Esiteri 1 - Buki Tabu Lowaenei 1919

‘UPWA 1.

¹ Ta Aasaberosa ‘ana tuta ga gete ‘i apwesa, (tauna Aasaberosa nina tauna esena ‘e wan anaredi ta tweniti sebeni ‘ediega ‘i loina, Inidia ‘enega ga Aitiope ‘enaia:)

² Asiata gotedi, ‘ena king Aasaberosa ‘ina ‘ebeloina ‘ina ‘ebemi ‘ena ‘i miatoa, tauna anua Susa ‘ena ‘i miami,

³ ‘Ana iakwara loina ‘etonina, ga sagari ‘i guinuena ‘ina ‘inapwanao iauiaudi ta ‘ina toguinuao ‘edia: Peresia ta Media ‘idi waiwai, esena iauna ‘idi to‐nuganao ta ‘idi ‘inapwanao, matanaia si miami:

⁴ ‘ena ‘ina ‘ebemi esaesa ‘ina gwegwe ta ‘ina esaesa bobo‘ai‘ailina ‘ana ‘ebe‘amaiaba ‘i e‘ita ga asiata iauna, tamo asiata ‘e wan anaredi ta eti.

⁵ Ta ni‘atu asiata getedi si gumwara, ga king sagari ‘i guinuena tomota iauiaudi anua Susa ‘ena si miami ‘edia, me sinabwadi ta me gidaridi ruarua, asiata ‘e sebeni, king ‘ina ‘asa ‘ana bagura ‘ana anua ‘enaia;

⁶ ‘ana kaleko tarataraesanena ‘i mata gidarakwakwaiona, buraburana, ta karakarawina, marakwa kaleko menusululukwana ta iage bweabwearina ‘enega si losipwedi giimweiina sileba ta ‘ora gurewa ‘edia; ‘ebe‘eno gola ta sileba, ta sea gurewa bweabwearina be, buraburana be, raurauna be, gaigaina be.

⁷ Ta ‘idi ‘ebenuma si ‘ebwaedi keiga gola, (keiga dumadumadi ta dumadumadi,) ta oine esaesa iauna, na‘ieana king nimana ‘ana ‘ebwaea.

⁸ Ta si numa loina ‘atua; nigea ‘e bweu ‘i didigedi: nadigega tuga king ‘i loina ‘ina anua ‘ana to‐‘ita‘i‘itao ‘edia, be si da guinua tai ‘e bweuna ‘e bweuna ‘ina nuena nadigega.

⁹ Wate Pasiti kuini sagari ‘i guinue iine king Aasaberosa ‘ina anua esaesa ‘ena si miami ‘edia.

¹⁰ Ga asiata ‘e sebeni nina, ‘ena king ‘atena ‘i guausoara oineiega, ga Meumana be, Bisita be, Abona be, Bigita be, Abagata be, Seta be, Kakasa be, taudi gete eunaka ‘e sebeni king Aasaberosa matanaia si guinua, ‘edia ‘i loina,

¹¹ ‘Aene kuini Pasiti si da ‘au‘ewenama king matanaia ma‘ana peaula esaesa, be ‘enega tomota ta to‐esaesaiao ‘ana ‘ita bobo‘ana ‘i da e‘itadi; tauna sinebwaina ta ‘enega.

¹² Ta kuini Pasiti geanuana ‘i da mai king ‘ina loina eunaka ‘ediega: ta ‘enega king ‘i gamwasoara, ta ‘atena ‘i iaiiai.

¹³ Ga king ‘i ona to sinasinapu ‘edia, taudi tuta si mwaratoni, (nadigega tuga king ‘ina bubuna iauiaudi loina ta bwa‘omatana si sinapudi ‘edia;

¹⁴ Ta ‘ebemi serabenaia Kasena ‘i miami, ga Setara, Adamata, Tasisi, Meresa, Masena, ta Memukana, Perisia ta Media ‘idi ‘inapwanao e sebeni, taudi king maninina si ‘itena, ta ‘ebeloina ‘ena si mia nugana:)

¹⁵ To‘ase ta da guinua kuini Pasiti ‘enaia loina ‘atua, king Aasaberosa ‘ina ona eunaka ‘ediega nigea ‘i guinuena ta ‘enega?

¹⁶ Ta Memukana king matanaia ta ‘inapwanao matadia ‘i ona limana, Pasiti kuini nigea ‘i guinua geiogeioi king namo ‘enaia, ta wate ‘inapwanao iauiaudi ‘edia, ta tomota iauiaudi king Aasaberosa ‘ina esena iauiaudi ‘edia si miami ‘edia.

¹⁷ Kuini ‘ina guinua gete iine iauiaudi ‘edia ‘i da apwesa, be ‘enega mwanediao si da sinaridi matadia, ‘ena si da nono, ‘Aene king Aasaberosa ‘i loina be kuini Pasiti si da ‘au‘ewenama matanaia, ga nigea ‘i mema.

¹⁸ Ta batua Perisia ta Media ‘idi ilemwaiaiao kuini ‘ina guinua si da nonona ga si da ona wate nadigega king ‘ina ‘inapwanao iauiaudi ‘edia. Ta ‘enega sinara ta gamwasoara si da apwesa wawasae.

¹⁹ ‘Abo king ‘i nuanuana, loina esaesa ‘e bweu ‘enega ‘i da apwesa, ta Perisia ta Media ‘idi loina ‘edia si da ‘etoladi, be ‘enega gea‘abo si gibunina, ‘aene Pasiti gea‘abo wate king Aasaberosa matanaia ‘i da mema; ta ‘ana ‘egu‘eguia esaesa king ‘i da ‘ebwaea‘ena mari waine bobo‘ana wawasae ‘enaia.

²⁰ Ta ni‘atu king ‘ina loina ‘i guinuena ‘arena ‘i da apwesa ‘ina ‘ebeloina maibo‘ana ‘enaia, (sinabwana ta ‘enega,) ga to ai me wainedi iauiaudi mwanedi ‘edia si da ‘amaiaba, me sinabwadi ta me gidaridi ‘edia.

²¹ Ta ona nina king ta ‘inapwanao si nuanuana; ta king ‘i guinua Memukana ‘ina ona ‘atua:

²² Leta ‘i etunedi king ‘ina esena iauiauna ‘edia ta ‘enega, esena ‘e bweuna ‘e bweuna na‘ieana ‘ana ‘etoladi, ta tomota iauiauna ‘edia ‘enadi ‘atua, be ‘enega tai ‘e bweuna ‘e bweuna ‘ina anua ‘ena ‘i da loina, ta ‘i da simana dadana ‘ina tomota ‘enadi ‘atua.