San Marcos 6 - Diósïri Karakata P´urheepecha Jimbo

Jesusi Nasareti níntaspti

¹ Jesusi imeri iretarhu niántaspti, imeri jurhengorherichani jinguni.

² Enga sábadu jurhiatekuepkia uénaspti k'umanchekua tángorhentskuarhu jurhentpeni. Ka uánekuaksï kurhaspti Jesusini, ka eratsentanksï pakarerasïrempti, ka kurhamarhperasïremptiksï: –¿Andi nani jurhengorheski i xáni ambe? ¿Nani p'iraski xáni mímixekua ka xásï uinhapekua enga xarhatajka?

³ ¿Andi no ísï tekari, enga Maria uájpeka ka enga Santiagueri ka Joseri ka Júdasïri ka Simoniri erachika? ¿Andi nóksï inderi pirembechajtu ixu juchantsïni jinguni irekaski? Ka nóksï jakajkukusïrempti.

⁴ Ka Jesusi arhiaspti: –Diósïri uandari ma, iápuru isï janhanharhinhasïndi ka sési eronhani, imeri iretarhujku nómbe, ka ni chénjembo.

⁵ Ka jima, no uánekua p'amenchatichani ambakerantaaspti, namontkusï ambakerantaapti p'ájtsïkuaparini, ka jima nóteru ma milagru úspti úni.

⁶ Ka Jesusi eratsentani pakareraspti engaksï no jakajkukuempka. Ka Jesusi nirasïrempti jurhentpeni iretecharhu engaksï jimajku isï jápka.

Jurhengorherichaksï axanhasti jurhetpeni Diósïri juramukuani

⁷ Ka ióarhiaspti témbeni tsimani jurhengorherichani, ka tsimandani axaaspti, ka íntsaaspti juramukua nóambakitichani petarhpeantaani.

⁸ Ka juramukuaspti: –Ísku ni je, ásï pájtakorhe je kurhinda, sutupu ka tumina ambe.

⁹ Mórhekorhekuajtu ásï pa je, kuarhachichantku jukaantsï je, ka tenhexkorhekuajku pájtakorhe je.

¹⁰ Ka ístu arhiaspti: –Ekajtsï nemo niáratspejka, jimajku ja je engajtsï jamberi uéakuntaska imani iretarhu.

¹¹ Ka ekajtsï nani nósesi eronhaska, ka nójtsï kurhajchanhani, uéakuntsï je, ka sési uauanduntsï je t'upuri, ísïksï mítetini jauatia eskaksï aiangunhaspkia.

¹² Jimajkanksï jurhengorhericha niraspti arhijpeni eska Diósïni andarhenhantapiringa.

¹³ Ka uánekua nóambaki espirituechanksï petarhpeantaaspti, ka uánekuaksï p'amenchatichani p'untsumiti atajtsïkuaparini ambakerantaaspti.

Juánu itsï atajtsïkpiriri uarhikua

¹⁴ Juramuti Erodesi Jesusiri ambe kurhaspti, jimboka iápuru isï mítekorhexapka ambe enga xáni uémpka. Máruksï uandasïrempti: “Juánu itsï atajtsïkpitisï tsíntatia, jimbosï xáni uinhapekua kámti.”

¹⁵ Ka Máteruksï uandasïrempti: “Eliasïsti.” Ka ístu uandanhasïrempti: “Diósïri uandari tua anapueni jásï mésti.”

¹⁶ Ka Erodesi ísï kurhajchpetini, uandaspti: –Juánuesti, ima engani ji kachujchakutarkorhepka, imasï tsíntati.

¹⁷ Jimboka Erodiasi arhispka Erodesini eska Juánuni jupirkorhepiringa, ka tiámu tepekata jimbo k'ataperakuarhu jótatarkorhespti. Jimboka Erodesi, Erodiasini kúrhetixapka, nájkiruka Erodiasi erachi jémba Filipueri témbepka.

¹⁸ Jimboka Juánu, Erodesini arhispka: “Nósesisti engari chéti erachiri uarhitini jinguni irekani jaka.”

¹⁹ Ka ísï jimbo, Erodiasi ikiakusïrempti Juánuni, ka uéksïrempti atani uándikuni, ka no úsïrempti.

²⁰ Jimboka Erodesi Juánuni chérhesïrempka ka jámberi kuájpesïrempti, jimboka mítespka eska ima ambakiti achetispka ka kaxumbitini, ka tsitisïrempti kurhajchani, nájkiruka ménichani nóteru jánhaskempka néna kámani.

²¹ Ma xanhari enga Erodesi k'uínchekua úntapka, jimboka máteru uéxurhini andaparhespka, p'urhejkutiri urhejtsïkurichani, ka Galilea anapu k'érati achamasïchani p'ímarheaspti. Ka Erodiasi jima xékuntaspti néna Juánuni atani uándikuni.

²² Imeri uájpa iurhitsïkiri k'uínchekuarhu uarhaspti. Ka Erodesi ka imeri pámpirichaksï kánekua jaiapanhentaspti eska ima na uarhapka, ka Erodesi imani uátsïni arisï aiakuspti: –Íntskuakakini ambe uéjkirini kurhacheni.

²³ Ka mémechani uéntaspti aiakuni: “Engari uéjka, jucheti juramukuakini terujkani jamberi íntskuaka, o ambe emangamenduri t'u uéjka.”

²⁴ Ka ima, uéraspti amambani kurhamarheni: –¿Ambesïni kurhakua? Ka Erodiasi arhispti: –Juánu itsï atajtsïkpiriri éjpuni kurhaku.

²⁵ Uátsï uiriaspti inchantani jima enga juramuti jápka, ka arhispti: –Uéksïnga eskari Juánu itsï atajtsïkpirini kachujchakuaka, ka axurini juáche éjpu, urhanirhu jatsiratini.

²⁶ Erodesi kómu p'ikuarheraspti, ka no úspti mómuntani jimboka uánekuechani japarini aiakorhespka.

²⁷ Ísï jámani p'urhejkutini ma axaspti eska Juánuni kachujchakupiringa, ka eska éjpu pákupiringa. P'urhejkuti Juánuni kachujchakuspti k'ataperakuarhu

²⁸ ka Juánueri éjpuni uátsïni pákuspti urhanirhu jatsiratini. Ka ima amambani íntskuntaspti.

²⁹ Engaksï Juánueri jurhengorhericha mítepka, nirasptiksï p'íntani ka jatsintasptiksï.

Jesusi uáni t'irerpespti

³⁰ Ka ísï tátsekua, Jesusiri uandakua párichaksï k'uanhatsentaspti Jesusini jinguni, ka iámendu ambeksï aianguntaspti eskaksï xáni ambe úpka ka engaksï xáni ambe jurhentpepka.

³¹ Ka ima arhiaspti: –Ju je támu niárani, mintsikorheni sáni, jima enga nónema jámka. Jimbokaksï t'ireni jamberi no andajkorhesïrempka, enga xáni niáranhempka.

³² Jesusiksï imeri uandakua páricha jinguni icharhutarhu ma jataspti ka iauanksï niraspti.

³³ Ka uánekua urhetku niáranhaspti, jimbokaksï eranguaspka

³⁴ Enga Jesusi icharhutarhu kétsepka, xéjpespti eska uánenhaspka ka p'amojkpespti, jimbokaksï ísï jámsïrempka eska karichicha engaksï no kángorhejka karichi erangutini, ka mámaru ambe jurhentpespti.

³⁵ Eka xatinipkia, imeri jurhengorherichaksï andarheraspti ka arhisptiksï: –Inchatiruestia, ka ixuesï nómbema akua japusti.

³⁶ Axajpentsï, jurajku ninhani iretecharhu t'irekua piákorhenhani.

³⁷ Ka Jesusi arhiaspti: –Cha t'irerpe je. Ka imaksï arhispti: –Xáni uáni t'irerpeni, jukari terujkani uéxurhini ánchekorheteri andakata uétarhesïndi, ¿Nénarisï uéjkia eskani jucha t'irerpeaka?

³⁸ Ka Jesusi arhiaspti: –Ni je exeni namoni kurhindajtsï kámaxaki. Ka engaksï exepka, arhisptiksï: –Iúmu echakuajkuesti kurhinda ka tsimani echakua kurucha.

³⁹ Ka arhijpespti eska uitsakuarhu táchani uaxandenhapiringa.

⁴⁰ Ka iúmu ekuatsechani ka tsimani ekuatse témbenichani kúngorhenhantaspti uaxakanhani.

⁴¹ Tátsekua, Jesusi kurhinda ka kuruchechani p'íkuaspti ka újchakuraaspti jini erancheparini, tátsekua k'urhinda ústaspti, ka jurhengorherichani etsakutaraaspti.

⁴² Ka iámenduechaksï uiniarhantaspti t'ireni;

⁴³ ka imani kurhinderi ka kurucheriksï, témbeni tsimani tsïkiata uiniriksï pakarata tánantaspti,

⁴⁴ Ka témbeni tsimani irepeta ka témbeni ekuatse (5,000) t'irenhaspti.

Jesusi itsïrhu parhijtsïkusti

⁴⁵ Tátsekua Jesusi arhiaspti imeri jurhengorherichani eskaksï icharhuta jimbo urhepantapiringa, japundani parhimentani, Betsaida isï jurhimberani, jimboka ima urheta tsîngpentapiringa.

⁴⁶ Ka enga jandiojku jápkia, juátarhu niraspti kómarhani.

⁴⁷ Ka enga chúrepkia, icharhuta terumeni isï niraxaptia. Ka Jesusi juátarhu uératini

⁴⁸ exeaspti eskaksï úkua jinguni xóajtaxapka, jimboka tarhiata k'uanhaskuantasïrempka. Enga erandeni jápkia. Jesusijtu niraspti andanguantaani icharhutani jatantani, ka uanopakuaxaptia.

⁴⁹ Engaksï jurhengorhericha exepka eska itsïrhu xanharaxapka, uandasïremptiksï eska uarhichespka, ka uinhachasptiksï xáni chéni,

⁵⁰ ka iámenduechaksï chérakorhespti Jesusini exerini. Ka Jesusi arhiaspti: –¡Ísku ja je! ¡Ásï ché je! ¡Jíska!

⁵¹ Ka jataspti icharhutarhu, ka tarhiata anhakuatsespti. Ka jurhengorherichaksï eratsentani pakareraspti,

⁵² jimbokaksï nótki jánhaskasïrempka, níjtuteruksï míauempkia enga Jesusi kurhinda uánerantapka, jimbokaksï no úsïrempka kurhanguni.

Jesusi ambakerantaasti Jenesareti anapu p'amenchatichani

⁵³ Engaksï Jenesareti niárapka, icharhutanksï japundarhu uanamukutini jómutaspti.

⁵⁴ Ka engaksï kétseni jápkia, sóntkuksï mítentaspti Jesusini.

⁵⁵ Ka uiriakorhenhaspti iretecharhu jima uanondani isï, ka uénasptiksï k'uírakuechani jimbo p'amenchatichani pérakuani, jima engaksï kurhauempka eska Jesusi jámaxapka.

⁵⁶ Nani enga Jesusi niárempka, iretecharhu o juátecharhu isï, p'amenchatichanksï xanhari jimbo petakuasïrempti, ka kómu arhisïremptiksï, eska jiáretaapiringa nájkiruka xukuparhakuajku jupirhukukuni; Ka iámendu engaksï andarhempka p'árheni, ambakentasïremptiksï.