San Marcos 9 - Diósïri Karakata P´urheepecha Jimbo

¹ Ka Jesusi arhiasptiteru: –Sési jimboksïnisï arhini jaka; chájtsï máru engajtsï ixu jaka, nótkijtsï uarhini jauaka, andajkorheakajtsï exeni Diósïri juramukuani enga uinhapekua jinguni janoni jauaka.

Jesusi ménderueni jáxentasti

² Kuímu jurhia tátsekua, Jesusi k'éri ma juátarhu niraspti, jimesï enga nóteru nema jámempka, ka pájtaaspti Pédruni, ka Santiaguni ka Juánuni. Ka enga niárapka, imaksï exexapti enga ménderueni jáxentapka.

³ Imeri xukuparhakua meremerejkuntaspti ka t'uput'upuxentani, eska iéstakua, ma parhakpeni ima sánderu urapespti.

⁴ Ka jurhengorherichaksï Eliasïni ka Moisesini exeaspti engaksï Jesusi jinguni uandontskurheni jápka.

⁵ Ka Pédru arhispti Jesusini: –Jurhentpiri, ¡Séskuchi ixu jarhaska! Tanimu uapajtsïtakuachi úaka: Ma chétiuati, máteru Moisesiriuati ka máteru Eliasïriuati.

⁶ Pédru no jánhaskasïrempti ambesï uandapirini, jimbokaksï chérakorhetixapka.

⁷ Ka ísku úndaspti xúmu andajtsïkueraani ka ópchakurhaaspti: Ka xúmurhu uandakua ma kurhakorhespti, enga arhimpka: “I jucheti Uátsïtisti engani ji xáni xénhchka: Kurhajcha je.”

⁸ Ka mátirku, engaksï ménderu exepka, nóteru nema jámsïremptia, Jesusiterkusï jáptia.

⁹ Ka engaksï kétsemunguani jápkia, Jesusi arhiaspti eskaksï nótki nemani aiangupiringa imani ambe engaksï juátarhu exepka, eka Acheti Uájpa nótki tsíntani japiringa.

¹⁰ Ka imaksï patsakuspti, k'óruksï kurhamarhperani pakaraspti, ambespki tsíntskua.

¹¹ Ka kurhamarhesptiksï Jesusini: –¿Andiksïsï juramukua jurhentpiricha uandajki eska urheta Eliasï junguaka?

¹² Ka ima arhiaspti: –Ísïsti, Eliasï urhepunguati, ka ambantskantaati. ¿Ka andisï jiájkani karakata arhijki eska Acheti Uájpa kánekua nósesi kánhaaka ka eska no xénhchanhani kánhaaka?

¹³ Ka jíksïni arhixaka eska Eliasï junguaskia, ka nósesiksï kántasti, ísï eska na karakata jaka eskaksï na kámapiringa.

Tumbi ma enga nósesi jásï espiritu incharhetini jápka

¹⁴ Engaksï andarheantaapka máteru jurhengorherichani, uáni k'uiripu uirhipkurhatixapti, ka arhinhaskperaxaptiksï máru kararicha jinguni.

¹⁵ Ka engaksï Jesusini exepka, iámenduecha ísku pakareranhaspti, ka uiriasptiksï jájki íntskuni.

¹⁶ Ka Jesusi kurhamarheaspti: –¿Ambejtsïsï xáni arhinhaskperani jaki indecha jinguni?

¹⁷ Ka nema enga jima jápka arhispti: –Jurhentpiri, jucheti uátsïnikini juácheska enga no újka uandani, jimboka nósesi jásï espíritu incharhetixaka.

¹⁸ Enga p'íntka, perentskantasïndi; ka k'uruata uéchasïndi, ka sînichani kirisïmeantasïndi, ka chánchanhaxentasïndi. Ka kómu arhiaska chéti jurhengorherichani eskaksï petarhetantapiringa imani nósesi jásï espírituni, ka nóksï ústi.

¹⁹ Ka Jesusi arhiaspti: –¡No jakajkuticha! ¿Na jatini jamberi chánksïni jinguni jaua? ¿Na xánteruksïni tekantaa? Juáchejtsïni tumbini.

²⁰ Ka engaksï na pérakupka, nósesi jásï espiritu Jesusini exerini uinhamu jupintaspti tumbini, ka ima tumbi kuarhatsespti ka peretsentani k'uruata uéchaparini.

²¹ Ka Jesusi, tumbiri tátjembani kurhamarhespti: –¿Na jatini uénaski inde ísï jámani? Ka tátjemba arhispti: –Sapirintkia.

²² Ka sóntku méni uekastia uándikuni, méni chpírirhu k'uanijpasïndi ka méni itsïrhu k'uanimasïndi. Ekari ambe újka néna jámani, p'amojkujtsïni sáni ka jarhuatajtsïni.

²³ Ka Jesusi arhispti: –Ásïrini arhi: Ekari ambe újka, arhini ¡Ne emanga jakajkujka, iámendu ambe úsïndi úkorheni eska na uékani jarhajka!

²⁴ Ka tumbiri tátjemba uinhachaparini arhispti: –Ji jakajkusïnga ¡Ka jarhuatarini jakajkuni sánderu!

²⁵ Enga Jesusi exepka eska uánenhantaxapkia, nósesi jásï espirituni xukaspti, arhiparini: –Nósesi jásï espiritu nunuxi ka kándi, juramuchexakakini eskari uérhentaaka tumbini ka ásteru méni jáma incharhentani.

²⁶ Ka nósesi jásï espiritu ménderu tumbini p'íntaspti, ka uinhachaparini nósesi kántaspti nóna uérhentani, ka tumbi mirikurhitini pakaraspti, ka uandanhasïrempti eska uarhispkia.

²⁷ Ka Jesusi jupijkuspti tumbini, ka jauatani; ka ima anhaxurhintaspti.

²⁸ Ísï tátsekua, enga Jesusi k'umanchekuarhu niántapka, ka engaksï na jandiojku jápka, imeri jurhengorherichaksï kurhamarhespti: –¿Andisïni jucha no u xásï espirituni petarhetantani?

²⁹ Ka Jesusi arhiaspti: –Imeni járhati nóambarhatichani, kómarhikua jimbojkusï újti kénditanhani.

Jesusi ménderu uarhikua aiangpekorhesti

³⁰ Ka jima uératiniksï Galilea isï niraspti. Ka Jesusi no uéksïrempti eska mítekorhepiringa,

³¹ jimboka imeri jurhengorherichani jurhendapaaxapka. Ka arhiasïrempti: –Acheti Uájpa jupinhaati ka atanhaati uándikunhani ka tanimu jurhia jimbo tsíntaati.

³² Imaksï no kurhangusïrempti enga ima arhiani jápka, ka chésïremptiksï kurhamarheni.

¿Ne sánderu k'éri ambeski?

³³ Engaksï niárapka Kafarnaumi ka k'umanchekuarhuksï jarhania, Jesusi kurhamarheaspti: –¿Ambejtsïsï xáni arhijperapunguani jápi?

³⁴ Ka imaksï ísku pakareraspti, jimbokaksï arhirperapantaxapka ne sánderu k'érispki

³⁵ Jesusi uaxakaspti, ka iámendu jurhengorherichani uandajpaaspti (témbeni tsimani) ka arhiaspti: –Ima enga sánderu k'éri ambenhchajka, jatsiati sánderu sapichuentani ka iámenduechani marhuakuani.

³⁶ Ka sapini ma ióarhispti ka terujkani péraspti, ka kamanharhitini arhiaspti:

³⁷ –Ekajtsï jucheti jakangurhikuani jimbo jiókaska ma sapini, jíndentsïnisï jiókani jaka, ka ekajtsïni jíndeni jiókaska, Tátentsï jiókaxaka, jimbokarini imasï axaka.

Ima engajtsïni no ójkutajka, juchantsïni jingunistiksï

³⁸ Juánu arhispti: –Jurhentpiri, achetini máchi exeska, enga chéti jakangurhikua jimbo nóambakitichani petarhpeantaani jápka, ka nóteruchi jiáretaskia jimboka no juchantsïni jinguni jámsïnga.

³⁹ Ka Jesusi arhiaspti: –Ásï jáma je no jiáretani, jimboka nónema úaka Diósïri uinhapekuani jucheti jakangurhikua jimbo úrani, ka tátsekuarini nósesi uandatseni jarhania.

⁴⁰ Ima engajtsïni no ójkutajka juchantsïni jingunistiksï.

⁴¹ Diósï, maiamuantauati imechani engaksï chánksïni itsï intsïmbeaka, jimbokajtsï Krístueriska, sési jimboksïni arhixaka eskaksï ima no tsîtaaka intsïmperatani.

Néna no k'amanharhintani

⁴² “Eka nema terungutaraska sapini ma engarini jakajkujka, sánderu sésipirindi eska k'énharhi ma tsakapu urhuratarakua jójchakunhapiringa ka japundarhu k'uanimanhani.

⁴³ Ekakini chéti jájki nósesi jásï ambe niátani terungutaraska, kachujku; sánderu sésiuati eskari tokojkutini inchaaka tsípekuarhu, ka nóri chpírirhu k'uanijpanhani tsimani jájki jukarini, jima enga nómeni pójpejka,

⁴⁴ [jima engaksï ‘Karhasïcha nómeni uarhijka, ka níjtu chpíri pójpeni.’]

⁴⁵ Ekakini chéti jantsiri terungutaraska, kachujta; sánderu sésiuati tokojtatini inchani tsípekuarhu, ka nóri tsimani jantsirichani jukaarini chpírirhu k'uanijpanhani, jima enga nómeni pójpejka,

⁴⁶ [jima engaksï karhasïcha nómeni uarhijka, ka níjtu chpíri pójpeni.]

⁴⁷ Ekakini chéti éskua nósesi ambe úni terungutaraska, p'itanharhi; sánderu sésiuati engari ma éskua jinguntku inchaaka tsípekuarhu, ka nóri chpírirhu k'uanijpanhani tsimani erhakua éskua jinguni,

⁴⁸ jima engaksï karhasïcha nómeni uarhijka, ka níjtu chpíri pójpeni.

⁴⁹ Chájtsï etukua ka chpíri jimbo pímbinhajkunhantaaka.

⁵⁰ Etukua ambakiti ambesti; ka ¿Ambe jinguniterujtsï ásperaa, enga etukua tsîjpeska? Patsakorhe je etukua, ka sési arhijperaparini irekani ja je.”