San Marcos 4 - Diósïri Karakata P´urheepecha Jimbo

Tarheriri uandantskua terukutantskua

¹ Jesusi ménderu japundarhu uanamukuni jurhentpexapti, jimboka uánekua tángorhenhantaspka, ima k'éri icharhutarhu ma jataspti ka jima uaxarhukuspti ka k'uiripu uanamukutini pakaraspti.

² Ka uánekua ambeteru terukutantskuechani jimbo jurhentpexapti arhiaparini:

³ “Kurha je sési: Ma xanhari tarheri ma tríju jatsini niraspti,

⁴ ka eka na k'uájpani jápka, máruksï xanharirhu andatseraspti, ka kuínichaksï ántaspti.

⁵ Ka máteruksï tsakapendu andatseraspti, jima enga echeri no káni jápka; jima sóntku andaraspti, jimbokaksï no kánekua inchatsespka,

⁶ ka enga tata jurhiata andarapka, no ióndaspti k'arhiraani, jimbokaksï sïrangua no iauani páspka.

⁷ Ka máru tríju, uitsakuarhu andatseraspti, ka uitsakua sóntku tríjuni ópchakuraspti ka no úspti jaiarani.

⁸ Ka máteruksï tríju ambakiti echerindu andatseraspti, andarasptiksï ka k'éranksï, ka uánhachaniksï jukani; máruksï ma ekuatse ka témbenichani (30), máteruksï tanimu ekuatsechani (60), ka máteruksï iúmu ekuatsechani. (100)”

⁹ Ka Jesusi arhiasptiteru: “Ekajtsï jurhenaka kurhani, sési kurhangu je.”

Andisï Jesusi terukutantskuechani jimbo uandajki

¹⁰ Tátsekua, enga ninhantapkia, Jesusi pakaraspti témbeni tsimani jurhengorhericha jinguni, ka imaksï andarheraspti ka kurhamarhesptiksï, ima uandantskua terukutantskua ambe arhikuekasïrempki.

¹¹ Ka Jesusi arhiaspti: “Chájtsï mítetaranhaxaka Diósïri juramukua, enga nónema míteka, ka imechani engaksï uérakua jaka, terukutarantskuechani jimbojkuni aianguauaka.

¹² Ka náuejkiksï jángorhentani jarhani uékani exeni, nóksï exeati, ka náuejkiksï jángorhentani jarhani kurhani, nóksï úati kurhanguni; ásïksï imajtu andarhente Diósïni ka púamenhantanksï.”

Jesusi tríju jatsikutiri uandantskuani jánhastpesti

¹³ Ka ístu arhiaspti: “¿Nójtsï kurhanguntasïnki ambe enga arhikuekajka i terukutantskua? ¿Andi nénajtsï kurhangua máteru terukutantskuechani?

¹⁴ Tríju jatsikuti, uandakua aiangpitisti.

¹⁵ Ka tríju enga xanhari jimbo andatseraka, k'uiripunisï arhikuekani jati enga uandakuani jakajkujka, ka enga tátsekua Nóambakiti jurhajka mirikutaraani imani ambe engaksï kurhapkia.

¹⁶ Máteruksï ísïsti eska tríju enga tsakapurhu andatserapka: Kurhasïndiksï uandakuani, ka tsípepariniksï jakajkuni,

¹⁷ ka nóksï úsïndi sïrangua sési inchaskuni; ka engaksï imeri jakajkukua jimbo ts'éjkunhajka ka nóksï xénhchanhani, jurarkusïndiksï jakajkukuani.

¹⁸ Máteruksï ísïsti eska tríju enga uitsakuarhu andatserka: Kurhasïndiksï uandakuani

¹⁹ ka parhakpeni anapu ambe tsitikua, jatsikorhenhchakua enga tandojchpírika, ka máteru ambe xénhchakua, ka kánhchakua, andasïndiksï uandakuani ka nóksï úsïndi sési k'uiripeni.

²⁰ Ka jarhastiksï máteru engaksï uandakuani mintsita jinguni kurhajka ka jakajkunksï, ísï eska tríju enga ambakiti echerindu andatserajka. Imaksï k'óru sési k'uiripesïndi ka uánhachanksï íntspentasïndi, ma ekuatse ka témbenichani (30), tanimu ekuatsechani (60), ka iúmu ekuatsechani (100) ísï táchani.”

Erajkutarakueri uandantskua terukutantskua

²¹ Ka Jesusi arhiasptijtu: “Nónema erajkutarakua kápchakurasïndi o jatátsekuarhu ma inchajchukurini jískani. Erajkutarakua iótakuarhusï péranhajti, jima enga erajkutpeaka.

²² Ístu nómbema úsïndi jískakata jarhani, iámu ambe mítekorheati.

²³ Ekajtsï jurhenaka kurhani, sési kurhangu je.”

²⁴ Ka arhiasptiteru: “Sési kurhangu je. Ísï eskajtsï na ts'éretpeaka, májkuenijtsï ts'éretamenhantaaka ka jamberijtsï kúndamenhaaka.

²⁵ Jimboka ne enga jatsikorherikia, sánderu intsïnhaaka. Ka ima enga no jatsikorheka, sáni enga jatsikorheka imani jamberi euanhantaati.”

Tarheteri uandantskua terukutantskua

²⁶ Ka Jesusi uandasïremptijtu: “Diósïri juramukua májkuenisti eska tsíri jatsikua:

²⁷ Nájkiruka tarheri k'uíni jauaka o tsínharhitini jarhani, chúrekua ka jurhiakua pirani andarani jarhasïndi ka tarheta k'éni jarhasïndi, ka tarheri no mítesti néna k'éski.

²⁸ Jimboka iámendu ambe echerirhu inchatsetini úkorheni jarahasïnga: Pirani urheta andarasïndi, k'ésïndi ka píntsïta andatani, ka tátsekua tiriapu jukani.

²⁹ Ka enga xánini úkorhejka, p'ikunhantasïndia.”

Xakua ikarakueri uandantskua terukutantskua

³⁰ Ka Jesusi arhiasptijtu: “¿Andi Diósïri juramukua ambeni jáxeski? ¿Ambechi jinguni terukutantapirinki?

³¹ Xakua mostaseri ikarakueni jáxesti enga echerirhu ikaranhajka. Ma parhakpeni imeri tskípu sánderu sapinharhisti.

³² K'óru, enga andarka, iámendu xakuechani jinguni ima sánderu k'ésïndi, k'éxkurhisïndi, ka kánekua k'umantskasïndi ka jamberiksï kuínicha jima xerekua úsïndi.”

Jesusi terukutantskuechani úraasïndi

³³ Ka Jesusi ísï aianguasïrempti, eskaksï xántku úpiringa kurhanguni.

³⁴ Ka xántku isï járhati ambe jimbo aiangpesïrempti, ka mínhakorhetini imeri jurhengorherichanderku sési kurhangutarasïrempti.

Jesusi tarhiatani anhaxustaspti

³⁵ Imani jurhiatekua xatini, Jesusi arhiaspti imeri jurhengorherichani: –Juia je japundarhu parhimeni.

³⁶ Jarharpentasptiksï, ka pántasptisksï Jesusini imani icharhuta jimbo enga jatarini jápka, ka máteru icharhutechajtuksï chúxapaaspti,

³⁷ Ka mátirku uénaspti nósesi tarhiani, ka k'érati jenguerani, ka icharhutarhu itsï uinixaptia.

³⁸ Ka Jesusi icharhutarhu tátsepani k'uíxapti, sési iájchakorhetini, ka tsínharhitasptiksï ka arhinksï: –¡Jurhentpiri, uarhimexakachia! ¿Nájkiri t'u nómbema uandajki?

³⁹ Jesusi jauaraspti ka tarhiatani xukani, ka japundani arhini: –¡Ísku ja! ¡Pínasku! Tarhiata anhakuatsespti, ka iámu ambe sési niántaspti.

⁴⁰ Ka imeri jurhengorherichani arhiaspti: –¿Andijtsïsï chérakorhejki? ¿Andijtsïsï no jakajkujki?

⁴¹ Imaksï kánekua chérakorhespti ka arhijperanksï: –¿Néski i, enga tarhiata ka japunda jamberi kurhajchajka?