San Mateo 15 - Diósïri Karakata P´urheepecha Jimbo

Ambe enga ikichakua jájpejka

¹ Máruksï juramukua jurhentpiricha ka fariseuecha engaksï Jerusaleni uératini niárapka, Jesusinksï andarheraspti ka arhisptiksï:

² “¿Andiksïsï chéti jurhengorhericha p'indekuechani no janhanharhijki engajtsïni tua anapuecha jurajkucheka? Nóksï jupajkusïndi t'ireni jámani.”

³ Ka Jesusi arhiantaaspti: “¿Chájtu andisï chári p'indekuechani jimbo no janhanharhijki Diósïri juramukuani?

⁴ Enga Diósï arhistatspejka: ‘Janhanharhiakari táteni ka nándeni’ ka ‘Ima enga tátjembani o amambani útakuaka uándikunhaati.’

⁵ Ka chájtsï uandasïnga: ‘Ima enga tátjembani o amambani arhiaka; nókini úaka jarhuatani jimbokani Diósïni míndakorhetixaka,

⁶ tátjembani ka amambani nóteru jarhuataatia.’ Ísïjtsï chári p'indekuechani jimbo, Diósïri juramukuantsï támu péraxaka.

⁷ Ískujtsï ísï uandasïnga, sési jimbosï chári ambe Isaiasi Diósïri uandari ísï uandapti:

⁸ ‘I iretarini uandakua jimbojkusï k'éri ambe arhijti, mintsitarhu máteru ambe eratsexati,

⁹ ískujtsïnisï k'éri ambe arhini jati, k'uiripueri juramukuechani arhijtsïkpeaparini.’ ”

¹⁰ Tátsekua Jesusi ióarhijpespti ka uandaspti: “Kurha je ka kurhanguntsï je:

¹¹ Akua ambe no ikichakueni jájpesïndi, k'óru ambe enga uénhenhajka inde ambesï ikichakueni jájkpejti.”

¹² Ka jurhengorheri jémbechaksï Jesusini andarhentaspti ka arhisptiksï: “¿Exeskiri eskaksï fariseuecha ikiaska indeni jimbo engari uandaka?”

¹³ Ka Jesusi arhiantaaspti: “Anhatapu enga no jucheti Táte auandarhu anapu tsikirika, muruskunhaati.

¹⁴ Jurajku je; nóksï exesïndi ka pátenharhichanksï urhekupaasïndi, ka enga pátenharhi ma máteru pátenharhini urhekupaaka, tsimarhenksï nani uekanheati.”

¹⁵ Ka Pédru arhintaspti: “Jánhastajtsïni íni uandantskuani.”

¹⁶ Ka Jesusi arhiaspti: “¿Andi chájtu nótki úsïnki kurhanguni?

¹⁷ ¿Nójtsï kurhangusïnki eska akua ambe sïturhirhu niárasïnga ka eska tátsekua ísku únhantasïnga?

¹⁸ Ka ambe enga uémuskorhenhajka mintsitarhu uénhenhasïndi, ka inde ambe ikichakueni jájpesïndi,

¹⁹ jimboka nósesi járhati eratsekuecha, uándikperakua ambe, mintsitarhu uénhenhasïnga, ka ísku jándikua ka no k'uratsekua jukakua, ka sïpajkurhakua, ka chkuándirakua, ka arhinhchpenhchakua ambe.

²⁰ Inde ambeksïsï ikichakueni jájpejti, ka no engajtsï no jupajkutini t'ireaka.”

Uarhiti Kananea anapu ma Jesusini mintsikasti

²¹ Jima uératini Jesusi Tíro ka Sidoni isï niraspti.

²² Ka uarhiti Kananea isï anapu ma, uinhachaparini andarheraspti ka Jesusini arhispti: “¡Tata, Dabidi Uájpa, p'amojkurini! Jucheti uátsïtini nóambakiti ma kánekua nósesi kántaxati.”

²³ Ka Jesusi nómbe ma arhintaspti. Ka jurhengorhe jémbechaksï Jesusi arhisïrempti: “Chúntsï, méntkujtsïni uinhachachepaxati.”

²⁴ Ka Jesusi uarhitini arhispti: “Ji Israeli anapu karichi tsînchekatecha jinguntkusïni axanhaka.”

²⁵ Ka ima uarhiti tinguikuatsekuspti arhiparini: “¡Tata, jimboetaku, jarhuatarini sáni!”

²⁶ Ka Jesusi arhintaspti: “Nósesi jarhasti sapicheri t'irekua uíchuechani íntsaani.”

²⁷ Ka uarhiti uandaspti: “Jo Tata, ísïsti, k'óruksï uíchuecha jamberi ántskantasïndi ambe engaksï achecha uéjkujka.”

²⁸ Ka Jesusi arhintaspti: “¡Nana, Diósïndi kánekua mintsikasïnga! Úkorhencheri eskamenduri na uékani jaka.” Ka uájpa sóntku ambakentaspti.

Jesusi uánekua p'amenchatichani ambakerantaasti

²⁹ Jima uératini, Jesusi Galilea anapu japundarhu uanamukutini niraspti, ka juátarhu ma karhamaspti ka jima uaxakaspti.

³⁰ Jimaksï uánekua andarheraspti engaksï renhejtechani ka pátenharhichani ka nunuxichani ka k'urhujkurhechani, ka máteru uánekua p'amenchatichani pákuauempka, ka Jesusi iámenduechani ambakerantaaspti.

³¹ Ka ísï exenhatini ísku pakareranhasïrempti engaksï nunuxicha uandempka, ka k'urhujkurhechaksï ambajkurhantani, ka renhejtechaksï sési xanharani, ka pátenharhichaksï exeni. Ka Israeli anapu Diósïnksï k'éri ambe arhisïrempti.

Jesusi uánekuechani t'ireraasti

³² Jesusi jurhengorheri jémbechani uandajpaaspti ka arhiaspti: “P'amojkpexaka jimboka tanimu jurhiatekueskia engaksï jíndeni jinguni jámani jaka, ka t'irekua nómberanhasti, ka no uékasïnga nóma atini axajpentani, jimbokaksï xanhari jimbo mirikurhiaka.”

³³ Ka Jesusiri jurhengorherichaksï arhispti: “¿Jucha nani p'iua xáni káni t'irekua ixu enga no irenhaka?”

³⁴ Ka Jesusi kurhamarheaspti: “¿Namuntsï kurhinda káaxaki?” Ka imaksï uandaspti: “Iúmu tsimani ka namuntku kuruchechani.”

³⁵ Ka juramuspti eska uaxandenhapiringa.

³⁶ P'íkuaspti iúmu tsimani kurhindechani ka kuruchechani ka Diósïni diósïmaiamu arhintatini arhukuaspti, ka jurhengorherichani íntsapaaspti ka imaksï etsakuspti.

³⁷ Uiniarhanhantaspti t'irenhani, ka kurhinda ka kurucha pakarataksï iúmu tsimani tsïkiata uiniri tánantaspti.

³⁸ Ima engaksï t'irepka t'ámu míli ísïsptiksï ka no miiuaparini uarhitichani ka sapichani.

³⁹ Ka axajpentatini, Jesusi icharhutarhu jatantaspti ka Magadani isï niraspti.