San Mateo 18 - Diósïri Karakata P´urheepecha Jimbo

ARHIJTSÏKPERATA MÁRKU IREKUERI ¿Ne sánderu k'ériski?

¹ Imani jurhiatekua jimbojtu jurhengorherichaksï Jesusini andarheraspti ka kurhamarhesptiksï: “¿Ne sánderu k'ériski auandarhu anapu irechekuarhu?”

² Ka Jesusi sapini ma uandajpaspti ka terujkani péraspti,

³ ka uandaspti: “Sési jimboksïni arhixaka, ekajtsï cha no sapini jáxentaska, nójtsï inchaaka auandarhu anapu irechekuarhu.

⁴ Ima enga kétsekua uérka ka ísï jámani eska i sapi na jámka. Imasï auandarhu anapu irechekuarhu sánderu k'ériti.

⁵ Ka ima enga jucheti jakangurhikua jimbo sapini ma sési erokaaka, jíndenirini sési erokaxati.”

Na enga xáni nósesika k'amanharhintani

⁶ “Ne uéjki enga sapini ma terungutaaka engarini jíndeni mintsikani jaka, sánderu sésiuati eska japundarhu k'uinimanhaaka tsakapu urhuratarakua ma jójchakukata.

⁷ ¡Áke, parhakpeni anapu terungutpekua ambe! Japusti, k'óru. ¡Jarhonheni, ne enga máteruni terungutaaka!

⁸ Ísï jimbo, ekakini jájki o jantsiri terungutaraska, kachujku o kachundu ka k'uaniku, sánderu sésiuati eskari tsípekuarhu tokojtatini o tokojkutini inchaaka, ka nóri chpírirhu k'uanipanhani jima enga nómeni pójpejka.

⁹ Ka ekakini éskua terungutaraska, p'itanharhi, sánderu sésiuati eskari tsípekuarhu ma éskua jinguntku inchaaka, ka nóri tsimani jukarini chpírirhu k'uanijpanhani.”

Karichi kuátakateri uandantskua

¹⁰ “Exe je, ásï jáma je sapirhatichani támu péraani, jimbokaksïni sési jimbo arhixaka eskaksï ánjeli jémbecha, jucheti Táteni auandarhu anapuni erateni jarhasïnga.

¹¹ [Jimboka Acheti Uájpa tsînchetichanisï juka p'ímutantaani.]”

¹² “¿Nájtsï exesïnki? Eka nema iúmu ekuatse karichichani káajka ka ma ísï kuátani, ¿Andi no juátarhu jurajkuasïnki t'ámu ekuatse ka témbeni iúmu t'ámu karichichani? ¿Andi no nirasïnki imani jirinhanti enga kuátaka?

¹³ Ka enga exentajka, sési jimboksïni arhixaka eska kánekua tsípeaka imani karichini jimbo, eska máteru karichichani jimbo enga no kuátaaka.

¹⁴ Májkuentu, chári Táte enga auandarhu jaka, no uékasïndi eska i sapi ma tsîncheaka.”

K'uanisïndi erachini púakuntani

¹⁵ “Ekakini chéti erachi ma nósesi ambe úcheska, uandaxeku engajtsï jandiochani jámani jauaka, ekakini kurhajchaska májkujtsï úkorhentaskia.

¹⁶ Ka ekakini no kurhajchaska, pájta nemani o pájtaa máru, ka imaksïni kurhajchakorheati ambe engajtsï cha xáni uandaaka.

¹⁷ Ka eka imechantu no kurhajchaaska, tángorhekuarhu uandantsï, ka enga tángorhekuani no kurhajchaska, ísïri exeaka eska no jakajkutiska o eskaksï ima engaksï Róma anapu tumina tánajka.”

¹⁸ “Sési jimboksïni arhixaka eska ambe engajtsï parhakpeni k'ataaka, auandarhujtu k'atakata pakaraati, ka engajtsï xáni parhakpeni kuerantaaka; auandarhujtu kuerantskata pakaraati.”

¹⁹ “Sési jimboksïni arhixaka, ekajtsï nema jinguni íni parhakpeni terukutaaka uandamukukorheparini ambe kurhajkorheni, jucheti Táteksïni íntskuati enga auandarhu jaka.

²⁰ Jimboka jima engaksï tsimani o tanimu tángorhentatini jauaka jucheti jakangurhikua jimbo, jíjtu jima jauaka.”

²¹ Ka Pédru andarheraspti Jesusini ka arhispti: “Tata, ¿Namuni xanhari púakunta jucheti erachini engarini nósesi ambe úcheaka? ¿Iúmu tsimani xanhari jamberi?”

²² Ka Jesusi arhispti: “Nókini arhixaka iúmu tsimani xanharku, tanimu ekuatse témbeni uéntani iúmu tsimani xanharirisï púakuntaaka.”

Jántspiri ma enga no úekaka tekaantani

²³ “Ísï jimbo, auandarhu anapu irechekua xáxesti, eska irecha enga imeri jántspirichani kántsperata miiukuantaapka.

²⁴ Eka uénapka miiuntani, pásptiksï ma enga témbeni milloni kánguempka.

²⁵ Ka jimboka ima jántspiri no játsispka néna maiamuntani, irecha juramuspti eskaksï jántspirini atarantapiringa temba ka uájpecha jinguni ka imani ambe enga xáni kángorhempka, ka ísï kántsperatani k'uerajchatarani.

²⁶ Ka jántspiri irechani tinguixurhikutini kómarhisïrempti: ‘Tata, tekaachentsïrini sánderku, jíkini maiamuntaaka.’

²⁷ Ka irecha p'amojkuspti, jurajkuspti ka nómbe ma euantaspti.

²⁸ Ka jántspiri irecho uéntatini, exentaspti pámpiri jémbani ma enga iúmu ekuatse taiakata kánguempka, ka mápchakuspti arhini: ‘Juángia tuminani.’

²⁹ Pámpiri jémba tinguindukutini kómarhisïrempti: ‘Tekaachentsïrini sánderkia, jíkini maiamuntaaka.’

³⁰ K'óru ima méntku no uékaspti ka ónhatarkorhespti, ka no petarkorheni eka no urheta iámu maiamuntapiringa.

³¹ Máteru pámpirichaksï exerini ambe enga xáni úkorhepka, kánekuaksï kómu p'ikuarheraspti, ka irechanksï iámu ambe niraspti aianguntani.

³² Ka irecha jántspirini p'itajkorhespti ka arhispti: ‘Xáni engari nóambakeka, nókini euantaska eskarini xáni káncheni jápka jimbokarini t'u kómarhintaspka.

³³ T'újturi chéti pámpirini p'amojkupiringa ísï eskani ji na p'amojkuka.’

³⁴ Ka irecha ikiatintku juramuspti eskaksï no jurajkuntapiringa k'uikirheni, eka jamberi iámu maiampentapiringa.”

³⁵ Ka Jesusi útasï uandasptiteru: “Májkuenksïni kántaati mándani arhini jucheti Táte enga auandarhu jaka, ekajtsï cha mintsita jinguni chári erachini no púakuantaska.”