San Mateo 21 - Diósïri Karakata P´urheepecha Jimbo

Jesusi Jerusaleni inchaakuntasti

¹ Engaksï Jerusaleni andaparhakuerani jápka, Betfageksï niáraspti ka Olibusï juátarhuksï anhaxurhispti, ka Jesusi jima uératini tsimani jurhengorheri jémbechani axaaspti,

² ka arhiaspti: “Ni je amani ireta sapichurhu enga eraakorheni jaka, ka iretarhu inchaakutintsï, ch'anchaki kutsïni ma, ch'anchaki sapichu ma jinguni exentaaka, jotakataksï jarhani, kuerataa je ka juáchejtsïni je.

³ Ka engaksïni nema ambe arhiaka, chájtsï arhiaka: ‘Tata uétarhenchaaxati ka sóntkukini juángucheauati.’ ”

⁴ I ambe úkorhesti enga Diósïri uandari uandaka:

⁵ “Sióni uájpechani arhia je: Chéti Irecha junguaxati, kaxumbekua jinguni ka ch'anchakini ma jatarini, ch'anchaki sapichuni ma jatarini”

⁶ Jesusiri jurhengorherichaksï niraspti ka úsptiksï ambe engaksï juramumenhapka.

⁷ Pásptiksï ch'anchaki kutsïni ka ch'anchaki sapichuni ka imecheri sunundaksï tatsuparhakuspti ka Jesusi jataspti.

⁸ Uánekuaksï xanharu sununda tatsuntskakusïrempti, ka máteruksï pímu ch'auaxkusïrempti ka xanharuksï tatsuntskasïrempti.

⁹ Ka ima engaksï chúxapani jápka ka urhekupanksï jarhani uinhachasïremptiksï: “¡Dabi Uájpa, kuájpejtsïni! ¡Ujchakurakateskari t'u engari Acha jimbo jurhani jaka! ¡K'éri Acha Diósï, kuájpejtsïni!”

¹⁰ Ka enga Jesusi Jerusaleni inchaakupka, iretarhu méntku mámaru ambe uandanhasïrempti: “¿Néski i?”

¹¹ Ka engaksï Jesusi jinguni nirani jápka uandasïremptiksï: “Jesusisti, Diósïri uandari Nasareti anapu enga Galilea jaka.”

Jesusi tiósïo ambe atarantstichani petantaasti

¹² Jesusi tiósïo inchaspti ka ambe atarantstichani ka ambe piárichani petantaaspti, ka tumina mójtakutspiricheri kéjpatarakua ambe menonhakuaspti, ka ístu palomasï atarantstichani kéjpatarakuani k'uanikukuaspti,

¹³ ka arhiaspti: “Karaka jarhasti: Jucheti k'umanchekua kómarhijperatarakuesti ka chájtsï sïpajkurhecheri irekua úntaskia.”

¹⁴ Ka tiósïo Jesusini pátenharhichaksï ka rengejtechaksï andarheraspti ka ima ambakerantaaspti.

¹⁵ Ka tátecheri urhejtsïkurichaksï ka juramukua jurhentpirichaksï ikiaspti exerini xáni k'éri ambe enga Jesusi úempka, ka ístu tumbi sapirhatichantuksï ikiakuaspti engaksï tiósïo uinhachani jápka: “¡Kuájpejtsïni Dabi Uájpa!”

¹⁶ Ka Jesusinksï arhispti: “¿Kurhajchaaxakiri ambe engaksï uandani jaka?” Ka Jesusi arhiantaaspti: “Jo. ¿Andi nójtsï méni arhintaski? ‘Sapicha engaksï etsukua arhani jakateru, amboantastiksïni pirecheni’ ”

¹⁷ Ka kéndikukuaspti ka iretarhu uéakuntaspti ka Betania niraspti ka jima pakaraspti.

Jesusi jígusïni xukajchasti

¹⁸ Xarhentku, Jerusaleni k'uanhatsentani jámani, Jesusi karhimaxapti.

¹⁹ Ka xanhari jimbo jígusïri anhatapuni ma exespti, ka andarheraspti ka nómbema erarhutaspti, chkúrhichantku erarhutaaspti ka anhatapuni arhispti: “¡Méntku ásteru méni amanhejchakua juka!” Ka ima jígusï jimajku k'arhispti.

²⁰ Íni ambe exerini, jurhengorheri jémbechaksï uandasïrempti: “¿Néna jimbosï jígusï xáni sóntku k'arhipa?”

²¹ Ka Jesusi arhiantaaspti: “Sési jimboksïni arhixaka, ekajtsï mintsikaska ka nójtsï tsimantsimaneani, jígusïntsï no xántku ambe úkupiringa, úakajtsï jamberi andeni juátani arhini: ‘¡Mótse ka japundarhu niára!’ Arhini, ka ísï úkorheati.

²² Ka intsïnhajkajtsï ambe engajtsï kurhajkorheaka kómarhijpeparini ka mintsikaparini.”

Jesusi jarhamekua jatsisti

²³ Enga Jesusi tiósïo niárapka ka enga jurhentpeni jápka, tátecheri urhejtsïkurichaksï ka achamasï iretarhu anapuechaksï kurhamarhespti: “¿Náki juramukua jimbori íni ambe úxaki? ¿Nékini sésekua íntskuski?”

²⁴ Ka Jesusi arhiantaaspti: “Jíjtuksïni ma ambe kurhamarheaka, ka ekajtsïni mókucheska jíjtuksïni arhiaka náki juramukua jimbosïni íni ambe úni jaki.

²⁵ ¿Juánueri itsï atajtsïkua nani anapueski? ¿Auandarhu anapueski o parhakpeni anapueski?” Imaksï jimajku mámaru ambe arhijperaspti ka uandasptiksï: “Ekaksï arhiska eska auandarhu anapueska, indejtsïni arhiati: ‘¿Ka andijtsïsï no jakajkukupkia?’

²⁶ Ka chékorhesti arhini eska parhakpeni anapueska, jimboka Juánu Diósïri uandari exenhasïnga.”

²⁷ Tátsekuaksï Jesusini mókukuntaspti: “Nóchi míteska.” Ka Jesusijtu arhiaspti: “Jíjtuksïni no arhiaka néri juramukua jimbosïni íni ambe úni jaki.”

Tsimani tumbicheri uandantskua

²⁸ Ka Jesusi kurhamarheaspti: “¿Nájtsï eranguntasïnki? Acheti ma tsimani uájpechani káasïrempti ka k'érini arhispti: ‘Jucheti uátsï, ni sáni jucheti úbasïrhu ánchekorheni.’

²⁹ Ka ima mókukorhespti: ‘¡No niuaka!’ Ka xásï míantaspti ka niraspti.

³⁰ Ka sapichuntu májkueni arhispti ka ima arhintaspti: ‘Ia táte, niuakia.’ Ka no niraspti.

³¹ ¿Náki úski ambe enga tátjemba uékani jápka?” Ka imaksï arhispti eska k'éri. Ka Jesusi arhiaspti: “Sési jimboksïni arhixaka, eskaksïni urhechepaaka inchani Diósïri auandarhu anapu irechekuarhu; tumina tánaticha ka uarhiti ísku jándicha.

³² Jimbokaksïni Juánu janocheska jurhendakuekanksïni eskamendu Diósï na uéjka, ka nójtsï jakajkukuska, ka tumina tánaticha ka uarhiti ísku jándichaksï k'óru jakajkukusti. Ka cha, nájkirukajtsï exeka nójtsï móantaska ka nójtsï úska jakajkukuni.”

Tarheri no ambarhaticheri uandantskua

³³ “Máteru uandantskua kurha je: Jarhaspti acheti ma enga úbasï jatsikupka, ka sési uatsotaspti ka kuáritarakua iótati ma úspti, ka tátsekua echerini tarherichani máru kuánetaaspti ka iauani ísï niraspti.

³⁴ Ka p'ikuntskuarhu, jántspiri jémbechani máru axakuaspti tarherichani, engaksï p'ikuntskatani pákuntapiringa.

³⁵ Ka tarherichaksï nósesi káaspti, ma echakuanksï ataspti ka máterunksï uándikuni ka máterunksï tsakapkueraspti.

³⁶ Ka ménderu, ima enga echerini kángorhempka, máteru sánderu uánekua jántspichani axaaspti, ka imechantuksï májkueni káaspti.

³⁷ Ka tátsekua uájpani axaspti ísï eratseparini: Indentsïni janhanharhicheati.

³⁸ Ka tarherichaksï uájpani exerini arhijperaspti: I jurajkumenhaati echerini, ju je uándikuni ka inderi echerinchi jucha pakataaka.

³⁹ Ka jupikasptiksï ka petaatantanksï ka uándikusptiksï.

⁴⁰ ¿Ambe úkuaua acheti enga úbasï jatsika jiájkani enga niántaaka?”

⁴¹ Ka arhisptiksï: “No p'amojkuauati ka no ambarhati k'uiripuechani uándikuauati, ka echeri úbasï jatsikatani máteru tarherichani kuánetauati engaksï p'ikuntskuarhu andakua íntskuntaaka.”

⁴² Jesusi kurhamarheaspti: “¿Andi nójtsï méni arhintaski karakatani enga arhijka? ‘Tsakapuni, engaksï k'umanchekua úricha no jaiapanhentaka, iásï ts'umbindikuestiia. Achasï íni ambe úti ka ískuchi pakareratixaka exeni.’”

⁴³ “Ísï jimboksïnisï arhini jaka, eskajtsï cha Diósïri auandarhu anapu irechekuani euanhantaaka, ka imaksï intsïnhaati engaksï sési ambe újka.

⁴⁴ Ka ima enga tsakapurhu kuarhatseaka, úndurhikorheatiksï. Ka eka i tsakapu nemani jatajchakuska puchandurhiati.”

⁴⁵ Tátecheri urhejtsïkuricha ka fariseuecha uandantskuechani kurharini, jánhaskasptiksï eskaksï imasï arhinhani jápka.

⁴⁶ Ka uékasptiksï Jesuni jupikani, ka nóksï úspti jimbokaksï iretani chérhespka jimbokaksï Jesusini Diósïri uandarini exesïrempka.