San Marcos 7 - Diósïri Karakata P´urheepecha Jimbo

Ambe enga nósesi útspejka

¹ Máruksï Jerusaleni juticha, fariseuecha ka juramukua jurhentpiricha, Jesusiniksï andarheraspti.

² Ka engaksï na exepka eskaksï máru Jesusiri jurhengorhericha no jupajkutini t'irexapka, arhinhchaasïremptiksï.

³ (Jimbokaksï fariseuecha –ka iámendu judiouecha p'indekua kámsïnga engaksï tua anapuecha jurajkukuapka: No t'ireni eka urheta no jupajkunhapiringa.

⁴ Ka engaksï kópekuarhu nitini niántka, no t'irenhasïndi, urhetaksï jupajkuntasïndi ka tátsekuaksï t'iresïndia. Ka tsúntsuechantuksï ka purhechichani ka tiámueri p'ámatarakuechani, ka k'uírakua jamberiksï jupantasïrempti.)

⁵ Ka Jesusiniksï arhispti: –¿Andiksïsï chéti jurhengorhericha no janhanharhijki p'indekuechani engajtsïni ióntki anapuecha jurajkucheaka? Exea, nóksï jupajkutini t'irexati.

⁶ Ka Jesusi mókukuaspti: –Isaiasï, Diósïri uandari, chánksïni jimbo uandaspti enga ísï karapka: Iauanirini jarharetixati ireteri mintsita. Nájkirukajtsïni penchumekua jimbo k'éri ambe arhini jarhajka.

⁷ No ma ambe marhuasïndi engajtsïni k'éri ambe arhijka: Jimbokaksï chári jurhentpekuecha parhakpeni anapu p'indekueska.

⁸ Ísïjtsï jámani p'indekuechani chúxapaani, Diósïri juramukuantsï jurarkusïnga.

⁹ Ka arhiasptiteru: –Chári p'indekuechantsï chúxapaarini, Diósïri juramukuechantsï miripakurhiasïnga.

¹⁰ Eka Moisesi uandapka: Chéti táteni ka chéti nándeniri janhanharhiauaka, ka uándikunhaati ne enga útakuska tátjembani o amambani.

¹¹ Chájtsï mójtakuntaska ekajtsï arhijpejka eska ma nema úaka arhini tátjembani o amambani: Nókini úaka jarhuatani, jimbokani Diósïni míndakorhentatixaka;

¹² ka ístujtsï uinhajtsïtasïnga eska enga nema ísï uandaaka, nóteru uétarheakia eska tátjembani o amambani jarhuataaka.

¹³ Ísï jimbojtsï, indeni p'idekuechani jimbo k'amatakusïnga Diósïri uandakuani, enga mójkutperapanhajka. Ka uánekua xárhati ambeterujtsï úsïnga.

¹⁴ Jimajkani Jesusi ióarhijpespti, ka arhiani: –Kurhajtsïni je iámenduecha:

¹⁵ No nósesi útspesïndi ambe enga xáni anhajka. Ambe enga jini uénhenhajka, imasï nósesi útspejti.

¹⁶ [Ekajtsï jurhenaka kurhani, sési kurhangu je.]

¹⁷ Enga Jesusi jarharpentapka ka k'umanchekuarhu inchani, imeri jurhengorherichaksï kurhamarhespti ima uandantskua ambe arhikuekasïrempki.

¹⁸ Ka ima arhiaspti: –¿Chájtu no kurhangusïnki? ¿Nójtsï jánhaskasïnki eska no nósesi útspesïnga ambe enga anhajka?

¹⁹ Jimboka no mintsitarhu niáratspesïnga, sïturhirhujku niárasïndi ka tátsekua ísku uéntasïndi. Arhiakuekaxapti eska iámendu t'irekua ambakitiska.

²⁰ Ka uandasptijtu: –Jatanhetsperakuasï nósesi útspejti.

²¹ Jimboka mintsitarhu uénhenhasïnga nósesi járhati eratsekuecha ka ísku ambe niátakua ka sïpajkurhakua ka uándikperakua

²² ka ísku jandikua ambe ka jatsikorhekua káneranhchakua ka ikikurhikua ka k'arhajpenhchakua ka nósesi járhati p'indekuecha ka ipuperakua ka uandatsetspenhchakua ka teparakorhekua, ka sési xékorhekua.

²³ Iámendu i nósesi járhati ambe, jini uénhenhasïndi ka nósesi jájkpesïndi.

Jakajkukua uarhitiri enga no judiouepka

²⁴ Tátsekua Jesusi Tiro uanondani isï niraspti. Ka k'umanchekuarhu ma niáraspti ka no uékasïrempti eska mítekorhepiringa nani jarhaspki, ka no úspti jirikorheni.

²⁵ Ka uátsïri amamba ma sóntku mítespti ka niraspti Jesusini tinguixurhikuni, jimboka imeri uájpani nósesi jásï incharhetixapka.

²⁶ Ima uarhiti Sirofenisia anapuespti, ka enga na Jesusini xéntapka, kómarhispti eska imeri uátsïni petarhetantapiringa nósesi jásïni.

²⁷ Ka Jesusi arhispti: –Jurakuksï urheta sapicha t'ireni, jimboka nósesiska sapichani t'irekua euamukuantani ka uíchuechani íntsaani.

²⁸ Ka uarhiti arhispti: –Tata, uíchuecha jamberiksï ántskantasïndi imani ambe engaksï sapicha uéjkujka.

²⁹ Ka Jesusi arhispti: –Ásteru uandanheapantsï, chéti uandakua jimbo, nósesi jásï uérhentastia chéti uátsïni.

³⁰ Eka uarhiti chénjembo niántapka, uájpa t'uíni apojtsïkusptia, jimboka nóambakiti t'uíni uérhentaspkia.

Jesusi nunuxini ma ambakerantaspti

³¹ Tátsekua Jesusi uéakuspti Tiro, ka Sidoni niraspti, jima uératini Galilea anapu japundarhu parhikutini isï niraspti ka témbeni iretecharhu niáraspti.

³² Ka jimaksï achetini ma pérakuspti enga kándipka ka nunuxini. Ka kómarhisptiksï eska p'ájtsïkupiringa ambakerantani.

³³ Jesusi támu péraspti ka tsimapuru p'ándikuspti ka kuechenda atachakuspti,

³⁴ ka auandarhu erancheparini k'arhanguntaspti ka uandaspti: “¡Éfata!” (Enga arhikuekajka: “¡Mítakorhe!”)

³⁵ Ka acheti ambajpandirantaspti, ka kuatapchantani, ka úspti sési uandani.

³⁶ Jesusi arhiaspti eskaksï nónemani jámapiringa aianguni; ka imaksï sánderu sóntku uandantasïrempti.

³⁷ Ka imani ambe ísï exeparini, ísï uandanhasïrempti: “¡Iámendu ambe sési úsïndi! ¡Kándichani kurhataraasïndi ka nunuxichani uandaraasïndi!”