Filimɔn 1 - Naaŋmen Nɔpaalaa Gane

Yaane Puoro

¹ Maa Pɔɔl naŋ waa nempɔgraa a Kirista Yeezu zuiŋ ane te yɔɔ Timoti la sɛgrɛ a lɛtɛ korɔ te ba Filimɔn naŋ e a te tontontɔ,

² a sɛgrɛ korɔ te yɔɔpɔge Afiya, a sɛgrɛ korɔ Akyipu a te sogyɛ-tɔ a Kirista toma poɔ ne a puoruu laŋne naŋ be a fo yiri poɔ:

³ Ka garaaseɛ ane maaroŋ naŋ yi a te Saa Naaŋmen ane a Daana Yeezu Kirista zie be yɛ zie.

A Filimɔn Nɔmmo Ane O Yeldeebo Yɛlɛ

⁴ Ka maa wa teɛre fo yɛlɛ n puoruu poɔ, N maŋ puoro la n Naaŋmen bareka tegitegilɛ

⁵ bonso, N woŋ la a fo yɛlɛ kyaare ne a nɔmmo fo naŋ taa ne a nensonne zaa ane a fo yeldeebo fo naŋ taa a Daana Yeezu eŋɛ.

⁶ N puoro la ka ka a fo yeldeebo fo naŋ wullo kyɛnɛ velaa ka fooŋ wa teɛrɛ a tonsonne zaa te naŋ na toɔ̃ toŋ ko a Kirista.

⁷ N yɔɔ, N sereŋ nyɛ la popeɛloŋ ane yelteɛbo yi a fo nɔmmo eŋɛ, bonso a nensonne sukyie leɛ nyɛ la faŋ paalaa a yi fo zie.

Pɔɔl Naŋ Sɔre Filimɔn A Onesimu Zuiŋ

⁸ A ŋaa zuiŋ, aneazaa ka N ba zoro dabeɛ̃ ka N ko fo noɔre a Kirista eŋɛ ka fo tonɔ a fo feroo toma,

⁹ kyɛ N na sɔre fo la ne nɔmmo; kyɛ maa Pɔɔl, nyɛ erɛ la a ŋaa N naŋ e dɔɔnyaŋaa kyɛ ka pampana meŋ ka N waa nempɔgraa a Kirista Yeezu zuiŋ.

¹⁰ N sɔrɔ fo la yaga zaa n bie Onesimu zuiŋ. N leɛ la o saa a Kiristabiiluŋ poɔ saŋ na N naŋ da be nempagdie poɔ.

¹¹ Saŋ kaŋ naŋ tɔle, o da waa la neɛ naŋ ba taa tɔnɔ ko fo, kyɛ pampana, o sereŋ taa la tɔnɔ ko fo ane ma.

¹² N tonɔ o la ka o leɛ wa fo zie, bonso, o waa la neɛ N naŋ nɔŋ ne n sukyiri zaa.

¹³ N da boɔrɔ la ka o be n zie a leɛre fo gbɛɛ a soŋnɔ ma a saŋ N naŋ da be a nempagdie poɔ a Ŋmen-yelnoore zuiŋ.

¹⁴ Kyɛ N ba boɔrɔ ka N e yelzaa ka fo ba tere sori, ka a lɛ vɛŋ ka a fo tonsonne e fo meŋɛ poboɔbo yeli, kyɛ ta e ŋa feroo la ka ba ferɛ fo.

¹⁵ Kaapɔge, a yeli ŋa la so ka o da wɛle yi fo zie belaa, ka ka fo na taa o tegitegilɛ ka o naŋ wa leɛ wa,

¹⁶ a koŋ la waa gbaŋgbaa, kyɛ waa neɛ naŋ gaŋ gbaŋgbaa; a gaŋ a zaa, ka o waa n yɔɔ-nɔnaa kyɛ maaleŋ gaŋ lɛ fo zie a nensaaloŋ ane a Daana eŋɛ.

¹⁷ Azuiŋ, ka fõõ wa de ma ka N waa fo tontontɔ, tuori de o aŋa lɛ fo naŋ da na tuori de ma.

¹⁸ Ka o naŋ wa sãã fo yelzaa poɔ, bee a di fo bonzaa sane, vɛŋ ka a leɛ n sane.

¹⁹ Maa Pɔɔl sɛgrɛ la a yeli ŋa ne n meŋɛ nu: N na leɛ yɔɔ la a sane. N ba yele yelzaa kyaare ne fo naŋ di n sane yɛlɛ, haali fo meŋɛ zaa tɔre e la n sane bon.

²⁰ Serɛzaa, n yɔɔ, vɛŋ ka n nyɛ a tɔnɔ ŋa yi fo zie a Daana eŋɛ! E ka a n sukyiri maa a Kirista eŋɛ.

²¹ N naŋ ba taa bonnoo ka fo maŋ sagra la noɔre, N sɛgrɛ korɔ fo la kyɛ baŋ ka fo na e gaŋ la lɛ N naŋ yele korɔ fo.

²² Ka N la poɔ yelyeni kaŋ: nare saama die bare ma, bonso, N taa la teɛretɔroo ka a fo puoruu na nyɛ la eebo, ka N leɛ wa a fo zie.

Yaane Puor-parebaaraa Ane Naaŋmen Maaloo

²³ Epaferase naŋ waa n nempɔge-tɔ a Kirista Yeezu zuiŋ puoro fo la,

²⁴ a lɛ la ka Marko, Arestaku, Dɛmase ane Luka naŋ waa n tonton-taaba meŋ puoro fo.

²⁵ Ka a Daana Yeezu Kirista garaaseɛ be yɛ seere poɔ.