San Mateo 20 - Diósïri Karakata P´urheepecha Jimbo

Ánchetpiri enga sési maiampejka

¹ “Auandarhu anapu irechekua, xáxesti eska achamasï enga echerini ma kángorhejka enga úba jukaka, ka tsípku uérasti ánchekorherichani jirinhaani engaksï jima ánchekorhepiringa enga úba jukaka.

² Ka pakatperasptiksï eska xáni maiamuapiringa eska ma jurhiatekua na andanhajka, ka axaspti ánchekorheni jima enga úba jukaka.

³ Ka ménderu sáni ióndakuarhu uérasti, ka kópekuarhu exeaspti máru engaksï ísku jápka,

⁴ ka arhiaspti: ‘Ni je chájtu ánchekorheni ka jíksïni maiamuaka na enga xántku sésku jauaka.’ Ka imaksï niraspti.

⁵ Ka ménderu teruxutini uéraspti, ka téjkamatiru isï ménderu, ka májkueni úspti.

⁶ Ka inchatirujtu máteru exeantaaspti engaksï ísku jámani jápka ka arhiaspti: ‘¿Andijtsïsï ísku chúskuta?’

⁷ Ka imaksï arhintaspti: ‘Jimbokajtsïni nónema ánchetaska.’ Ka ima arhiaspti: ‘Ni je chájtu ánchekorheni ka maiamuakaksïni na enga xáni sésku jauaka.’”

⁸ “Chúrekua, ima tata enga ánchekorherichani káani jápka, arhispti imani enga ánchekorherichani urhekuani jápka: ‘Imechani urheta uandajpaa ka maiamua engaksï inchatiru inchaakuka, ka xásïri imani maiamuauaka engaksï tsípku ichaakuka.’

⁹ Ka andarherasptiksï ima engaksï inchatiru ichaakupka ka mándani arhinksï ma jurhiatekueri maiamunhaspti.

¹⁰ Ka niáranchasptiksï ima engaksï tsípku uénapka ánchekorheni, eratseparinksï eskaksï sánderu kánhachani p'ipiringa, k'óruksï imajtu ma jurhiatekuerijku maiamunhaspti.

¹¹ Engaksï maiamunhapka, imani achetini engaksï ánchekorhekuni jápka mámaru ambeksï uandatsespti,

¹² ka arhisptiksï: ‘Ima engaksï iásï sáni janoka nóksï ióni ánchekorhesti, ka májkueniri maiamuaska eskajtsïni juchantsïni engachi xáni tsándu chúskutaka ánchekorheni.’

¹³ Ka ima acheti ima ma ísïni mókukuspti: ‘Pámpiri, nómbemakini nósesi ambe úchexaka. ¿Andi nóchi pakatperaspki eskaksïni xántku maiamupiringa eska ma jurhiatekua na andanhajka?

¹⁴ P'i na enga xáni chétika ka janharia níntani. Ji maiamuauaka imani engaksï iásï sáni janoka eskakini t'úngeni náxani maiamuka.

¹⁵ ¿Andi ji no sésekua jatsiski jucheti tuminani úrani, ambe engani ji uékaaka úrani? ¿Órini epurhexaki engani ji jarhojpeni jaka?’

¹⁶ Ísï jimbo, engaksï iásï urhetika, xásïksï tátsepani péranhaati ka engaksï tátsepani jaka, xásïksï urhetiuati, jimbokaksï uánekua ióarhinhaska ka namuntkuksïsï erakukateti.”

Jesusi ménderu uandanukukorhesti

¹⁷ Enga Jesusi Jerusaleni karhamani jápka, xanhari jimbo jurhengorheri jémbechani támu páaspti ka arhiaspti:

¹⁸ “Iásïchi Jerusaleni karhamaxaka, Acheti Uájpanksï k'éri tátechani ka juramukua jurhentpirichani intsïnharhitaati, ka imaksï uándikutarkorheati,

¹⁹ ka uérakua anapuechanksï intsïnharhitaati ka imaksï teresmarhuati ka k'uikirheatiksï ka cháparhataatiksï; k'óru ima tanimu jurhiatekua jimbo tsíntaati.”

Auandarhu Táte juramusïndi

²⁰ Jesusini andarheraspti Sebedeo temba uájpecha jinguni, ka t'inguixurhikutini ma ambe kurhakuspti.

²¹ Ka Jesusi arhispti: “¿Amberisï uéjki?” Ka uarhiti arhintaspti: “Ekari t'u chéti irechekuarhu jauakia, juramu eskaksïni jucheti uátsïticha, ma jurhijkandani ka máteru uikixkandani uaxakachetini jauaka.”

²² Ka Jesusi arhiantaaspti: “Nójtsï míteska ambe engajtsï kurhajkorheni jaka. ¿Andi itsïmajtsï imani engani ji itsïmaaka? ¿Andi itsï atajtsïkunhajtsï imani jimbo engani ji itsï atajtsïkunhaaka?” Imaksï arhintaspti: “Jo, jucha úaka.”

²³ Ka Jesusi arhiaspti: “Sési jimbo imani engani ji itsïmaaka, chájtujtsï itsïmaaka, ka imani jimbo engani ji itsï atajtsïaka, chájtujtsï itsï atajtsïkunhaaka, k'óru no jucheti jimbo jarhasti jucheti jurhijkandani o uikixkandanksïni uaxastani, jimboka imaksï jima uaxastanhaaka enga jucheti Táte eratsekata jatsiaka.”

²⁴ Máteruksï témbeni jurhengorhericha kurhajchaatini erachichanksï ikiakuaspti.

²⁵ Ka Jesusi uandajpaaspti ka arhiaaspti: “Mítetixakajtsï eskaksï juramuti no jakajkuticha uinhamarhetspesïnga juramuni, ka eskaksï k'érati achecha úinhamarhetspesïnga juramuni.

²⁶ Ka chánksïni jinguni no ísïuati, ima enga k'éri ambenhchajka, marhuacheksïni,

²⁷ ka ima enga urhetinhchajka, jatsistiksïni marhuacheni;

²⁸ ísï eska Acheti Uájpa na juka marhuatspeni, ka uánekuechani jimbo imeri tsípekua íntspeni ka no jurhasti eska marhuamenhaaka.”

Jesusi tsimani pátenharhichani ambakerantaasti

²⁹ Engaksï Jeriko uéakuntapka, uánekuaksï chúxapaxapti.

³⁰ Ka tsimani pátenharhichaksï engaksï xanharu uaxarupka, Jesusinksï kurharini enga jimesï nitamani jápka uandasptiksï: “¡Tata, Dabi Uájpa, p'amojkujtsïni!”

³¹ Ka xukaasïremptiksï nónaksï pínasku jatsiani, k'óruksï ima sánderu uinhachaspti: “¡Tata, Dabi Uájpa p'amojkujtsïni!”

³² Jesusi anhaxurhispti ka uandajpaaspti ka arhiaspti: “¿Ambejtsïsï uéjki eskaksïni úcheaka?”

³³ Imaksï uandaspti: “Tata, uékasïngachi exeni.”

³⁴ Jesusi p'amojkuaspti, p'ánharhikuaspti ka imaksï úspti exeni ka chúxapasptiksï.