San Mateo 2 - Diósïri Karakata P´urheepecha Jimbo

Mímixeticheri p'urhemperakua

¹ Enga Jesusi andajpenupka Beleni enga Judea jaka, imani jurhiatekuechani isï enga irecha Erodesi juramuni jápka. Jerusalenksï niáraspti máru jóskuecheri mímixeticha, tata jurhiata andarakuarhu uératini

² kurhangorheparinksï: –¿Nani jarhaski ima enga andajpenuka ima enga judiuechani irechekuauaka? Jucha imeri jóskuani tata jurhiata andarakuarhu exeska ka k'éri ambeksï arhini jurhaska.

³ Íni ambe irecha Erodesi kurharini ka Jerusaleni anapuechaksï uandanheaspti.

⁴ Ka tánantaaspti iámendu tátecheri urhejtsïkurichani ka juramukua jurhentpirichani ka iretarhu anapuechani ka kurhamarheaspti: –¿Krístu nanisï andajpenupirinki?

⁵ Ka imaksï arhispti: –Beleni enga Judea jaka, jimboka Diósïri uandari ísï karaska:

⁶ “Ka t'u Beleni engari Judea jaka, nóri sánderu sapichueska. Judea anapu k'érati iretecha jinguni, jimboka juramuti ma jimini uéraaka, enga Israeli jucheti iretani urhekupaaka.”

⁷ Jiájkani Erodesi jóskuecheri mímixetichani sïpatekuarhku ióarhiaspti ka sési kurhambeantaaspti na enga jatini ima jóskua xarharapka.

⁸ Ka Beleni axaani jámani arhiaspti: –Ni je jini ka sési kurhangorhe je charhakueri ambe ka engajtsï exentaakia jújtsïni je aianguni, ka jíjtuni niuaka k'éri ambe arhini.

⁹ Mímixetichaksï irechani kurhajchatini niraspti, ka jóskua engaksï tata jurhiata andarakuarhu exepka urhekupaaxapti ka jima anhaxurhispti nani enga charhaku jápka.

¹⁰ Mímixetichaksï jóskuani exerini, kánekuaksï tsípespti ka sésiksï p'ikuarheraspti.

¹¹ K'umanchekuarhuksï incharini charhakuni xéntaspti, Maria imeri amamba jinguni, ka tinguixurhikutinksï k'éri ambe arhispti. Tátsekuaksï mítaaspti intsïmperakua jatakuechani ka tiripiti ka tióxunhanda ka p'untsumekuaksï íntskuspti.

¹² Ka tsánharhitanhasptiksï ka ístuksï aiangunhanksï eskaksï no k'uanhatsentapiringa jima enga Erodesi jápka, ka máteru xanhari jimboksï níntaspti.

Ejiptuksï sïpakorhesti

¹³ Engaksï jóskueri mímixeticha níntapkia, Acheri ánjeli ma Joseni tsánharhikuarhu xarhakuspti ka arhispti: “Jauara ka jauata charhakuni ka amambani ka Ejiptu ni sïpakorheni. Jima ja, na engakini jatini jamberi ji arhiaka, jimboka Erodesi charhakuni jirinhantaaka jimboka uándikuni uéksïnga.”

¹⁴ Jose tsínharhispti ka jauataspti charhakuni ka amambani ka Ejiptuksï niraspti sïpakorheni,

¹⁵ ka jimaksï irekorhespti enga jamberi Erodesi uarhipka ka ísï úkorhesti enga Acha imeri uandari jimbo uandaka: “Ejiptu uératini uandajpaska jucheti uátsïtini.”

Erodesi sapichani uándikutarkorheasti

¹⁶ Enga Erodesi mítepka eskaksï jóskuecheri mímixeticha tandosï úntaspka, kánekua ikiaspti ka uándikutarkorheaspti iámendu sapichani, engaksï tsimani uéxurhini jatiripka Beleni ka jimajku isï anapuechani, jimbokaksï jóskuecheri mímixeticha jánhastaspka na enga jatini uénapka ima jóskua xarharani.

¹⁷ Jiájkani úkorhesti ima enga Diósïri uandari Jeremiasï uandapka:

¹⁸ “Rama jiuakorhenhaxati, jurajkutakorhenhantani janhani uenhani ka k'arhangunhantani; Rakelisti enga uájpechani uekuajka; ka no uékasïndi eska sési arhinhantaaka jimbokaksï uájpecha uarhirixapkia.”

Ejiptu uératini k'uanhatsentskua

¹⁹ Ka enga Erodesi uarhipka, Acheri ánjeli ma Joseni Ejiptu tsánharhikuarhu xarhakuspti,

²⁰ ka arhispti: “Jauara, tataka sapichuni ka amambani Israeli pántsï, jimbokaksï uarhiskia ima engaksï tataka sapichuni uándikuni uékempka.”

²¹ Ka Jose jauaraspti ka tataka sapichu ka amamba jingunksï Israeli k'uanhatsentaspti.

²² Ka enga kurhajchpepka eska Arkelao Judea juramuxapka, jima enga tátjemba Erodesi juramuni jápka, chéspti jima niárani. Ka tsánharhikua jimbo aiangukata Galilea isï niraspti,

²³ ka Nasareti niraspti irekani, ka ísï úkorhesti ima engaksï Diósïri uandaricha uandapka eska Nasareti anapu arhinhapiringa.