San Marcos 3 - Diósïri Karakata P´urheepecha Jimbo

Jesusi p'amenchatini ma sábadu jurhiatekua ambakerantasti

¹ Jesusi ménderu k'umanchekua tángorhentskuarhu inchaspti, ka jima jarhaspti acheti ma enga mápuru k'urhujkupka.

² Máruksï jinguntku jarhaspti Jesusini exeni enga k'urhujkurhani sábadu jurhiatekua ambakerantapiringa, ka xékuntanksï ambe arhiparhatani.

³ Jimajkani Jesusi acheti k'urhujkurhani arhispti: –Jauara ka terupekua niára. Arhini.

⁴ Ka kurhamarhpespti: –¿Ambesï sési jaki jiájkani sábadu jurhiatekua niátani: Sési ambe o nósesi ambe? ¿Nemani ambakerantani o jurajkuni eska uarhiaka? Imaksï pínasku pakareraspti.

⁵ Jimajkani, Jesusi ikiatini erateaspti, jimbokaksï mintsitani chuperaspka, ka acheti k'urhujkurhani arhispti: –Ióxurhantsï. Arhini. Ka ima acheti ióxurhantaspti ka ambaxurhantani.

⁶ Ka engaksï fariseuecha uéntapka tángorhentskuarhu, Erodesiri eratsekua chúngumaticha jingunksï úskuxapti, nénaksï jámapirini Jesusini uándikuni.

Japundarhu uanamukutini uánenhantasti

⁷ Tátsekua Jesusi niraspti japundarhu uanamukuni isï imeri jurhengorhericha jinguni, ka enga mítekorhepka eska k'éri ambe úsïrempka, uáni Galilea isï anapuechaksï chúxapaspti, ístuksï niraspti Judea uanondani isï anapuecha,

⁸ ka Jerusaleni anapuecha, ka Idumea uanondani isï anapuecha, ka Jordani iurhekuarhu parhikutini isï anapuecha, Tiro ka Sidoni uanondani anapuecha jamberiksï niraspti.

⁹ Jimajkani Jesusi arhiaspti imeri jurhengorherichani eskaksï jinguntku jatsipiringa icharhuta ma, jimbokaksï jámapiringa pucharani,

¹⁰ jimbokaksï xáni uáni p'amenchatichespkia engaksï jatajchakuni jápkia p'árhekuekani, ísï exeparini eska uáni ambakerantaaspkia.

¹¹ Ka engaksï nóambarhati espirituecha ísï exempka, tinguikuatsekusïremptiksï ka uinhachapariniksï arhisïrempti: –¡T'úri Diósï Uájpeska!

¹² Ka Jesusi xukaasïrempti eskaksï no jámapiringa uandantani.

Jesusi erakuasti uandakua párichani

¹³ Tátsekua Jesusi juátarhu ma karhamaspti, ka imechantku pájtaaspti enga ima erakuapka. Ka eka na márku janhapkia

¹⁴ témbeni tsimani erakuaspti engaksï pámbetapiringa ka enga axaapiringa arhijtsïkpetaraani.

¹⁵ Ka íntsaaspti juramukua eskaksï úpiringa nóambakitichani petarhpeantaani.

¹⁶ Arini témbeni tsimani erakuaspti: Simonini, enga tátsekua Pédru jakangurhipka;

¹⁷ Santiagu ka imeri erachi Juánu, Sebedeu uájpecha, enga tátsekua Boanerjesi arhiauempka, enga “Charandirecha” arhikuekajka;

¹⁸ ka arijtuksï erakunhaspti: Andresï, Felipe, Bartolome, Mateo, Tomasi, Santiagu Alfeu uájpa, Tadeo, Simoni (enga uarhipitipka)

¹⁹ ka Júdasï Iskarioti, ima enga tátsekua Jesusini sïpatapka.

Espiritu Sántuni útakuni

²⁰ Tátsekua Jesusi jurhengorhericha jinguni k'umanchekuarhu ma niáraspti. Ka nóksï jamberi úspti t'ireni jimboka xáni uáni tángorhenhantaspka.

²¹ Engaksï Jesusiri márkuecha mítepka, nirasptiksï p'íntani, jimboka uandanhasïrempka eska míakua tsítaspka.

²² Ka juramukua jurhentpiricha engaksï Jerusaleni uératini júpka, uandasïremptiksï: “Nóambakiti K'éri íntskusïndi uinhapekua enga újka nóambakitichani petarhejpeantaani.”

²³ Ka Jesusi ióarhiaspti imechani, ka terukutantskuechani jimbo aianguaspti: “¿Néna Nóambakiti jandiojku chúntakorhea?

²⁴ Eka ma juramukuarhu arhukurhinhaaka, imani juramukuarhu xerekorhenhaati.

²⁵ Ka enga ma k'umanchekuarhu arhukurhinhaaka, imani k'umanchekuarhu k'amakurhinhaati.

²⁶ Ka eka Nóambakiti arhukurhitini jauaka, ima xerekorhentaati ka k'amakurhini.”

²⁷ “Nónema úati acheti uinhapitini ma inchakuni ambe sïpakuni, urheta jótani uétarheati ka ísï k'óru úati iámendu ambe sïpakuni.”

²⁸ “Jíksïni sési jimbo arhixaka eska ne uéjki púamenhantaaka iámendu jásï k'amanharhintskuechani, nájkiruka nósesi uandariuaka.

²⁹ K'óru ima enga Espiritu Sántuni nósesi ambe arhiaka, nómeni púamenhantaati.”

³⁰ Íni ambe arhiaspti Jesusi, jimbokaksï arhispka eska nósesi jásï espirituni kámaxapka.

Jesusiri amamba ka erachicha

³¹ Ka enga i ambe úkorheni jápka, Jesusiri amamba ka erachi jémbechaksï niáraspti, ka uérakua jatiniksï uandajpatarkorhespti, jimbokaksï no úspka inchani.

³² Ka ima engaksï Jesusini uaxandatini jápka, arhistiksï: –Chéti nánde, ka chéti erachichaksïni uandajpaxati, uérakuaksï jarhasti.

³³ Ka ima arhiaspti: –¿Andi nésï jucheti nánde, ka andi néksïsï jucheti erachi?

³⁴ Ka imechani erateaparini engaksï uaxandatini jápka, uandaspti: –Íksïsï jucheti nándeti ka juchetiksï erachini.

³⁵ Jimboka ne enga imani ambe újka enga Diósï uéjka, imasï jucheti erachiti ka jucheti pirenchini ka jucheti nándeni.