San Mateo 28 - Diósïri Karakata P´urheepecha Jimbo

Jesusi tsíntasti

¹ Domingu jimbo, erandetintku jiáni enga semana uénajka, Maria Magdalena máteru Maria jingunksï niraspti nani enga Jesusi pénhantapka.

² Ka mátirku k'éri ma jenchespti, jimboka Acheri ánjeli ma auandarhu uératini kétsespka, ka kénditaspti tsakapuni ka tsakapurhu uaxajtsïkuspti.

³ Piritakueni jáxespti ka xukuparhakua iéstakueni t'uput'upuxespti.

⁴ P'urhejkutichaksï manarantaspti xáni chéni ka chánchanhasïksï pakaraspti.

⁵ Ka ánjeli uarhitichani arhiaspti: “Ásï jáma je chéni, ji mítetixaka eskajtsï Jesusini jirinhantaxaka, imani enga cháparhatanhaka.

⁶ Nóteru ixu jarhastia, tsíntastia eska na uandaka. Jútkiru je exeni nani enga Acha pénhantapka.

⁷ Ka ni je kókuani ka arhia je jurhengorheri jémbechani eska Jesusi tsíntaskiia, ka eska Galilea urhekupauaka, jimaksï exeati. Arhiskaksïnia.”

Jesusi uarhitichani xarhakuantaasti

⁸ Imaksï manaraparini ka tsípeparini uéntaspti jima enga Jesusi pénhantapka, ka uiriasptiksï Jesusiri jurhengorherichani aianguantaani, ka engaksï nirani jápka,

⁹ Jesusi xarhakuaspti ka arhiaspti: “Jéndi”, ka imaksï andarheratini, kamajpandukuspti ka k'éri ambeksï arhispti.

¹⁰ Ka Jesusi arhiaspti: “Ásï che je, ni je jucheti erachichani aianguantaani eskaksï Galilea niuaka ka jimajtsïni xéntaati.”

P'urhejkutichaksï chkuándirataranhaspti

¹¹ Ka engaksï ima nirani jápka, p'urhejkutichaksï iretarhu niraspti ka aianguantaasptiksï tátecheri urhejtsïkurichani ambe enga xáni úkorhepka.

¹² Ka achamasïcha jingunksï tángorhentaspti ka engaksï na pakatperapka, p'urhejkutichanksï kánekua tumina íntsaaspti

¹³ ka arhiasptiksï: “Chájtsï uandantaaka: ‘Jurhengorheri jémbechaksï chúrekua niárasti ka Jesusinksï pántasti engani jucha k'uíni jápka.’

¹⁴ Ka eka juramuti íni ambe míteska, jucha míteskia néna engachi arhiaka, ka chánksïni no inchajperaaka.”

¹⁵ Ka imaksï tumina euaspti ka úsptiksï eskaksï na arhinhapka. Iásï jamberiksï judiuecha íni ambe uandaxatiteru.

Jurhengorherichaksï ambakiti aiangperakuani míndanhasti uandantani

¹⁶ Ka témbeni ma jurhengorherichaksï Galilea niraspti, imani juáta jimbo enga Jesusi arhiapka.

¹⁷ Ka k'éri ambeksï arhispti exerini, nájkirukaksï máru tsimantsimanearhani jápka.

¹⁸ Jesusi andarheraaspti ka arhiaspti: “Iámendu jásï juramukua auandarhu ka echerindu intsïnhaska.

¹⁹ Ísï jimbo, ni je ka iámendu iretechani jurhengorheri ua je, itsï atajtsïkpe je Táteri ka Uájperi ka Espiritu Sántueri jakangurhikua jimbo.

²⁰ Ka jurhendaa je eskaksï úraaka iámendu ambe engaksïni ji jurhendaka. Ka ji, parhakpeni k'amakurhikuarhu jamberi mándani pauani chánksïni jinguni jauaka.”