San Mateo 5 - Diósïri Karakata P´urheepecha Jimbo

Jesusi juátarhu arhijtsïkpesti

¹ Xáni uáni exejpetini, Jesusi juátarhu ma karhamaspti ka jima uaxakaspti, jimajkanksï jurhengorheri jémbecha andarheraspti,

² ka ima uénaspti uandani ka jurhendaasïrempti arhiaparini:

Ambe enga Diósïni jimbo jukaparhakueka

³ “Tsípeksï ima engaksï nómbe ma jimbo k'éramakorhejka, jimboka auandarhu anapu irechekua imecheriska”

⁴ “Tsípeksï ima engaksï uerani jaka, jimbokaksï sési arhinhantaaka.”

⁵ “Tsípeksï kaxumbiticha, jimbokaksï echeri aiakatani ima intsïnhaaka”.

⁶ “Tsípeksï ima engaksï uékani jaka eska úkorheaka eska Diósï na uéjka, jimbokaksï úmenhaaka ambe engaksï uékani jaka.”

⁷ “Tsípeksï p'amojpiticha, jimbokaksï p'amojkunhantaaka.”

⁸ “Tsípeksï ambakiti mintsita jataricha, jimbokaksï Diósïni exeaka.”

⁹ “Tsípeksï ima engaksï sési pájperakua ambe úni jámka, jimbokaksï Diósï uájpa arhiauaka.”

¹⁰ “Tsípeksï ima engaksï sési ambe úrini, útasï atanhani kánhka, jimboka auandarhu anapu irechekua imecheriska.”

¹¹ “Tsípe je cha engaksïni jíndeni jimbo útacheaka ka atakuekanksïni ka mámaru ambeksïni nósesi jásï ambe chkuándiraparini arhiparhatani.”

¹² Kánekua tsípe je, ka sési p'ikuarhera je, jimboka auandarhu chári andakua káneska; nóchkaksï Diósïri uandari tua anapuechani májkueni ataaspi andi.

Etukua ka ambakiti t'íntskua

¹³ “Chájtsï parhakpeni anapu etukueska, ka enga etukua nóteru etumarhaaka, ¿Ambeteru úni marhuasïnki? Nóteru marhuapirindi, xanharuterku k'uanitamanhasïndi ka jima t'auajchakunhasïndi.”

¹⁴ “Chájtsï íni parhakpeni anapu erajkutakueska; k'éri ireta ma enga juátarhu karhakua jarhajka no úsïndi no xarharani.

¹⁵ Ka erajkutakua májtu no étskunhasïndi ka purhechirhu ma kápchakuranhani, erajkutakua ch'urhinguarhusï péranhajti eska erajkutauaka iámenduechani engaksï k'umanchekuarhu jarhajka.

¹⁶ Májkueni t'íntskare chári t'íntskua uánekuechani japarini, eskaksïni chánksïni sési ambe úni exerini, chári Táteni enga auandarhu jaka k'éri ambe arhiaka.”

Juramukueri ambe jurhentperakua

¹⁷ “Ásï ísï eratse je eskani ji jurhaska Diósïri uandarichani ka Diósïri juramukuechani k'amajkuani, no k'amajkuanisïni juka, marhuataanisï juka.

¹⁸ Jimbokaksïni sési jimbo arhixaka eskaksï parhakpeni ka auanda nótki k'amakurhini jauaka, ka iámendu ambe kurhadiranhaati eskamendu juramukuarhu na karakata jaka, ka iámu ambe ísï úkorheati.

¹⁹ Ísï jimbo nákinderku nema enga juramukuechani no kurhajchauaka náuejki sánderu sapichu méni, ka ísï jurhentpeni, auandarhu anapu irechekuarhu kánekua sapichu arhinhaati; k'óru ima enga ísï úaka ka ísï jurhentpeni, auandarhu anapu irechekuarhu k'éri arhinhaati.”

Jesusi jurhentpesti ambe enga Diósï sánderu uéjka

²⁰ “Ísï jimboksïnisï arhini jaka, ekajtsï cha no sánderu sési jámaska eskaksï fariseuecha ka eskaksï juramukua jurhentpiricha, eska Diósï na uéjka, nójtsï inchaaka Diósïri irechekuarhu.”

Jesusi uandikperakueri ambe arhijpesti

²¹ “Chájtsï kurhaskia ambe engaksï tua anapuecha arhinhaka: ‘Ásï uándikpe, ka nákinderku nema enga uándikpeska, k'amanharhiranhantaati.’

²² K'óruksïni ji arhixaka: Ima enga erachi jémbani ikiakuaka, indeni jimbo k'amanharhiranhantaati, ka ima enga erachi jémbani útakuaka, k'éri tángorhekuarhu k'amanharhiranhantaati, ka ima enga kánekuamendu nósesi útakuaka erachi jémbani, chpírirhu k'uanijpanhaati.”

²³ “Ísï jimbo, ekari kéjtsïtani jámani jima míantaska eskajtsï erachi jinguni arhirperatixaka,

²⁴ parhandikuani kéjtsïtakuarhu urhepani jurajku, ka ni urheta chéti erachi jinguni sési arhijperantani ka xásïri k'uanhatsentaaka parhandikua kéjtsïtani.”

²⁵ “Sóntku teruatperantsï je ne engajtsï jinguni arhirperatini jaka, engakini ima nótki útatsperakuarhu p'itajkorheni jauaka, ásïkini ima útatspirini intsïnharhite, ka útatspirikini ónhpirini, ka ónhpirikini k'ataperakuarhu incharani.

²⁶ Sési jimbokini arhixaka eskari no uéraaka ekari no urheta iámu maiampentaska.”

Jesusi ísku jándikueri ambe arhijpesti

²⁷ “Chájtsï kurhaska eska uandakata jarhaska: ‘Nóri jámaaka ísku jándini.’

²⁸ Ka jíksïni arhisïnga eska ima enga iurhitskirini ma atamarheaka, eska ima mintsitarhu ísku jándi úkorheskia, imani iurhitskirini jimbo.”

²⁹ “Ísï jimbo, ekakini éskua jurhijkandani anapu terungutaraska, p'itanharhi ka k'uaniku, sánderu sésisti eskari ma ambe tsîtaaka ka nóri infiernurhu iámu k'uanijpanhani.

³⁰ Ka ekakini jájki jurhijkandani terungutaraska, kachujku ka k'uaniku, sánderuchka sésisti eskari ma ambejku tsîtaaka ka nóri infiernurhu iámu k'uanijpanhani.”

Jesusi jurajperakueri ambe arhijpesti

³¹ “Ka ístu uandakata jarhasti: ‘Ne enga témbani nóteru xénhchaaka, úati karakata úkuni enga arhiaka eska jurajkuxaka.’

³² Ka jíksïni arhisïnga eska ne enga témbani ikimchaaka, ka no uarhitiri ísku jándikua jimboeni, ísku jándi úxati, ka ima enga uarhiti jurajkukatani tembuntaaka ísku jándixati.”

Diósïni aiakuni

³³ “Ka kurharixakajtujtsï ambe engaksï tua anapuecha arhinhaka: ‘Ásï jáma ísku uénani uandani ka tátsekuari no ísï úni, sési k'amata úni ambe engari Diósïni aiakuka.’

³⁴ Ka jíksïni arhisïnga: Ásï méni jáma je auandani jimbo ambe ma aiatspeni, jimboka Diósïri uaxantskua jima jarhaska;

³⁵ ójtu parhakpeni jimbo, jimboka Diósïri jatandukueska, ójtu Jerusaleni jimbo, jimboka ima ireta k'éri irecheriska.

³⁶ Ka ástu jáma chéti éjpu jimbo ambe ts'ïrimerakuekani, jimbokari no jamberi úsïnga ma jauiri t'upujtsïkorheni ori turhiptsïkorheni.

³⁷ Ma ambejku uétarhesïndi eskajtsï uandaaka ‘Jo’ o ‘Nómbe’ jimboka nóambakitiriska ekajtsï jukari uandaaka.”

Jesusi atajperantskueri ambe arhijpesti

³⁸ “Kurhariskajtsï ambe enga uandanhaka: ‘Engakini nema éskua atacheaka, t'újtu éskua atakuntsï ka engakini nema sînichani etsaaskacheaska, t'újtu etsaaskakuantsï.’

³⁹ Ka jíksïni arhisïnga: Ásï jáma je anhatsekuni imani enga nóambakeka; ekakini nema jurhijkandani páksanharhikuska, máteru akandantukini páksanharhikue.

⁴⁰ Ekakini nema útatsperakuarhu p'itajkorheska ka xukuparhakuakini euakorheni, chereparhakuajtu íntsku.

⁴¹ Ka ekakini nema ambe sáni párakuekaska, iauani jamberi jarhuata páni.

⁴² Íntskuakari imani engakini ambe kurhacheaka, ka ásï jáma no jiájkutani ne engakini ambe kuáneni uékaaka.”

Xénhchaa imechani engaksïni kurhunhejka

⁴³ “Ístujtsï kurhaaska ambe enga uandanhaka: ‘Chájku xénhchpera je ka kurhunhea je imechani engaksï ikiajchejka.’

⁴⁴ K'óruksïni ji arhixaka: Xénhchaa imechani engaksïni kurhunhejka ka kómu arhijpekua je imechani engaksïni k'amarhentka útacheni.

⁴⁵ Ísïjtsï chári Táte uájpeuaka enga auandarhu jaka, enga imeri tata jurhiata jimbo no ambarhatichani ka kaxumbitichani t'íntskakuajka ka janirakuani.

⁴⁶ Ekajtsï cha imechantku xénhchaaska engaksïni chánksïni xénhchajka, ¿Ambejtsï andaa? ¿Andi nóksï májkueni jámasïnki tumina tánaticha?

⁴⁷ Ka ekajtsï cha, chári erachichantku uandajpaska, ¿Ambejtsï jukari sési ambe úxaki? ¿Nóksï no jakajkuticha jamberi ísï jámasïnki?

⁴⁸ Cháchka k'amak'amasï sési ambe u je, ísï eska chári Táte enga auandarhu jaka enga k'amak'amasï sési ambe újka.”