Esiteri 2 - Buki Tabu Lowaenei 1919

‘UPWA 2.

¹ Iage gete si gumwara, ta ni‘atu king Aasaberosa ‘ina gamwasoarega nuana ‘i siwaroa, ga Pasiti ‘i nua‘i‘isina, ta ‘ina guinua nina, ta iage si loina manuna.

² Ga king ‘ina to‐guinuao matanaia si guiguinua si gwae, Gomagweine sinesinebwainidi si da ‘ebesedi king manuna:

³ ta king to‘ita‘i‘ita ‘i da esinuedi ‘ina ‘ebeloina ‘ina esena iauiaudi ‘edia, be ‘enega anua Susa ‘ena gomagweine sinesinebwainidi iauiaudi si da egogonedi, iine ‘idi anuaia, Egai king ‘ina eunaka ‘ana ‘ita‘i‘ita ‘enaia, tauna iine ‘adi to‐‘ita‘i‘ita; ta ‘idi iage ‘ebe‘esasena si da ‘ebwaedi:

⁴ ta gomagweine nina king ‘i da nuanuana tauna ‘i da kuini Pasiti ‘ana lopa‘eru. Ta iage nina king ‘i nuanuana; ta ‘i guinua nadigega.

⁵ Ta anua Susa ‘ena goma Iuda ‘e bweu ‘ena ‘i miami, ‘ana esana Modekai, tauna Iaira natuna, tauna Simei natuna, tauna Kisa natuna, Beniamina ‘ina susu;

⁶ Tauna Ierusalemega si ‘au‘ewena iiabwebwe ma‘edi, taudi si ‘au‘ewedi Iekonia Iuda ‘ina king ma‘enao, tauna Nebukadinesa Babulonia ‘ana king i ‘au‘ewena.

⁷ Ta Adasa i ‘amwamwena, tauna, Esiteri, tauna wana natuna mewainena: tauna nigea matamana ta nigea masinana, ta gomagweine nina sinesinebwaina ta ‘ana ‘ita bobo‘ana; ta ni‘atu tamana be sinana si kwaia, ga Modekai i ‘au‘ewena ‘aene tauna natuna.

⁸ Ta ‘enega gete ‘i apwesa, ni‘atu king ‘ina ona ta ‘ina loina si nonona, ta ni‘atu gomagweine iauna si egogonedi anua Susa ‘enaia, Egai ‘ana ‘ita‘ita‘i‘ita ‘enaia, ga Esiteri si ‘au‘ewena king ‘ina anuaia, Egai ‘ana ‘ita‘ita‘i‘ita ‘enaia, tauna iine ‘adi to‐‘ita‘i‘ita.

⁹ Ta gomagweine nina ‘i nuanuana, ta nuana ‘i bobo‘ana ‘enaia; ta manini ‘ana iage ‘ebe‘esasa i ‘ebwaena, ta ‘ana ‘egu‘eguia, ta gomagweine ‘e sebeni, taudi sawesawenaia si da ‘ebwaena, king ‘ina anuega: ta tauna ta ‘ina gomagweineao i ‘au‘ewedi iine ‘idi anua ‘ana sena bobo‘ana wawasae ‘enaia.

¹⁰ Esiteri ‘ina tomota ta ‘ina susu nigea ‘i emanini‘itadi: Modekai ‘i eonena ta ‘enega ‘aene gea‘abo ‘i da e manini‘itadi.

¹¹ Ta Modekai iine ‘idi anua matanaia ‘i lopilidadana asiata iauna, be ‘i da nono nai Esiteri mwa‘adega, ta to‘ase ‘ena ‘i da apwesa.

¹² Ta ni‘atu gomagweine ‘e bweuna ‘e bweuna ‘ina tuta ‘i da apwesa be king Aasaberosa ‘ena ‘i da rugu, ni‘atu si guinua ‘enaia iine ‘adi loina manuna, nawarae ‘e twelu, (nadigega tuga ‘idi asiata ‘ebe‘esasena si loegumwarina ta ‘enega, gete tuga, nawarae ‘e sikisi bunama mura ‘enega, ta nawarae ‘e sikisi maina dibidibidi ‘ediega, ta iine ‘idi ‘ebe‘esasa ‘idi iage ‘ediega,)

¹³ Ga gete nadigega gomagweine king ‘ena ‘i apwesa, to‘ase nai ‘i nuanuana si da ‘ebwaena be ma‘ieana iine ‘idi anuega ‘i da tauia king ‘ina anua ‘enaia.

¹⁴ Asuinuanuaia ‘i tauia, ta ‘i ulisi be i ‘ila iine ‘idi anua ‘e ruena, Saasagasa ‘ana ‘ita‘ita‘i‘ita ‘enaia, tauna king ‘ina eunaka, tauna to ai me wainedi i ‘ita‘ita‘i‘isidi: tauna nigea wate king ‘ena ‘i da rugudaidaita, ‘abo king nigea ‘i nuanuana, ta nigea ‘ana esana ‘i da bwauiena.

¹⁵ Ta Esiteri, tauna Modekai wana Abiaila natuna, tauna Modekai nina i ‘au‘ewena be ‘i da ‘awanatunena, ni‘atu ‘ana tuta be king ‘ena ‘i da rugu, ga nigea ‘e bweu iage ‘i nuanuana tauna tuga iage nina Egai king ‘ina eunaka, iine ‘adi to‐‘ita‘i‘ita, ‘i loina. Ta Esiteri iauiaudi si duneduneie matadia ‘ana ‘ita ‘i bobo‘ana.

¹⁶ Ga Esiteri si ‘au‘ewena king Aasaberosa ‘enaia ‘ina anua esaesa ‘enaia nawarae ‘e teni nina ‘enega, tauna nawarae Tebeta, king ‘ina loina iakwara ‘e sebeni nina ‘enega.

¹⁷ Ta king Esiteri ‘i obobomena sinabwa wawasae iine iauiaudi ‘edia, ta matanaia ‘ana ‘ita bobo‘ana wawasae gomagweine iauiaudi ‘edia; ta ‘enega peaula esaesa debanaia ‘i sa‘una, ta ‘i loina be ‘i e kuini Pasiti ‘ana lopa‘eru.

¹⁸ Ga king sagari sinabwana ‘i guinuena ‘ina ‘inapwanao iauiaudi ta ‘ina toguinuao ‘edia, tauna Esiteri ‘ina sagari; ta esena iauna ‘idi ‘ebeiawai‘ata ‘i sa‘una, ta ‘ebwaeadaita i ‘ebwaedi, na‘ieana king nimana ‘ana guinua.

¹⁹ Ta ni‘atu gomagweine si egogona tuta ‘e ruena, ga Modekai king ‘ina ‘awa ‘ena ‘i miatoa.

²⁰ Esiteri ‘ina tomota ta ‘ina susu nigea ‘i emanini‘itadi; na‘ieana Modekai ‘i nuasa‘uiena: Esiteri Modekai ‘ina ona ‘i guinuena ta ‘enega, nadigega tuta ‘enega i ‘amwamwena.

²¹ Asiata gotedi, ‘ena Modekai king ‘ina ‘awa ‘ena ‘i miatoa, ga king ‘ina eunaka ‘e rua, Bigatana ta Teresa, taudi ‘awa si ‘ita‘ita‘i‘isi, si gamwasoara, ta si ‘ebesa be king Asaberosa si da ununa.

²² Ta iage gete Modekai ‘i sinapuna, ta kuini Esiteri ‘ena ‘i simana; ta Esiteri Modekai ‘ana esanega king ‘ena ‘i simana.

²³ Ta ni‘atu iage nina manuna si bwa‘omatana, ta si loba ‘aene nadigega, ga si loesanaruedi kaiwe ‘enaia: ta si ‘etoladina buki etetera ‘ena king matanaia.