Esiteri 3 - Buki Tabu Lowaenei 1919

‘UPWA 3.

¹ Iage getedi si gumwara ga king Aasaberosa Amana Amedata goma Agagi natuna ‘i gitu‘eiena, ta ‘i sa‘u tu‘eiena, ta ‘ina ‘ebemi ‘i sa‘u tu‘e wawasae ‘ina ‘inapwanao iauiaudi ma‘enao ‘edia.

² Ta king ‘ina to‐guinua iauiaudi, taudi king ‘ina ‘awa ‘ena si miami, si bwagobwago, ta Amana ‘ena si ‘ama‘amaiaba; king ‘i loina manuna nadigega ta ‘enega. Ta Modekai nigea ‘i da bwago, ta nigea i ‘amaiabena.

³ Ga king ‘ina to‐guinuao, taudi king ‘ina ‘awa ‘ena si miami, Modekai ‘ena si gwae, To‘ase manuna king ‘ina loina ‘u li‘oena?

⁴ Ta gete ‘i apwesa, ni‘atu asiata ‘e bweuna ‘e bweuna ‘ena si ona, ta nigea ‘i da nonodi, ga Amana ‘ena si simana, be ‘enega si da ‘ita nai Modekai ‘ina iage ‘i da ewaiwai: tauna ‘edia ‘i simana ‘aene goma Iuda tauna ta ‘enega.

⁵ Ta ni‘atu Amana i ‘itena ‘aene Modekai nigea ‘i da bwagobwago, nai ‘i da ‘amaiabena, ga Amana ‘i gamwasoara sinabwana.

⁶ Ta ‘i nuena ‘aene ‘ebesinara ‘abo Modekai tebweuna ‘i da unu; ni‘atu Modekai ‘ina tomota si e‘ita‘edi ‘ena ta ‘enega: ta ‘enega Amana i ‘ebesa be me Iuda iauiaudi ‘i da loemwawasidi taudi Aasaberosa ‘ina ‘ebeloina maibo‘ana ‘ena si miamiana, taudi Modekai ‘ina tomotaiao.

⁷ Nawarae ‘e bweuna, tauna nawarae Nisana, king Aasaberosa ‘ina iakwara e twelu nina, si ‘ula Pura, nate, ‘ebe‘ula‘esinua, Amana matanaia asiata ga asiata, nawarae ga nawarae, ga nawarae ‘e twelu nina, tauna nawarae Adara.

⁸ Ta Amana king Aasaberosa ‘ena ‘i gwae, Tomota susu ‘e bweuna si lelewana dadana ta si mia dumaduma tomota gamwagamwanidia ‘imu ‘ebeloina ‘ina esena iauiaudi ‘edia; ta ‘idi loinao si dumaduma tomota iauiauna ‘idi loina ‘edia; wate king ‘ina loina nigea si ‘ita‘i‘isidi: ‘enega nigea sawesawenaia king ‘i da tagwaredi be si da miami.

⁹ ‘Abo king ‘i nuanuana, ta da ‘etoladi be si da saoora: ta ‘abo‘agu sileba taleni ‘e teni tausana taudi king ‘ina iage si ‘ita‘ita‘i‘isi nimadi ‘edia ia da sa‘u, be king ‘ina gwegwe ‘ana ‘ebesa‘u ‘ena si da me‘ena.

¹⁰ Ta king ‘ina nimapasapasa nimanega ‘i alolona, ta Amana Amedata goma Agagi natuna, me Iuda ‘adi tarauwara, ‘ena i ‘ebwaena.

¹¹ Ta king Amana ‘ena ‘i ona, Sileba nina ‘emuia ia ‘ebwaea, wate tomota, be to‘ase nai ‘i bobo‘ana ‘emuia ‘u da guinua ‘edia.

¹² Ga king ‘ina to‘etoladiao si bwauiedi nawarae ‘e bweuna ‘enega, asiata e tatini ‘enega, ta iage iauiauna Amana ‘i ona nadigega si ‘etoladidi king ‘ana to‐lemeiao ‘edia, esena iauiauna ‘idi gabanao ‘edia, tomota iauiauna ‘idi ‘inapwanao ‘edia; esena ‘e bweuna ‘e bweuna na‘ieana ‘ana ‘etoladi, ta mari tomota iauna nadigega ‘enadi; king Aasaberosa ‘ana esanega si ‘etoladina, ta king ‘ana nimapasapasa ‘enega si tuepa‘i.

¹³ Ta leta si etunedi to piliiareiare ‘ediega king ‘ina esena iauiauna ‘edia, be ‘enega me Iuda iauiaudi si da loesawaridi, si da unudi, si da loemwawasidi, tubuau ta tai sinabwadi, gogama gidaridi ta iine, asiata ‘e bweuna ‘enega, nawarae e twelu nina ‘ana asiata e tatini nina, tauna nawarae Adara, ta ‘idi gwegwe ‘ediega si da ‘oaedi.

¹⁴ Ta ‘etoladi ‘arena nina ‘aene esena iauiauna ‘edia si da ‘ebwaea loina manuna, tomota iauiauna ‘edia si da simana, be ‘enega asiata nina si da iamwaiamwa.

¹⁵ To piliiareiare nidi si tauia manini king ‘ina ona ‘enega, ta loina si simanena anua Susa ‘enaia: ta king be Amana si miatoa be si numa; ta ‘asa Susa nuadi ‘i owana.