San Mateo 13 - Diósïri Karakata P´urheepecha Jimbo

Tsíri jatsiriri uandantskua

¹ Imani jurhiatekua jimbojtu Jesusi uéraspti ka japundarhu uanamukuni uaxakaspti.

² Ka uánekuaksï andarheraspti, ka Jesusi icharhutani jataspti ka uaxakaspti, ka iámenduechaksï japundarhu uanamukuni pakaraspti.

³ Mámaru ambe uandaxekuasïrempti uandantskua terukutarantskua jimbo, arhiaparini: “Tarheri ma niraspti tríju k'uájpani.

⁴ Ka k'uajpani jámani, máruksï tríjuecha xanhari jimbo andatseraspti ka kuínichaksï ántskantaspti.

⁵ Máteruksï tsakapendu andatseraspti, jima enga no káni echeri jápka, ka jima sóntku andaraspti jimboka no kánekua inchatsespka;

⁶ k'óru tata jurhiata andaratini, tríjuni k'arhiraspti, jimboka sïrangua no inchatsespka.

⁷ Máteruksï akarhenirhu andatserasti, ka enga akarheni k'épka ójchakuraaspti.

⁸ Ka máruksï ambakiti echerirhu andatseraspti, ka sési andaraspti; máruksï iúmu ekuatsechani tríju jukaspti, máteruksï tanimu ekuatsechani, ka máteruksï ma ekuatse témbenichani jukaspti.

⁹ Ne enga jurhenaka kurhani, kurhangunte.”

Andi enga Jesusi uandantskuechani jimbo jurhentpempka

¹⁰ Jurhengorheri jémbechaksï Jesusini andarheraspti ka kurhamarhesptiksï: “¿Andirisï terukutantskuecha jimbo uandaxekuajki?”

¹¹ Ka Jesusi arhiantaaspti: “Jimbokajtsï cha mítetaranhaska auandarhu anapu irechekua ambe enga no mítekorheka, ka indeksï no mítetaranhasti.

¹² Ima enga jatsikorheka sánderu intsïnhaatiteru ka sánderu kánerakorheati, ka ima enga no jatsikorheka euanhantaati sáni ambe enga jatsikorheka.

¹³ Jimbosïni terukutantskuechani jimbo uandaxekuajka, jimbokaksï inde éskaxaka ka nóksï exesïndi, kurhasïndiksï ka nóksï kurhangusïndi.

¹⁴ Indecha jimbo úkorhexati ambe enga Diósïri uandari Isaiasi uandaka: ‘Na uéjkiksï xáni kurhani jarhani, nóksï kurhanguati, ka náuejkiksï éskani jarhani, nóksï exeati.

¹⁵ Jimboka i ireteri mintsita chuperi úkorhetixaka, ka mínharhikorhestiksï jimbokaksï no uékasïnga exeni, ka níksï mintsita jinguni kurhangukuekajki, jimbokajtsïni no uékasïnga andarhentaani, ka ji no úaka ambakerantaani.’”

¹⁶ “Cha k'óru tsípe je, jimbokajtsï exexaka ka kurhanguxakajtsï.

¹⁷ Sési jimboksïni arhixaka, eskaksï uánekua Diósïri uandaricha ka kaxumbitichaksï, exekuekaska ka kurhaakuekanksï íni ambe engajtsï cha exeni jaka ka kurhani jarhani, ka nóksï exesti.”

¹⁸ “Kurhaa je, ambe enga arhikuekajka tarheriri uandantskua:

¹⁹ Ima engaksï irechekueri uandakuani kurhajka, ka nóksï kurhanguni, ísïstiksï eska tríju enga xanhari jimbo andatseraka; nóambakiti janokusïndi ka aiangperatani k'arhuaskamaasïndi enga mintsitarhu júkskakata jápkia.

²⁰ Ka ima tríju enga tsakapendu andatseraka, imechani arhikuekaaxati engaksï uandakuani kurhajka ka tsípekua jingunksï p'irani,

²¹ ka enga no úka sïrangua jukani, nóksï úsïndi p'íngukorheni ka tsîrhukusïndiksï engaksï aiangperakua jimbo ts'éjkunhajka ka nósesiksï kánhani.

²² Ka ima tríju enga akarhenirhu andatseraka, imechani arhiaxati engaksï uandakuani kurhajka, ka iásï anapu uandanheata, ambe káneranhchakua ambe ka jatsikorhekua tandojchpíri, mirikutaasïndi íni uandakuani ka tsîrhukusïndiksï.

²³ Ka ima k'óruia enga ambakiti echerirhu andatseraka, imestiksï engaksï uandakuani kurhajka ka kurhanguni ka sési ambeksï úni, eska tríju enga iúmu ekuatsechani ka tanimu ekuatsechani ka ma ekuatse témbenichani píntsïta andatajka.”

Tríjueri ka uitsakueri uandantskua

²⁴ Jesusi máteru arini uandatskua terukutarantskua arhiaspti: “Auandarhu anapu irechekua, acheti méni jáxesti enga ambakiti tríju k'uájpapka.

²⁵ Ka enga k'uínhani jápka, ma enga kurhunhempka tríju jatsikatarhu inchaakukuspti, ka tríju jeramba k'uájpakuspti ka níntaspti.

²⁶ Enga tríju andarapka ka píntsïta andatani jarhania, tríju jerambajtu andaraspti.

²⁷ Ka ánchekorherichaksï andarheraspti ánchetpirini arhini: ‘Tata, ¿Andi nóri ambakiti tríju jatsikuski? ¿Andisï jeramba andara?’

²⁸ Ka ima arhiaspti: ‘Ima ísï niátasti engarini kurhunhejka,’ ka ánchekorherichaksï arhispti: ‘¿Niua jucha uitsakuani muruatani?’

²⁹ Ka ima arhiaspti: ‘Nómbe, jimbokajtsï jerambani muruatatini tríjuntujtsï muruteraaka.

³⁰ Jurajku je eskaksï májku k'éri andaraaka, ka uarhojpantskuarhu, uarhoatatichani arhiauaka eskaksï jerambani urheta p'ikuaka, ka eskaksï kurhintaaka; ka eskajtsïni tríjuni jatakuarhu patsachentaaka.’ ”

Mostaseri uandantskua terukutarantskua

³¹ Jesusi máteru uandantskua aianguaspti arhiaparini: “Auandarhu anapu irechekua xakua mostaseri tskípueni jáxesti, enga acheti ma ikarapka.

³² Sési jimbo, inde iámendu tskípuecha jinguni sánderu sapinharhisti, ka k'óru enga k'éjka, p'ukutapueni k'ésïndi engaksï kuínicha jamberi xerekua úrhutajka.”

Xarhiperakueri uandantskua terukutantskua

³³ Ka máteru uandatskua arhiaspti: “Auandarhu anapu irechekua, xáxesti eska xarhiperakua, enga uarhiti ma tanimu k'uetsaperakata jarinarhu jeuetaka.”

Úkorhesti ambe enga karakata arhimpka

³⁴ Jesusi íni ambe uandantskua terukutarantskua jimbo arhijpesti, ka enga no terukutarantskuechani jimboepiringa nómbema arhiasïrempti.

³⁵ Ka ísï úkorhesti ima enga Diósïri uandari uandapka: “Uandatskua terukutarakuechani jimbo uandaaka; xarhataaka ambe enga no mítekorheka jiájkantki uératini enga Diósï parhakpeni kueraaka.”

Jesusi uitsakueri uandantskua jánhastpesti

³⁶ Jesusi tsîngpentaspti ka k'umanchekuarhu inchaspti. Ka jurhengorheri jémbechaksï andarheraspti ka arhisptiksï: “Tríju jeramberi uandatskuajtsïni jánhasta.”

³⁷ Ka Jesusi arhiantaaspti: “Tríju ambakiti jatsiri, Acheti Uájpesti.

³⁸ Ka echeri enga tríju k'uájpanhajka, parhakpenisti; ambakiti tríju, irechekua uájpesti, ka tríju jeramba nóambakiti uájpesti.

³⁹ Kurhunhpiri enga tríju jeramba jatsikupka, nóambakitisti, ka uarhojpantskua parhakpeni k'amakurhikuesti, ka uarhojpantstichaksï ánjelichesti.

⁴⁰ Eskamendu tríju jeramba na muruatanhajka ka chpírirhu k'uanijpanhani, májkueniuati parhakpeni k'amakurhikua.

⁴¹ Acheti Uájpa ánjeli jémbechani axauati imeri irechekuarhu, eskaksï iámendu terungutpirichani ka nósesi ambe úrichani tánantauaka,

⁴² ka chpírirhuksï k'uanijpauati; jimeuati uekua ka sînichani kirisïmeantaani.

⁴³ Jimajkanksï kaxumbiticha Tátjemberi irechekuarhu, tata jurhiateni meremerexeni jauati. Ima enga jurhenaka kurhani, sési kurhangue.”

Uandantskua jatsikorhekueri enga jískakata jaka

⁴⁴ “Ka ístu auandarhu anapu irechekua xáxesti eska jatsikorhekua enga inchaskunhajka. Ka acheti ma xékorhentasti ka ménderu jimajku túskuntani, ka xáni tsípeni, jatsikorhekua ambe atarantasti ka imani echerini piántasti.”

Ambakiti tsakapu meriariri uandantskua

⁴⁵ “Ka ístu auandarhu anapu irechekua, ambe atarantstini jáxesti enga tsakapu meriari jirinhantani jámani jápka,

⁴⁶ ka enga ambakiti tsakapuni exentapka, níntaspti ka jatsikorhekua ambe atarantaspti ka tsakapu merearini piántaspti.”

Cheremakueri uandantskua

⁴⁷ “Ka ístu auandarhu anapu irechekua, cherematarakueni jáxesti enga japundarhu k'uanimanhatini iámendu jásï kuruchechani p'ímajka.

⁴⁸ Ka enga kuetsaperhujka, japundarhu uanamukutinksï péntasïndi ka jimaksï uaxandentasïndi erarhentani, kurucha ambarhatichanksï tsïkiatarhu jatsirasïndi, ka nóambarhatichanksï kuanikuasïndi.

⁴⁹ Ísïuati parhakpeni k'amakurhikua: Ánjelichaksï uéraati ka no ambarhati k'uiripuechanksï, engaksï kaxumbiticha jinguni jámani jauaka, jarharetauatiksï,

⁵⁰ ka nóambarhati k'uripuechanksï chpírirhu k'uanijpauati. Jimaksïsï ueraati ka sînichani kirisïmeantaani.”

Jimbanhe ka tamapu ambe

⁵¹ Jesusi kurhamarheaspti: “¿Kurhanguxakijtsï?” Ka imaksï: “Jo” Arhintaspti.

⁵² Ka Jesusi arhiaspti: “Ísï jimbo juramukua jurhentpiri ma enga kurhangujkia auandarhu anapu irechekuani, achamasï méni jáxesti enga imecho jimbanhe ambe ka tamapu ambe petajka.”

Jesusi Nasareti níntasti

⁵³ Enga Jesusi k'amarapka íni uandantskua aianguntaani, kéndikuspti.

⁵⁴ Ka imeri iretarhu niántaspti, ka jima anapu k'umanchekua tángorhentskuarhu jurhentpesïrempti, ka ísku pakareranhasïrempti eratsenhantani ka uandanhsïrempti: “¿I nani xáni mímixeski, ka néna úasïnki íni milagruechani?

⁵⁵ ¿Andi no ísï tekari uájpe? ¿Andi no Maria arhinhasïnki amamba? ¿No ísï Jakobueri ka Joseri ka Simoniri ka Júdasïri erachi jémbe?

⁵⁶ ¿Andi nóksï piremba jémbecha juchantsïni jinguni irekaski? ¿Andi nani uératini juásïnki indeni ambe?”

⁵⁷ Ka imeri ambeksï mámaru ambe uandasïrempti. K'óru Jesusi arhiaspti: “Iápuru ísïksï Diósïri uandarini ma sési arhisïndi, ka imeri iretarhu nómbe ka ni chéni jémbo.”

⁵⁸ Ka jima namuntku milagruechani úaspti jimbokaksï imani no mintsikasïrempka.