San Mateo 11 - Diósïri Karakata P´urheepecha Jimbo

¹ Enga Jesusi k'amarapka jurhengorheri jémbechani arhistakuani ambe engaksï xáni úpiringa, kéndikuspti, ka ambakiti aiangperakuani máteru iretecharhu niraspti aiangpeni ka jurhentpeni.

Juánu itsï atajtsïkpiriri ánchperata úricha

² Juánu itsï atajtsïkpiri k'ataperakuarhu jatini kurhajchpespti ambe enga Krístu úni jápka, ka tsimani jurhengorheri jémbechani axaaspti eskaksï nipiringa Jesusini

³ kurhamarheni: “¿T'úeski ima enga jupiringa, óchi máteruni erokaa?”

⁴ Ka Jesusi arhiaspti: “Níntsï je ka aianguntsï je Juánuni ambe engajtsï exeni jaka ka kurhani jarhani.

⁵ Pátenharhichaksï exexati, ka chkéjchuechaksï xanharaxati ka xúta jukarichaksï ambakentaxati; ka kándichaksï kurhaxati ka uarhirichaksï tsíntaxati, ka kómu jándichaksï ambakiti aiangperakuani aiangunhantaxati.

⁶ Tsípeksï ima engaksï jíndeni jimbo nómbe ma nósesi exejka.”

⁷ Engaksï Juánueri jurhengorhericha k'uanhatsentani jápka, Jesusi Juánueri ambe ísï uandaspti: “¿Andi ambejtsï niraski exeni jima enga no irenhaka? ¿P'atamuntkujtsï niraski exeni enga tarhiata juírhuskaka?

⁸ ¿O ambejtsïsï niki exeni? ¿Achetini ma enga ambakiti ambe xukuparhatini jaka? Ima engaksï ambakiti ambe xukuparhajka, irechoksï jarhasti.

⁹ Jiájkani, ¿Néntsïsï niki exeni? ¿Diósïri uandarini ma? Jo, ísïsti, ka sánderu k'éri ambe eska Diósïri uandari ma,

¹⁰ jimboka inderi ambesï karakata jaka: ‘Jíkini urhetatachepaxaka jucheti uandakua párini, engakini xanharini p'arhikjantskachepaaka.’”

¹¹ “Sési jimboksïni arhixaka, eska nómeni andajpenuxapka sánderu k'éri ma eska Juánu itsï atajtsïkpiri, ka k'óru ne enga auandarhu anapu irechekuarhu sánderu sapichueka, Juánu jinguni sánderu k'éri ambesti.”

¹² “Jiájkani uératintki enga Juánu itsï atajtsïkpirika ka iásï jamberi, auandarhu anapu irechekua uinhamu etsakurhixati, ka uiuinharhatichajkuksïsï úati inchani, náuejki ima engaksï no jiókorhejka jángorhentani jaka k'amajkuni.

¹³ Diósïri uandaricha ka juramukua, Diósïni jimboksï uandasti jiájkani jamberi enga Juánu arhijtsïkpeka.

¹⁴ Ka ekajtsï uéjka íni ambe kurhanguni, Juánu Eliasïsti, ima enga jupiringa.

¹⁵ Ne enga jurhenaka kurhani, kurhangunte.”

¹⁶ “¿Ambe jinguni terukutantaua iásï anapuechani? Tumbinksï járhasti engaksï kópekuarhu uaxapejka pámpiri jémbechani uinhachakuani:

¹⁷ ‘Kústacheskaksïni ka nójtsï uarhaska; mískorheteriksïni kústacheska, ka nójtsï sáni ueraska.’

¹⁸ Jimboka Juánu ixu jámaxapka, ima enga no t'irempka ka ni kauikua ts'ému, ka chájtsï ísï uandasïnga eska nóambakiti incharhetixapka.

¹⁹ Ka iásï acheti uájpa jurhasti, enga t'irejka ka kauikuajtu ts'émuni ka chájtsï uandasïnga: ‘I jukari t'iresïndi ka kauini, ka tumina tánaticha ka k'amanharhintsticha jinguni jámasïndi.’ K'óru Diósïri mímixekua, jánguarhu xarharasïndi.”

K'érati iretechaksï xerenhantaati

²⁰ Jesusi xukaaspti imani iretechani enga xáni milagruechani úapka, jimbokaksï ima Diósïni no andarhentaspka ka arhiaspti:

²¹ “¡Áke t'u Korasini! Ka ¡Áke t'u Betsaida! Jimboka engaksï Tíro ka Sidoni únhapiringa milagruecha engaksï chénio únhaka, iátkipirindia eskajtsï móantatini japiringa ch'erapiti xukuparhantatini ka t'upuri jápu atajtsïparini.

²² Sési jimboksïni arhixaka eska imani jurhiatekua enga arhinharhikperanhaaka, Tíro ka Sidoni nóksï xáni k'amanharhiranhantaati eskajtsï cha na k'amanharhiranhantaaka.

²³ Ka t'u Kafarnaumi, ¿Andi eratsexakiri eskari auandarhu k'érikuarhu péranhaaka? Sánderuri kénhekua k'uaninhanhaaka, jimboka engaksï Sodoma únhapiringa milagruecha engaksï chénio únhaka, ima ireta japirinditeru.

²⁴ Ísï jimboksïnisï arhini jaka, eska ima jurhiatekua enga arhinharhikperanhaaka, nóksï xáni k'amanharhiranhantaati Sodoma anapuecha, eskari t'u na k'amanharhiranhantaaka.”

Jesusi Diósïni k'éri ambe arhisti

²⁵ Imani jurhiatekuechani jimbo, Jesusi uandaspti: “Táte, auanda ka parhakpeniri Acha, k'éri ambekini arhisïnga, jimbokari mímixetichani ka jánhaskatichani íni ambe jískakuaska, ka sapirhatichandi xarhatakuaska.

²⁶ Jo Táte, jimbokari t'u ísï tsitiska.”

²⁷ “Jucheti Táterini iámendu ambe jurajkuchesti. Tátejkusï Uájpani míteti, ka Uájpajkusï Táteni míteti, ka Uájpa ne engani uékauaka mítetaraani.”

²⁸ “Juini je jíndeni jinguni cha engajtsï kuataratini jaka xáni ánchekorheni, ka cha engajtsï xáni uandanheani jaka, jíksïni mintsikustaaka.

²⁹ Jucheti uanajchakuani pa je, ka jurhengorhe je, ka ísï jama je eskani ji na jámka, jíchkani tekaantasïnga ka sési jimbo kétsekua uérasïnga, ísïjtsï mintsikorheaka.

³⁰ Jimboka jucheti uanajchakua no p'atujchakpesïnga ka no k'uetsapesti ambe engani ji párpejka.”