San Mateo 27 - Diósïri Karakata P´urheepecha Jimbo

Jesusi Pilatuni jinguni pánhasti

¹ Sïuajpentku, iámenduksï k'éri tátecha ka achamasï iretarhu anapuechaksï eratsekuntaspti néna engaksï Jesusini uándikupiringa.

² Jójkutinksï juramuti Pónsio Pilatuni pákuspti.

Júdasï uandikukorhesti

³ Ka Júdasï, ima enga Jesusini intsïnharhitpepka, exerini eskaksï uándikupiringa, p'amondakorhespti ísï úrini ka ma ekuatse ka témbeni taiakatechani k'éri tátechani ka achamasïchani íntsantaaspti

⁴ arhiaparini: “K'amanharhintaska ísï uarhikuarhu intsïnharhitpetini imani enga nómbe ma k'amanharhintaka.” Ka imaksï mókukuntaspti: “¡Ka jucha ambeia, chéti jimboestiia!”

⁵ Ka tuminani tiósïo k'uanimutaspti, ka niraspti pirajchakorheni.

⁶ K'éri tátechaksï tuminani k'arhantaspti ka uandasptiksï: “No sésekua jarhasti íni tuminani tiósïo jurajkuni, jimboka uándikperakueri maiampekateska.”

⁷ Ka engaksï kurhamukperapka, imani tumina jimboksï purhechi úrini echeri ma piákuntaspti, jima engaksï uérakua anapuecha jatsinhantapiringa.

⁸ Ka ísï jimbo iásï jamberi jima: “Iurhiri jáakurhakuarhu” arhinhajti.

⁹ Ka úkorhesti ísï eska Diósïri uandari Jeremiasï na uandapka: “Ma ekuatse témbeni taiakatechanksï p'íkuaspti, eskaksï Israeli anapuecha náxani jukaparharaka,

¹⁰ ka echeri, purhechi úrinksï piákuntasti, eskamendurini Acha na juramucheka.”

Pilatu Jesusini kurhamarhesti

¹¹ Jesusi juramuti jinguni péranhaspti ka juramuti kurhamarhespti: “¿T'úsï judiuecheri ireche?” Ka Jesusi arhispti: “T'úri ísï uandaska”.

¹² Ka tátacheri urhejtsïkuricha ka achamasïchaksï, Jesusini ambe arhiparhataxapti, ka Jesusi nómbema mókukorhespti.

¹³ Ka Pilatu arhispti: “¿Nóri kurhaxaki ambe engaksïni xáni arhiparhatani jaka?”

¹⁴ Ka Jesusi méntku nómbe ma arhintaaspti, enga juramuti jamberi ísku pakarerapka eratsentani.

Jesusinksï uándikutarkorhesti

¹⁵ Ka k'uínchekuarhu, juramuti p'indespti k'atakatani ma jurajkutspeni néni engaksï uékapiringa.

¹⁶ Ka jiájkani ísï Barrabasi k'atakata jarhaspti, ima kánekua kurhakatespti.

¹⁷ Enga tángorhenhantapka, Pilatu kurhamarhpespti: “¿Néni jurajkua, Barrabasini o Jesusini engaksï Krístu arhijka?”

¹⁸ (Jimboka Pilatu mítetixapka eskaksï Jesusini epurhexapka, jimboksïsï intsïnharhitapti)

¹⁹ Ka enga Pilatu útatsperakuarhu uaxakatini jápka, témba uandakua axakuspti: “Ásï ambe ma úku inde kaxumbitini, jimbokani chúri indeni jimbo kánekua nósesi tsánharhiska.”

²⁰ Ka k'éri tátecha ka achamasïchaksï andajtsïtperaspti eskaksï Barrabasini jurajkutarkorhepiringa ka eskaksï Jesusini uándikupiringa.

²¹ Ka juramuti mókukuantaaspti: “¿Nénksïni jurajkuchea?” Ka imaksï “¡Barrabasini!” Uandaspti.

²² Ka Pilatu kurhamarheaspti: “¿Ka ambe úkua Jesusini engaksï Krístu arhijka?” Ka iámenduechaksï arhispti: “¡Cháparhatanhe!”

²³ Ka juramuti arhiaspti: “¿Andi ambe nósesi úski?” Ka imaksï sánderu uinhachasïrempti: “¡Cháparhatanhe!”

²⁴ Pilatu exerini eskaksï nóteru kurhajchasïrempkia, eska sánderu méntkisï uinhachanhasïrempka, itsï p'itajkorhespti ka k'uiripuni japarini jupajkuntaspti uandaparini: “Ji nómbe ma míteska íni achetiri uarhikuani jimbo, chári jimboestia.”

²⁵ Ka iámenduechaksï arhispti: “Inderi uarhikua jucha ka juchari sapichaksï arhiparhatanhe.”

²⁶ Ka Barrabasini jurajkukuaspti ka Jesusini atarkorhespti ka cháparhatarkorheni.

²⁷ Ka juramutiri p'urhejkutichaksï imecheri k'umanchekuarhu páspti, ka jimaksï uirhipkurhaspti.

²⁸ Xukuparhakuaksï p'ikusti ka takusï charhapiti máksï k'uáparhataspti;

²⁹ ka kanakua tsurhumueri máksï inchajtsïtaspti, ka pirimu máksï jurhijkandani inchajkurhataspti. Xásïksï tinguixurhikutini teresmarhusïrempti arhiparini: “¡K'éri ambe arhinhe judiuecheri irecha!”

³⁰ T'uárhesïremptiksï ka sîmba ma jimboksï uájtsïskani.

³¹ Xáni teresmarhutinksï p'ikuntaspti k'uáparhakuani ka imeri xukuparhakuaksï jatsikuntaspti ka pásptiksï cháparhatani.

Jesusi cháparhatanhasti

³² Uératintkuksï jima, kúmaspti acheti Sireni anapuni ma enga Simoni arhinhempka; ka Jesusiri krúsinksï uinhapetarhu páraspti.

³³ Engaksï niárapka jima enga Gólgota arhinhajka (enga uarhiri éjpu arhikuekajka),

³⁴ Kauikua jeuetakata uitsakua xúrakua jingunksï íntskuspti, ka Jesusi ts'émutintku no uékaspti arhani.

³⁵ Engaksï Jesusini cháparhatapka, p'urhejkutichaksï imeri xukuparhakuani ch'anaparini arhungurhispti.

³⁶ Ka jimaksï uaxandentaspti kuáni.

³⁷ Ka krúsirhuksï karakata ma chájtsïtaspti enga arhimpka: “Ísti Jesusi, judiuecheri irecha.”

³⁸ Ka ima jinguntuksï tsimani sïpajkurhechani cháparhataaspti, ma jurhijkandani ka máteru uikixkandani.

³⁹ Ka ima engaksï xáni jimesï nitamempka manajtsïskorhesïremptiksï arhimarheni

⁴⁰ ka arhisïremptiksï: “T'u engari k'éri tiósïoni xerentapiringa ka tanimu jurhiatekua jimbori úntani, engari sési jimbo Diósï uájpeka kuájpekorhe, ka krúsirhu kétsentsï.”

⁴¹ Ka k'éri tátecha ka ístu juramukua jurhentpiricha ka achamasïchajtuksï májkueni teresmarhusïrempti ka uandani:

⁴² “Máteruechani p'ímutantaasti ka kóru no úsïndi kuájpekorheni. Eka Israelicheri irecheka, krúsirhu kétsente ka jakajkukuakachi.

⁴³ Uandasïndi Diósïni mintsikani ka eskanha Diósï Uájpeska, eka Diósï xénhchajka kuájpentechka.”

⁴⁴ Ka sïpajkurhecha engaksï ima jinguni cháparhatanhapka májkuenksï útakusïrempti.

Jesusi uarhisti

⁴⁵ Teruxutini uénani ka téjkamatini jamberi parhakpeni iámu p'ajpakandespti.

⁴⁶ Téjkamatini ísï, Jesusi uinhachaspti: “Eli, Eli, ¿Lema sabaktani?” (Enga arhikuekajka: “Jucheti Diósï, jucheti Diósï ¿Andirinisï jandiojku jurajku?”).

⁴⁷ Ka máru engaksï jima jápka, ísï kurharinksï uandasïrempti: “I Eliasïni uandajpaxati.”

⁴⁸ Ka jimajku ma, uiriaspti xurhata ma p'íkuni ka kauikua xarhiperakatarhu inchamaspti, ka kupamurhu ma jórhukuspti ka íntskuspti.

⁴⁹ Ka máteruechaksï uandasïrempti: “Jurajku, ju je exeni nándika Eliasï juuaka kuájpentani.”

⁵⁰ Ka Jesusi ménderu uinhachaspti ka espirituni íntspentaspti.

⁵¹ Ka takusï k'uék'uetsasï enga tiósïo arhunhempka karutsanhespti; ka jenchespti ka tsakapuechaksï arhakurhispti.

⁵² Ka jima engaksï uarhiricha pénhantempka, mítakorhespti ka uánekuaksï pímbinhaxeticha tsíntaspti.

⁵³ Ka enga Jesusi tsíntapka uarhirichajtuksï tsíntaspti ka Jerusalenksï inchaakuntaspti ka uánekuaksï exeaspti.

⁵⁴ K'éri purhejkuti, enga jima kuáni jápka, jenchekuani p'ikuarheratini ka exerini ambe enga úkorhempka. Xáni chéni uandasïrempti: “¡Sési jimbo, Diósï Uájpespti!”

⁵⁵ Jimaksï jarhaspti uánekua uarhiticha iauani uératini eraani, engaksï Jesusini Galilea uératintki chúxapapka jarhuatapani.

⁵⁶ Ka Maria Magdalena ka Maria Jakobueri ka Joseri amamba ka Sebedeo témba, imani uarhiticha jingunksï jámaxapti.

Jesusi jatsinhantasti

⁵⁷ Enga churepkia, acheti jatsikorheri ma, Arimatea anapu ma enga Jose arhinhempka, ka enga Jesusiri jurhengorheripka.

⁵⁸ Pilatuni niraspti jirinhantani ka Jesusini kurhakuntaspti. Pilatu juramuspti eskaksï íntskuntapiringa.

⁵⁹ Ka Jose, Jesusini takusï t'upuki jásï ma irhirhitaspti,

⁶⁰ ka jimbanhe jatsintskuarhu ma péraspti, enga k'erendarhu jarhanharhitarkorhepka, ka k'énhari tsakapu ma jatsimutaspti ka níntaspti.

⁶¹ Maria Magdalena ka máteru Maria jimaksï jarhaspti uaxakatini.

P'urhejkutichaksï kuáxapti nani enga Jesusi pénhantapka

⁶² Pauandekuarhu sábaduespti, ka tátecheri urhejtsïkuricha ka fariseuechaksï Pilatuni jinguni tángorhentaspti

⁶³ ka arhisptiksï: “Tata, míjpaskachi eska ima chkuándira, tsípiti jámani jatini uandaspka: ‘Tanimu jurhiatekua jimbo tsíntaaka.’

⁶⁴ Axajpe, eska tanimu jurhia kuánhani janhaaka, ásïksï jurhengorheri jémbecha chúrekua pánte ka iretarhuksï arhijpeni: Tsíntasti ka sánderu k'éri ma chkuándirakua úkorheni.”

⁶⁵ Ka Pilatu arhiaspti: “P'urhejkutichaksï jimini jarhasti, ni je ka kuáni je eskajtsï na míteka.”

⁶⁶ Ka imaksï niraspti ka nani enga Jesusi pénhantapka sésiksï kuáxapti, tsakapu ma jingunksï sési mímutaspti ka kuárichanksï péraaspti.