San Mateo 10 - Diósïri Karakata P´urheepecha Jimbo

Jesusi témbeni tsimani jurhengorherichani erakuasti

¹ Jesusi témbeni tsimani jurhengorheri jémbechani erakuaspti, ka juramukua íntsaaspti nósesi jarhati espirituechani petarhpeantaani, ka mámaru jásï p'amenchakuechani ka p'ikuarherakuechani ambakerpeantaani.

² Ístiksï témbeni tsimani jurhengorhericha: Simoni uénani enga Pédru arhinhempka; ka erachi jémba Andresï; ka Juánu, Sebedeo uájpecha;

³ ka Felipe ka Bartolome ka Tomasï; ka Mateo tumina tánantsti; ka Jakobu Alfeo uájpa; ka Lebeo engajtuksï Tadeo arhimpka;

⁴ ka Simoni uarhipiti ka Júdasï Iskariote, ima enga Jesusini intsïnharhitpepka.

Jesusi jurhengorherichani jurhentpeni axaasti

⁵ Íni témbeni tsimani, Jesusi axaani jámani arhistakuaspti: “No jakajkuticheri xanhari jimbo ásï ni je, ka Samaria anapu iretecharhu ásï inchaaku je,

⁶ sánderu sáni karichi tsînchekatecha Israeli anapuecha jinguni ni je.

⁷ Ka arhijtsïkpeakajtsï eska auandarhu anapu irechekua janoxakaia.

⁸ P'amenchatichani ambakerantaa je, ka uarhirichani tsítantaa je, ka xúta jukarhekorherichani p'ikurheantaa je, ka nóambakitichani petarhpeantsï je. Chájtsï ísku intsïnhaska íni ambe, chájtu ásï ambe ma kurhajkorhe je.”

⁹ “Tumina ásï p'ájtakorhe je, méntku nóma jásï;

¹⁰ sutupu ka mórhekorhekuajtu ásï pájtakorhe je, o kuarhachi o tenhexkorhekua ka imani ambe engajtsï xanhari jimbo uétarhenchapaaka, jimboka ánchekorheri ma sésekua jatsisïnga eska t'ireranhaaka.

¹¹ Ka engajtsï k'éri iretarhu ma o sapichu iretarhu ma niáraaka, jirinhantsï je nemani engajtsï mintsinharhiaka, ka imecho pakara je engajtsï jamberi uéakuntaska.

¹² Ekari nani niáraaka, jima anapuechani sési uandajpaa.

¹³ Ka ekaksï jima anapuecha jukanchaka eskaksï uandajpanhaaka, chéti sési jakua imani k'umanchekuarhu jauati; k'óru ekaksï jima anapuecha no jukanchaka eskaksï uandajpanhaaka, sési jakua no jima pakaraati.

¹⁴ Ka engaksïni nema nósesi erokaaka, ka nóksïni kurhani, ima kumanchekuarhu o iretarhu uéakuntsï je ka t'upuri sésisesi uauanduntsï je.

¹⁵ Sési jimboksïni arhixaka eska jurhiatekua enga útatsperanhaaka, ima iretarhu anapuechaksï sánderu k'amanharhiranhantaati eskaksï Sodoma ka Gomorra anapuecha.”

Atanhantsï kánhaaka

¹⁶ “Jíksïni karichini axaxaka jimesï engaksï jiuatsïcha uánekua jámka, jinguntku jáma je, ísï eskaksï akuitsecha ka jipunicha na jámka.”

¹⁷ “Jinguntku je, jimbokaksïni juramuticha jinguni páaka, ka k'umanchekua tángorhentskuecharhuksïni k'uikirheati,

¹⁸ ka ístujtsï jíndeni jimbo k'érati juramuticha jinguni pánhaaka ka irechecha jinguni; ísïjtsï úaka jima uandantani jucheti ambe ka iámendu iretechani mítetaraani.

¹⁹ Ka engajtsï juramutichani jinguni pánhaaka, ásï jáma je uandanheani ambe o nénajtsïsï uandaa, jimajtsï jánhastanhaaka ambe enga k'uanijka uandani,

²⁰ jimbokajtsï no chásï uandaaka, chári Táteri Espirituksïnisï uandaraati.”

²¹ “Márkuechaksï uandikperaati, ka tátechaksï uájpechani uandikuauati, ka sapichaksï tátjembani ka amambani mókukuati ka uándikuauatiksï.

²² Jucheti jakangurhikua jimboksïni kurhunheati; k'óru ima p'ímutantskateuati enga tekaantaaka k'amarhuni jamberi.

²³ Engaksïni ireta ma jimbo atakuekaaka, máteru iretarhu ni je sïpakorheni. Sési jimbochkaksïni arhixaka eska Acheti Uájpa junguaka engajtsï nótki iápuru Israeli anapu iretecharhu nirani jauaka.”

²⁴ “Jurhengorheri ma no sánderu k'éri ambesti eska jurhentpiri jémba, ka jántspiri májtu no sánderu k'éri ambesti eska imeri ánchetpiri.

²⁵ Nósesisti eska jurhengorheri jurhentpirini uanokuaka. Ka engaksï tekaajka Belsebu arhini imani enga chéni jémbo k'érika, ¡Nénaksï no tekauaia sánderu nósesi arhiani chéni jémbo anapuechani!”

Ásï chérhpe je

²⁶ “Ásï chérhpe je, jimboka mítekorheaka iámendu ambe enga no mítekorheka, ka xarhatanhantaati ambe enga jískakata jaka.

²⁷ Ambe engaksïni pájpakandu arhijka, chájtsï jurhiatekua uandantaaka, ka ambe engaksïni ji arhindikuni jaka, taiajtsïtakatecharhu uératini uinhacha je uandantani.

²⁸ Ásï chérhea je uándikpitichani, jimbokaksï no úsïnga mintsita uándikutspeni; sánderu sántsï imanisï chérheaka enga anhanhatakuani ka tsípekuani chpírirhu k'uanijpajka.

²⁹ ¿Andi cha no míteski, eskaksï tsimani kuínicha ma taiakata jimbojkusï piánhajka? Ka eska nóma uekorhentasïnga eka chári Táte no uékaaka.

³⁰ Ísï jimbo, jauiri jamberijtsï sési miiumenhatixaka.

³¹ Ásï che je: Chájtsï sánderu jukaparhaska eskaksï kuínicha.”

Jesusi jingunini

³² “Eka nema uánekuechani japarini uandaska eska jíndeni jinguniska, jíjtuni ima jingunini uandaaka jucheti Táteni japarini enga auandarhu jaka.

³³ Ka eka nema uánekuechani japarini uandaaka eska no jíndeni jinguniska, jíjtuni no ima jingunini uandaaka jucheti Táteni japarini enga auandarhu jaka.”

Jesusini jimbo uarhiperanhaati

³⁴ “Ásï ísï eratse je eskani ji parhakpeni sési pájperakuasï juka juáni, nósesi pájperakuasïni juka juáni, uarhiperata ambesïni juáka.

³⁵ Eska tataka, tátjembani mókukuaka, ka eska nanaka amambani mókukuaka, ka tarhamba tarhampirini mókukuni, indenisïni juka juáni.

³⁶ Ísï jimbo, márkuechaksï kurhunhperaati.”

³⁷ “Ne enga tátjembani ka amambani sánderu uékaaka eska jíndeni uékani, no nitatarhenchasïndi jíndeni jingunini, ka ne enga uájpechani sánderu uékaaka eska jíndeni, no nitatarhenchasïndi jíndeni jingunini.

³⁸ Ka ne enga no ichandikorheaka krúsini ka chúxapandini, no nitatarhenchasïndi jíndeni jingunini.

³⁹ Ima enga tsípekuani patsakorhekuekaaka, tsîtaati, k'óru ima enga imeri tsípekuani jíndeni jimbo tsîtaaka, p'ímutantskorheati.”

Diósï maiampentaati

⁴⁰ “Ima engaksïni sési erokaaka, jíndentsïnisï sési erokani jati, ka ne engarini sési erokani jaka, sési erokaxati imani engarini axaka.

⁴¹ Ne enga Diósïri uandarini ma mítentaakaka ísï sési erokani, méntkueni andakua intsïnhaati eska Diósïri uandari ma, ka ne enga kaxumbitini ma sési erokaaka, kaxumbitiri itsïmperata intsïnhaati.

⁴² Eka nema, jucheti sapini ma ísïni itsï ts'irapiti íntskuaka, jimbokarini jíndeni chúxapasïnga, sési jimboksïni arhisïnga eska intsïmperakua andakorhetixakaia.”