Tito 2 - Diósïri Karakata P´urheepecha Jimbo

Nénaksï irekaa jakajkuticha

¹ T'u chéti jimbo ásï jáma uénheni ambakiti jurhentperakuani.

² Imani erakua tátechani engaksï sési erangunstiuaka ambe, engaksï kaxumbeaka, engaksï iámu ambe urheta sési eratsentaaka uandani ka úni jámani, engaksï sési jakajkutiuaka, engaksï xénhchpitiuaka, ka eskaksï tekaantskua kámaaka.

³ Ka uarhimasïchaksï imeuati engaksï xarhataaka eskaksï Diósïni janhanharhisïnga; eskaksï no arhinhchpitiuaka, eskaksï no kauicheuaka, ka eskaksï sési jásï ambe jurhentpiriuaka;

⁴ eskaksï inde jurhendauaka uarhiti sapirhatichani uambechani ka uájpechani xénhchakorheani,

⁵ ka imaksï jurhendauati sési eratsentani urheta ambesï uandaa ka ambesï úa, ka eskaksï no ísku jándiuaka, eskaksï k'umanchekuani méntkisï sési jatsiaka, eskaksï sési kámpitiuaka, eskaksï iámendu ambe jimbo uámbani kurhajchaaka; ísï jámani nónema úati Diósïri uandakuani nósesi uandatseni jarhani.

⁶ P'ímarhea tumbichani eskaksï eratsekuntaaka ambeksïsï uandaa ka ambeksïsï úa;

⁷ ka iámendu ambe jimbo t'u uéna sési ambe xarhatani; jurhentpeni jámani xárhata eskari k'amak'ámasï jurhenaxaka, xarhata kaxumbekua,

⁸ sési ambe uanda, eskakini nónema úaka ambema arhicheni, eska jamberi k'uratsetakorheaka ne engakini uékani jauaka ambema arhinharhikuni, ka eskari nómbema arhikua jukaaka.

⁹ Jántspirichantu p'ímarhea eskaksï kurhandiratspeaka nani engaksï ánchetanhajka, jángorhenteksï sési pakarakuni iámendu ambe jimbo, eskaksï no jámaaka mókukorheni;

¹⁰ ásï jáma je sïpatspeni ambema jima engajtsï ánchekorheni jauaka, sánderu sáni iámu ambe aingpentsï je, eskajtsï iámu ambe úni jámani xarhataaka Diósïri jurhentperakuani, ima enga juchari p'ímutantspirika.

¹¹ Jimboka Diósïri kóntperakua, enga xarharakia, iámenduechanisï p'ímutantauaka,

¹² ka jurhendasïndijtsïni eskachi Diósïni janhanharhiaka ka eskachi jurajkuakia parhakpeni anapu ambe atamarhekua, jurhendasïndijtsïni eskachi íni jurhiatekuechani kaxumbeaka,

¹³ erontaparini sési jásï tekantskua ka enga t'íntskua jinguni xarhantaaka, Jesukristu enga juchari Diósïka, ka enga k'érikamendu,

¹⁴ ima enga juchantsïni jimbo aiakorhentaka ka ísï jámantsïni maiampecheni iámendu juchari nósesi niátakua ambe ka engajtujtsïni iámendu juchari k'ámanharhintskuechani jimbo maiampecheka, ka ísï jámani ambakerakorhentani imeri iretani enga méntkisï sési ambe úni jauaka.

¹⁵ Íni ambe uanda, ka p'ímarhpe ka iámu juramukua jinguni xukajpe, ka ásïkini nema ísku kurhajche.