‘i da e‘ita, ta ‘ena ‘i da simana; ta ‘aene ‘i da ‘emataruena be king ‘ena Esiteri ‘i da rugu, be ‘ena ‘i da sida, ta matanaia ‘i da ‘awanoi, ‘ina tomota manudi.

⁹ Ta Ataka ‘i mai ta Modekai ‘ina ona Esiteri ‘ena i ‘esimanedi.

¹⁰ Ga Esiteri Ataka ‘ena ‘i gwae, be ‘are i ‘ebwaena Modekai ‘enaia, ‘i gwae:

¹¹ King ‘ina toguinua iauiaudi, ta king ‘ina esena tomotanidi si mwaratonina, ‘aene tauna, nai tai nai waine, ‘i da mai king ‘ena anua gamwagamwana ‘enaia, ta nigea ‘i bwauiena, loina ‘e bweuna manuna, ‘aene si da loemwawasina, ‘abo king nigea guna gola ‘enega ‘i enimasusu, be ‘i da bobo‘ana: ta ‘abo‘agu nigea si bwauiegu king ‘enaia ta asiata ‘e tati getedi.

¹² Ta Esiteri ‘ina ona si ‘e simanena Modekai ‘enaia.

¹³ Ga Modekai ‘i eonedi ‘aene Esiteri ‘ena si da ona limana, Gea‘abo ‘u nuena tauio ‘aene king ‘ina anua ‘ena ‘u da bobo‘ana, ta me Iuda iauiaudi nigea.

¹⁴ ‘Abo tuta gete ‘u enono ‘ai‘aila ta ‘enega, ga eiawai‘ata ta ‘etoseana si da apwesama me Iuda ‘edia mari esenega, ta ‘oio ta tamaio ‘ina susu wa da saoora: ta iaita ‘i sinapuna nai ‘oio ‘u mai ‘ebeloina ‘enaia tuta nadigega gete manuna?

¹⁵ Ga Esiteri ‘i eonedi ‘aene Modekai ‘ena si da onalimana,

¹⁶ ‘U ta tauia, ta me Iuda iauiaudi Susa ‘ena si miami ‘u da agogodi, ta manugu wa da edidigura, ta asiata ‘etoi gea‘abo wa da ‘e‘ai nai wa da numanuma, boiboi nai asiata: ‘abo‘agu wate ta ‘igu gomagweineao ‘a da ‘edidigura nadigega; ta nadigega king ‘enaia ia da rugu, nate nigea loina ‘atua: ta ‘abo ia mwawasaia, ia mwawasa.

¹⁷ Ga Modekai ‘i tauia, ta nadigega Esiteri ‘ina ona iauna ‘enaia nadigega ‘i guinuena.