San Mateo 24 - Diósïri Karakata P´urheepecha Jimbo

Jesusi uandantasti eska tiósïo xerenhantaaka

¹ Jesusi tiósïo uéntaspti ka enga níntani jápkia, jurhengorheri jémbechaksï andarheraspti, ka tiósïo anapu k'érati k'umanchekuechanksï exeraaspti.

² Ka Jesusi arhiaspti: “¿Exexakijtsï iámendu íni ambe? Sési jimboksïni arhixaka eska ixu nóma tsakapu tsïntsïkata pakaraaka.”

Na enga jánhaskorheaka enga parhakpeni k'amakurhini jámaakia

³ Enga Jesusi Olibusï juátarhu uaxakatini jápka, jurhengorheri jémbechaksï andarheraspti enga ima jandioterku jápkia ka arhisptiksï: “Arhijtsïni, ¿Na jatini úkorhea i ambe, ka ambe xarharaa jiájkani engari junguaka ka enga parhakpeni k'amakurhiaka?”

⁴ Ka Jesusi arhiantaaspti: “Jinguntku ja je, ásïksïni nema tandojche,

⁵ jimbokaksï uánekua jucheti jakangurhikua jimbo uandapuaka: ‘Jísïni Krístueka’ ka uánekuaksï tandosï úandauati.

⁶ Kurhauakajtsï eska uarhiperata ambe jarhaska ka eska uarhiperanhaaka, k'óru ásï jáma je chéni, jimboka k'uanisïnga eska ísï úkorheaka, ka nótki parhakpeni k'amakurhikuesti.

⁷ Iretechaksï uarhiperaati ka ístu juramukuecha, ka k'arhimakua ambe nitamanchanhaati ka uápuru isï jencheati.

⁸ K'óru uénakuajkuesti enga kómu nitamakorhenhaaka.”

⁹ “Jiájkantsï cha k'ataperakuarhu pánhaaka ka juramuticha jinguntsï pánhani, ka jíndeni jimbojtsï kuikirhenhaaka ka kurhunhenhantsï.

¹⁰ Uánekuajtsï imani jurhiatekua nóteru mintsikaati ka tandojchperaatiksï ka kurhunhperanksï.

¹¹ Uánekuaksï diósïri uandari eratakorhericha juuati ka uánekuaksï tandosï úauati.

¹² Ka jukari nósesi jánhaskorheati enga jimbo nóteru xénhchperanhaaka.

¹³ K'óru ima engarini k'amarhuni jamberi mintsikaaka, p'ímutannhantaati.

¹⁴ Ka ma parhakpeni arhijtsïkperanhaati i irechekueri jimbanhe aiangperakua, ka iámendu iretechaksï kurhauati ka jiájkaniuatia enga iámendu ambe k'amakurhiaka.”

¹⁵ “Ísï jimbo, na engajtsï jatini exeaka tiósïo pimbinhandu, diósï kua nósesi jásï ma péranhani, enga Diósïri uandari Danieli uandaka: ‘Ima enga arhintajka, kurhangue,’

¹⁶ ka ima engaksï Judea isï jámani jauaka, juátecharhuksï niue sïpakorheni.

¹⁷ Ima enga taiajtsïtakatarhu jauaka, ásï jáme kétsentani ambe petakorheni.

¹⁸ Ka ima enga tarhetarhu jámani jauaka, ásï k'uanhatsente chereparhakuani p'itsïkorhentani.

¹⁹ K'óru ¡Áke ima uarhiticha engaksï charhakuni erokorheni jauaka, ka ima uarhiticha engaksï ima jurhiatekuechani sapichani etsukua íntsaani jauaka!”

²⁰ “Kómarhijpekorhe je eskajtsï no sábadu sïpakorheni jámani jauaka, o jiájkani enga iéstani jarhajka.

²¹ Jimboka kánekua nósesi nitamanchakorhenhaaka enga nómeni xánhaskorhepka jiájkani uératini enga parhakpenika ka iásï jamberi, ka nóteru méni xánhaskorheati.

²² Engaksï ima jurhiatekuecha no sántku ióxeranhapiringa, nónema úpirindi uarhikuani uéjkuni: K'óru erakukatechani jimbo námuntku jurhiatekueuatiksï.”

²³ “Ekaksïni nema jiájkani arhiaka: Exe Krístu ixu jarhasti, o eraa aniani jarhasti, ásï jakajkuku je,

²⁴ jimbokaksï juuaka Krístu eratakorhericha ka diósïri uandari eratakorhericha, ka k'érati míndechanksï úauati, ka k'éri exekua ambe jimboksï tandosï újpeati, ka engaksï úska, erakukatechanksï jamberi tandosï úantauati.

²⁵ Arhispkaksïnia:

²⁶ Ísï jimbo ekaksïni nema arhiska: ‘Exe jima jarhasti enga nónema irekaka,’ óksïni arhini eska ani irekaska, ásï uéra je ka ásï jáma je jakajkuni.

²⁷ Jimboka ísï eska piritakua na iápuru isï eranchekorhejka, xánhaskorheati enga Acheti Uájpa junguaka.

²⁸ Nani uéjki enga uarhiri jántajka, k'uákichaksï jima tángorheati.”

Acheti Uájpa k'uanhatsentaati

²⁹ “Ka engaksï na nitamaakia ima jurhiatekuecha enga xáni nósesi jánhaskorheaka: ‘Tata jurhiata pájpakaxeati, ka nana kutsï nóteru merenharhiati, ka jóskuechaksï uekorhentaati, ka auandarhu anapu uinhapekuechaksï xamatanhaati.’

³⁰ Jiájkani Acheti Uájperi mínda auandarhu xarhancheati, ka iámendu iretechaksï parhakpeni anapuecha p'amondakorheati, engaksï Acheti uájpani exeaka xúmurhu ísï kánekua uinhapekua ka t'íntskua jinguni junguani jarhani.

³¹ Ima axauati imeri ánjelichani eskaksï uinhamu p'uninhaaka kústani, ka ánjelichaksï ma parhakpeni iámendu erakukatechani tánantauati.”

³² “Jígusïni exe je ka jurhengorhe je, enga tsikixkurhintatini jarhajka, jánhaskasïngajtsï eska emenda janonguani jarhasïngia.

³³ Májkueni, engajtsï cha iámendu íni ambe exeaka, mítetini ja je eska Acheti Uájpa janonguaxakaia.

³⁴ Sési jimboksïni arhixaka eskaksï iásï anapuecha irekani jauakateru enga i ambe úkorheaka.

³⁵ Auanda ka echeri úatiksï k'amakurhini, k'óru jucheti uandakuechaksï nómeni k'amakurhiati.”

³⁶ “K'óru nónema mítesti ambe jurhia ka na jandu, níksï auandarhu anapu ánjelicha míte, jucheti Tátejkusï míteti.”

³⁷ “Jiájkani enga Acheti uájpa junguaka, xánhaskorhesti eska imani jurhiatekuechani enga Noépka.

³⁸ Jimboka jiájkani enga nótki iurhentpempka, t'irenhaxapka ka kauinhani jarhani ka tembuchanhani ka tembuchatperanhani janhani, enga jamberi Noe k'éri icharhutarhu jatapka.

³⁹ Ka nóksï jánhaskaspti eka jamberi iurhentpepka ka iámu uarhimenhaspti. Xánhaskorheati enga Acheti uájpa k'uanhatsentaaka.

⁴⁰ Engaksï tsimani juátarhu jámani jauaka: Ma p'íkunhaati ka máteru jurajkunhani.

⁴¹ Tsimani uarhitichaksï urhuni jauati, ma p'íkunhaati ka máteru jima jurajkunhani.”

⁴² “Jinguntku ja je jimbokajtsï no míteska chári Táte na jándu junguaa.

⁴³ Ka íni ambe mítetini ja je, eka tata ma enga k'umanchekuani jatsikorheka mítepiringa ambe jándusï inchantspiri niáraa, jinguntku japirindi ka no jurajkupirindi inchani.

⁴⁴ Ísï jimbo chájtu jingutku ja je, jimboka Acheti Uájpa ima jándu junguaka engajtsï cha méntku no erontani jauaka.”

Jántspiri mintsinharhikua ka jántspiri enga no mintsinharhikueka

⁴⁵ “¿Nákiski ima jántspiri mintsinharhikua ka míakua jukari, enga imeri ánchetpiri arhijka eska imecho anapuechani exeani jauaka ka eska t'irerauaka na enga jándu t'irekuejka?

⁴⁶ Tsípe ima jántspiri enga ánchetpiri jémba niántaaka, ka jántspirini xéntani úni jarhani ambe enga úraka.

⁴⁷ Sési jimboksïni arhixaka eska ima tata enga k'umanchekuani jatsikorheka, iámu imeri jatsikorhekuani imani patsaraaka.

⁴⁸ K'óru eka jántspiri no ambakeaka ka jandiojku jatini uandakorheni, ixu ióndaati janonguanhani,

⁴⁹ ka uénani máteru jántspirichani ataani káani ka jukari t'ireni ka kauichechani jinguni kauini.

⁵⁰ Ima jurhiatekua enga ima méntku no sáni eranhaskani jaka niánhantaati,

⁵¹ ka nósesi kámaati, ka no kurhandirechani jinguni kundaati; jimasï ueraati ka sînichani kirisïmeantaani.”