Romanos 3 - Diósïri Karakata P´urheepecha Jimbo

¹ ¿Andi ambechkamendu sánderu ambesïnki judioueni? ¿Andi ambe marhuasïnki mínda jukani?

² Iámendu ambe jimbo kánekua ambesti. Sánderu sáni jimbokaksï judiouecha mintsïkanhaska patsaranhani Diósïri uandakuani.

³ Ka engaksï máru no mintsikueka ¿Andi imecheri jimbo k'amakurhia enga Diósï aiakuatini jáka?

⁴ No ísïsti, Diósï k'óru májku ambe uandasïndi, nájkiruka k'uiripu chkuándireka, jimbosï karakata arhijti: “Chéti uandakua jimbori kaxumbeska ka ekaksïni útacheaka, t'úri andakuaka.”

⁵ Ka eka juchari nósesi jángua marhuajka xarhatani ambe enga Diósï uéjka. ¿Andi jiájkanchi úaia parhakpeni anapueni eratseni ka arhini, eska Diósï no támisï jámsïnga engajtsïni ikimejka?

⁶ Méntku nósanichi úaka ísï arhini, jimboka enga ísïpiringa, ¿Andi nénateru Diósï terujkani anhaxurhia parhakpeni anapuechani arhinharhikuani?

⁷ Ka engani ji chkuándireka, ka ísï jámani úni eska Diósïri ambe sánderu sési xarharaka, ¿Andisïni útasï k'amanharhiranhantani jaki?

⁸ Márujtsïni arhinharikuxati eskanhani jucha jurhentpexaka, eska sésiska méntku nósesi irekania. Indeksï k'óru ikimenhaati engaksï ísï eratsejka.

Nónema kaxumbesti.

⁹ ¿Néna jaki jimajkani? ¿Andi jucha judiouecha sánderu k'éri ambeski? ¡Nóchka ambe! Arhiskaksïnia eska judiouecha ka no judiouecha májkuenichi k'amanharhintstiska.

¹⁰ Eska karakata na arhijka: “Nónema k'amak'amasï kaxumbitisti, méntku nónema;

¹¹ Nónema kurhandirasïndi; nónema jirinhantasïndi Diósïni.

¹² Iámu támisï ninhastia, márku tsînchekorhenhastia; Nónema sési ambe úsïndi, méntku nónema.

¹³ Arhirperakua ambejkuksï uandasïndi, tandojchpesïndiksï, ka nósesiksï útspesïndi akuitseri kuechendaksï jatachasti.

¹⁴ Kurhurjasïksï jámasïndi.

¹⁵ Ka uiriakorhesïndiksï atajpenhchani.

¹⁶ Iámu ambeksï xeretspepasïndi ka kómu pakatpepasïndiksï.

¹⁷ Noksï jurhenasti sési pájperaparini irekani.

¹⁸ Nóksï sáni chénharhisïndi Diósïni.”

¹⁹ Míteskachi k'óru eska, ambe enga juramukua arhijpejka, imechanisï arhiani jaka enga karakata juramukuajka, ka nónema úati uandakorheni jarhani jimboka Diósï terujkani anhaxurhiaka arhinharhikpeni,

²⁰ jimboka Diósïni japarini no nema kaxumbeska juramukuani kurhandirakuparini; jimboka juramukua k'amanharhintskua ambejkusï mítetarpejka.

Jesukristunisï uétarhejti mintsikani

²¹ Ka iásïa, juramukuani támu péraparini, xarharastia ambe engamendu Diósï uéjka, enga juramukua ka Diósïri uandaricha arhijpempka;

²² Diósï uékaxati eska iámenduecha engaksï jakajkujka, Jesukristuni jimboksï kaxumbentaaka. Nani uéjki anapuenhani,

²³ jimboka iámu k'amanharhinhantaska, ka Diósïri t'íntskuani nóteru nema exesïndia,

²⁴ ka ima kóntpesti maiamperakuani, imani kéjtsïtakua jimbo enga Krístu Jesusi kéjtsïtaka.

²⁵ Diósï exerpestia nénasï eratsetini japi, Jesusini maiampetarantasti ka k'uanisïndi mintsikani eska imasï uárhipka. Xani ióni no ikimpesti k'amanharhintskuechani jimbo,

²⁶ jimboka ima xáni tekantskua kámsïnga, ka iásï exerpestia nénasï uéjki. Jimboka ima kaxumbeska, ka kaxumbiti exesïndi néni enga Jesusini jakajkujka.

²⁷ Ka ¿Nénateruchisï k'éramakorheaia? Méntkuchi nóteru úakia arhikorheni jarhani ¿Andi náki juramukua o úkua xáni sési marhuaski? Méntku nóma, imajkusï marhuajti enga Diósïni jakajkuaka.

²⁸ Jánhaskaxakachkachi eska jakajkukua jimbo kaxumbenhantasïnga; ka no arhisïndi náxani kurhandirakusïni juramukuani o náxani ambe sési úsïnki.

²⁹ ¿Andi Diósï judiouecherijkueski? ¿Andi máteru iretecharhu no Diósïski? Máteru iretecherijtu Diósïsti,

³⁰ jimboka Diósï májkueska. Ka kaxumbitini xéati néni enga Krístuni mintsikaaka; mínda jukarichani ka no mínda jukarichani.

³¹ ¿Jimajkanchi úa Krístuni jakajkutini arhini eska juramukua nóteru jukaparhakueskia? ¡Nóchka ambe! Ísï jámanchi juramukuani sánderu jukaparharaxaka eska Krístuni.