San Mateo 9 - Diósïri Karakata P´urheepecha Jimbo

Acheti ma enga no úempka manakorheni ambakeranhantasti

¹ Tátsekua enga Jesusi k'éri icharhutarhu jatantapka, parhikuntaspti ka imeri iretarhu niántaspti.

² Ka jimaksï pérakuspti k'uírakua ma jimbo achetini ma enga no úempka manakorheni. Jesusi exearini eskaksï ima kánekua mintsikaxapka, p'amenchatini arhispti: –Jucheti uátsï, uinhapekorhentsï, k'amanharhintskuechaniri púamenhantaskia.

³ Ka máruksï kararicha arhijperaxapti: “I Diósïni útakuxati.”

⁴ Jesusi mítetini ambe engaksï eratseni jápka, uandaspti: –¿Andijtsïsï xáni nósesi jásï ambe p'ikuarhenhejki?

⁵ ¿Ambe sánderu no ts'unhapeski, uandani: “K'amanharhintskuechaniri púamenhantaskia arhini, o jauara ka xanhara arhini?”

⁶ Jíksïni exeraaka eska Acheti Uájpa, parhakpeni juramukua jatsiska k'amanharhintskuechani púatspeantaani. Ka arhispti imani enga no úempka manakorheni: –Jauara ka k'uírakuani k'arhakorhentsï ka níia níntani.

⁷ Ka ima acheti jauaraspti ka níntaspti.

⁸ Ísï exenhatini, kánekua chérakorhenhatixapti ka Diósïnksï k'éri ambe arhispti jimboka xásï juramukua íntspespka.

Jesusi Mateoni uandajpasti

⁹ Enga Jesusi jima kéndikupka, achetini ma exespti enga Mateo arhinhempka, enga tumina tánantskuarhu uaxakatini jápka ka arhispti: –Chúxapurini. Mateo jauaraspti ka chúxapaspti.

¹⁰ Ísï tátsekua, enga Jesusi Mateuo t'ireni jápka, uánekuaksï tumina tánaticha ka k'amanharhintsticha niáraspti, ka uaxakasptiksï t'ireni jima enga Jesusi jurhengorheri jémbecha jinguni jápka.

¹¹ Engaksï fariseuecha exepka arhiasptiksï jurhengorherichani: –¿Andisï chári jurhentpiri tumina tánaticha ka k'amanharhintstichani jinguni t'ireni jaki?

¹² Jesusi ísï kurharini arhiaspti: –P'amenchatichaksïsï tsinajpirini uétarhenchajti, nóksï ima engaksï sési jámani jaka.

¹³ Ni je ka jurhengorhe je ambe enga arhikuekajka “P'amojperakuasïni uéjka ka no parhandikua kéjtsïtakua ambe.” Jimbokani ji no kaxumbitichanisï ióarhiantaani juka, k'amanharhintstichanisïni juka ióarhiataani.

Jesusinksï k'arhinda jakueri ambe kurhamarhesti

¹⁴ Juánu itsï atajtsïkpiriri jurhengorherichaksï, Jesusini andarheraspti ka kurhamarhesptiksï: –¿Andisïni jucha ka fariseuechaksï mémechani k'arhinda jarhajki? ¿Ka andiksïsï chéti jurhengorhericha no k'arhinda jarhajki?

¹⁵ Ka Jesusi arhiantaaspti: –¿Andi úaksï tembuchakuarhu, jarhojpiricha mískorheni jarhani enga tembucha imechani jinguni jauaka? K'óru niáraati jurhiata enga tembucha p'íkunhantaaka ka jiájkani k'óruksï karhinda jauati.

¹⁶ “Nónema takusï jimbanhe jimbo maiarasïndi xukuparhakua tamapuni, jimboka takusï jimbanhe tskúntasïnga ka tamapuni sánderu karukuni.

¹⁷ Ka kauikua jimbanhejtu no jatsiranhasïndi kauikua jatakua tamapurhu, jimboka sïkuiri katikorhesïnga ka kauikua tsîncheni. Ísï jimbosï kauikua jimbanhe, jimbanhe jatakuarhu jatsiranhajti, ka ísïksï tsimani ambe márku patsakorheati.”

Jáiru uájpa uátsï tsítanhantasti

¹⁸ Enga Jesusi íni ambe arhiani jápka, judiuecheri urhejtsïkuri ma andarheraspti, ka tinguixurhikutini arhispti: –Nanaka sapichu jucheti iáiasï uarhisti; ju p'ájtsïkuni ka ima tsíntaati.

¹⁹ Jesusi jauaraspti ka jurhengorheri jémbechaksï chúxapaspti.

²⁰ Ka xanhari jimbo, uarhiti ma andarheraspti enga témbeni tsimani uéxurhini p'amenchapkia, iurhirini no úni anhaxustani ka sunundani jupijparhukuspti,

²¹ jimboka ísï p'ikuarhenhesïrempka: “Sunudajkuni ekani párhekupiringa, ambakentaaka.”

²² K'óru Jesusi p'irhipakorhespti ka uarhitini erateparini arhispti: –Ásï jáma p'ikuarherani jucheti uátsï, mintsikaskarini jimborisï ambakentaka. Ka ima uarhiti jimajku ambakentapaspti.

²³ Enga Jesusi urhejtsïkurio inchapka, exeaspti kústatichani, ka imechani engaksï uerani jápka, ka engaksï mámaru ambe uandantani jápka,

²⁴ ka arhiaspti: –Kéndiku je, nanaka sapichu no uarhirixati, k'uíxati. Ka Jesusinksï teresmarhusïrempti.

²⁵ Ka engaksï iámenduecha petanhantapka, Jesusi inchaspti ka nanaka sapichuni jupijkuspti, ka nanaka sapichu tsíntaspti.

²⁶ Ka iápuru jimesï ima ambeterku uandanhantaxaptia.

Jesusi tsimani pátenharhichani éskataraasti

²⁷ Enga Jesusi uéntapka, tsimani pátenharhichaksï chúxapaspti uinhachakuparini: –¡Dabi uájpa, p'amojkujtsïni!

²⁸ Ka enga Jesusi k'umanchekuarhu niántapka, pátenharhichaksï andarheraspti ka Jesusi kurhamarheaspti: –¿Andi cha mitsikasïnki eskani úaka ísï úni? Ka imaksï arhispti: –¡Jo, Tata! Arhini.

²⁹ Jiájkani Jesusi p'ánharhikuaspti arhiaparini: –Úkorhe ísï eskamendujtsï na mintsikani jaka.

³⁰ Ka exesptiksï ka Jesusi uinhamarhekuaspti: –Ásï nemani aianguntsï je.

³¹ K'óruksï ima kéndikutini iápuru jimesïksï uandantaspti.

Jesusi nunuxini ma uandarasti

³² Engaksï pátenharhicha uéntani jápka, jimajkuksï pérakuspti nunuxini ma enga nósesi jásï ma incharhetini jápka.

³³ Enga Jesusi nósesi jásïni petarhetantapka, nunuxi uandaspti. Ka ísku pakareranhaspti ka uandanhasïrempti: –Israeli iretarhu nómeni xásï ambe exenhaxapti.

³⁴ Ka fariseuechaksï uandasïrempti: –K'éri nóambakitiri juramukua jimbo petarhpeantaasïndi nósesi járhatichani.

P'ikuntskua kánekuesti

³⁵ Jesusi iápuru k'érati ka sapirhati iretecharhu nirasïrempti, ka k'umanchekua tángorhentskuecharhu jurhentpesïrempti ambakiti aiangperakuani, ka iámendu jásï p'amenchakuechani ka p'ikuarherakuechani ambakerpentasïrempti.

³⁶ Ka xáni uáni exejpetini, kánekua p'amojkpespti jimboka tsînchekata ka etsakorhetini jánhaxapka, ísï eskaksï karichicha enga nónema eranguani jarhajka.

³⁷ Ka jurhengorheri jémbechani arhiaspti: –Sési jimbo, p'ikuntskua kánesti ka p'ikuntstichaksï namuntkuesti.

³⁸ Kómarhi je Achani enga p'ikuntani jaka eska axauaka p'ikuntstichani.