KOLO 1 - Naaŋmen Nɔpaalaa Gane

Yaane Puoro

¹ Maa Pɔɔl, a naŋ e a Naaŋmen poboɔbo ka N waa a Kirista Yeezu apostolii ane te yɔɔ Timoti la sɛgrɛ a lɛtɛ

² korɔ a nensonne ane a yɔɔmine ane a yɔɔpuuli naŋ taa yelmeŋɛ a Kirista eŋɛ a be Kolosi teŋɛ poɔ: Ka te Saa Naaŋmen garaaseɛ ane maaroŋ be yɛ zie.

Pɔɔl Naŋ Puori Naaŋmen Bareka A Kolosi Kiristabiiri Zuiŋ

³ A te puoruu te naŋ maŋ puoro korɔ yɛ, te maŋ puori la Naaŋmen, a te Daana Yeezu Kirista Saa bareka tegitegilɛ,

⁴ bonso, te woŋ la a yɛ yeldeebo yɛ naŋ taa a Kirista Yeezu eŋɛ ane lɛ yɛ naŋ taa nɔmmo ne a nensonne zaa,

⁵ a teɛretɔroo ba naŋ biŋ ko yɛ a tenvelaa poɔ zuiŋ. Yɛ da woŋ la a teɛretɔroo ŋa yɛlɛ yi a yelmeŋɛ yelbiri naŋ e a Ŋmen-yelnoore

⁶ naŋ wa yɛ zie. Aŋa lɛ o naŋ wɔnɔ wɔmɔ kyɛ baara a tendaa zaa poɔ, a lɛ ka o wɔnɔ wɔmɔ a yɛmenne poɔ a yi a daare na yɛ naŋ da woŋ a kyɛ baŋ a Naaŋmen garaaseɛ tɛgɛ ka a ta.

⁷ A yeli ŋa la ka yɛ zanne yi Epaferase naŋ e te poyɛŋ neɛ kyɛ la waa te tontontɔ zie. O e la a Kirista tontonɔ naŋ taa yelmeŋɛ yɛ zuiŋ.

⁸ Ona la vɛŋ ka te baŋ lɛ yɛ naŋ taa nɔmmo a Vooroŋ Soŋ poɔ.

⁹ A ŋaa zuiŋ, a yi a lɛ daare na te naŋ da woŋ a yɛ yɛlɛ, te daŋ ba nage a yɛ puori teroo, kyɛ sɔrɔ ka yɛ paale ne a Naaŋmen poboɔbo ane seeloŋ yɛŋ ane yɛlɛ bammo tɛgɛ zaa,

¹⁰ ka ka yɛ na taa yɛ nyɔvoɛ a seŋ lɛ a Daana naŋ boɔrɔ, ka a sereŋ pɛllɛ O poɔ, ka yɛ wɔnɔ wɔmɔ tonveɛle zaa poɔ kyɛ baara a Naaŋmen bammo poɔ.

¹¹ Ka Naaŋmen e ka yɛ e kpeɛne kyɛ taa faŋ zaa naŋ yi O puubu kpeɛ̃õ poɔ, kyɛ nare yɛ ka yɛ dire kannyiri yelzaa poɔ ne popeɛloŋ,

¹² a puoro a Saa bareka, Ona la e ka yɛ ne a nensonne laŋ gbandiruŋ a veɛloŋ poɔ.

¹³ O faa te la yi a ligruŋ kpeɛ̃õ poɔ kyɛ taa te wa eŋ a O poyɛŋ Bie naaloŋ poɔ,

¹⁴ O eŋɛŋ la ka te nyɛ faabo ane yelbebe sudi.

A Kirista Di La Naaloŋ Boma Zaa Zu

¹⁵ A Kirista la a Naaŋmen ba naŋ kontoɔ̃ nyɛ ne nimiri waaloŋ, a bidɛndɛŋ a bon-iri zaa poɔ.

¹⁶ Bonso, O zie la ka Naaŋmen tu iri boma zaa, boma naŋ be sazu ane a tendaa zu, boma te naŋ nyɛrɛ ane boma te naŋ ba nyɛrɛ, ka nakogri la bee ka naaloŋ kpeɛ̃õ la, bee ka zukaareba bee ka kpeɛ̃õ deme la; Naaŋmen tu la O zie kyɛ iri a boma zaa a O zuiŋ.

¹⁷ O meŋɛ daŋ la a boma zaa wa bebe, kyɛ a O eŋɛ la ka a boma zaa lantaa are.

¹⁸ Ona la a puoruu laŋne endaa zu. Ona la a piiluu, a bidɛndɛŋ naŋ leɛ-iri yi a kũũ poɔ, ka ka O wa e a dɛndɛŋ soba yelzaa poɔ.

¹⁹ Bonso, a Kirista poɔŋ la ka a Naaŋmen waaloŋ zaa da nɔŋ ka O be.

²⁰ O zie meŋ la ka Naaŋmen poɔ da pɛle ka O tu ka O ne a boma zaa leɛ maale taa, ka a teŋɛzu la bee ka sazu poɔ la, O tu la a Kirista dagaraa zu zẽẽ zie a wa ne maaroŋ.

²¹ Kyɛ yɛnee naŋ da waa noba naŋ wɛle yi Naaŋmen eŋɛ, a waa O dɔndɔnne yɛ teɛroŋ poɔ, a erɛ yelfaare

²² kyɛ pampana, O leɛ maale la yɛ ne O yɛlɛ ka a kpɛ taa a O eŋgannoŋ poɔ a yi kũũ eŋɛ, ka ka O na de yɛ tere ka yɛ waa soŋ a ba taa saanaa ane faaloŋ zaa O niŋesogɔ;

²³ ka a naŋ wa e ka yɛ naŋ kyɛnɛ are la kpeɛŋaa kyɛ kpimare a yeldeebo, a ba wa tagra yire a teɛretɔroo na ba naŋ da eŋ noɔre ka yɛ woŋ yi a Ŋmen-yelnoore poɔ, a na ka ba da moɔle ko a bon-iri zaa naŋ be a teŋɛzu. Maa Pɔɔl wa leɛ la a Ŋmen-yelnoore ŋa tontonɔ.

Yɛlɛ Na Pɔɔl Naŋ Boɔrɔ Yi A Kolosi Teŋɛ Deme Zie

²⁴ Pampana, N kyellɛ la n dɔgɛɛ poɔ yɛ zuiŋ, kyɛ a n eŋgane poɔ, N baare dire la a Kirista dɔgɛɛ naŋ kyɛre, a puoruu laŋne naŋ waa a O eŋgane zuiŋ.

²⁵ N leɛ la a puoruu laŋne tontonɔ a seŋ lɛ Naaŋmen naŋ da kaa-iri ma a yɛ zuiŋ, ka N e ka ba baŋ a Naaŋmen yelbiri ka a ta,

²⁶ a yelsɔglaa ŋa ba naŋ da sɔgle yuomo ane nemboore parɛɛ naŋ tɔle gaa kyɛ ka ba iri a wuli a nensonne pampana.

²⁷ Bana la ka Naaŋmen da sage ka O e ka ba baŋ lɛ O puubu yelsɔglɔ bondaanoŋ naŋ da seŋ lɛ a Kirista naŋ be a Nemboore-yobo poɔ, a puubu teɛretɔroo.

²⁸ A Naaŋmen yɛlɛ la ka te moɔlɔ, a kpaana neɛzaa kyɛ kanna noba zaa ne yɛmbammo zaa, ka ka te na toɔ̃ de neɛzaa tere ka O baa ta neɛ a Kirista eŋɛŋ.

²⁹ A yeli ŋa zuiŋ la ka N tonɔ kyɛ moɔrɔ ne a faŋ na zaa O naŋ de eŋ ma yaga zaa.