San Marcos 2 - Diósïri Karakata P´urheepecha Jimbo

Jesusi ambakerantasti p'amenchatini ma enga no úempka manakorheni

¹ Namoni jurhia tátsekua, Jesusi ménderu inchaakuntaspti Kafarnaumi. Ka enga na mítekorhepka eska chénjembo jarhaspka,

² uáni tángorhenhaspti engaksï jamberi k'umanchekuarhu no jatamukurhempka; ka ima aianguasïrempti uandakua.

³ Ísï úkorhexapti engaksï t'ámu acheticha jimajku niárapka, achetinksï ma jupingurhirini pákuspti, enga no uémpka manakorheni.

⁴ Ka xáni uánenhaparini, nóksï úsïrempti Jesusini andarherani, ka ísï xérini eskaksï no úsïrempka andarherani, jiniksï karharaspti ka k'umanchekuarhuksï p'enojtsïkuspti, ka p'amenchatinksï jimesï kénhaspti k'uírakua jatsiakutini.

⁵ Eka Jesusi exepka eskaksï jakajkukusïrepka, p'amenchatini arhispti: –Jucheti uátsï, púamenhantaskaria.

⁶ Ka máruksï juramukua jurhentpiricha engaksï jima jápka uaxakatini, ísïksï p'ikuarhenhexapti:

⁷ “¿Andisï inde ísï uandajki? Diósïni tájpanharhikuxati, jimboka Diósïjkusï újka k'amanharhintskuechani púatspentani.”

⁸ Ka Jesusi sóntku p'ikuarhenhespti ambeksïsï eratseni jápi, ka ísï kurhamarheaspti: –¿Andijtsïsï ísï eratsejki?

⁹ ¿Andi ambe sánderu no úkua jukaski? Achetini enga no újka manakorheni, ¿Púamenhantaskaria arhini? O arhini: ¿K'arhakorhentsï k'uírakuani ka xanhara, arhini?

¹⁰ Mítetaraakaksïni eska Acheti Uájpa úsïnga k'amanharhintskuechani púatspentani jimboka ixu parhakpeni juramukua kámsïnga. Ka jimajku imani achetini arhispti:

¹¹ –T'úngenisï arhijka, jauara ka k'arhakorhentsï k'uírakua ka ni níntani.

¹² Ka ima acheti jauarapaspti, ka tarhatakorhentaspti k'uírakuani ka iámenduechani japarini uéntaspti. Ka jimajkani k'óruksï Diósïni iámenduecha k'éri ambe arhisïrempti, ísï arhipariniksï: –No ménichi xéxapka xásï ambe.

Jesusi ióarhisti Lebini

¹³ Tátsekua, Jesusi ménderu japundarhu uanamukuni isï niraspti; jima tángorhenhantasïrempti kurhajchanhani ka arhijtsïkuasïrempti.

¹⁴ Ka jima exemaspti Lebini, Alfeo uájpani, tumina tánakuarhu jarhaspti. Ka Jesusi arhispti: –Chúxapurini. Lebi jauaraspti ka chúxapaspti.

¹⁵ Tátsekua, Jesusiksï imeri jurhengorhericha jinguni, Lebioksï t'irexapti ka jimaksï jarhaspti máteru tumina tánaticha, ka nósesi ambe úricha, jimboka uánenhaspkia engaksï xáni Jesusini chúxapani jápka.

¹⁶ Máru juramukua jurhentpiricha, engaksï fariseuepka, engaksï exepka eska Jesusi imecha jinguni márku t'irexapka, Jesusiri jurhengorherichanksï kurhamarheaspti: –¿Andisï chári jurhentpiri tumina tánatichani jinguni ka k'amanharhintaticha jinguni márku t'ireni jaki?

¹⁷ Jesusi ísï kurhajchaatini arhiaspti: –P'amenchatichaksïsï tsinajpirini uétarhenchajti, no ima engaksï kaxumbitika, ji k'amanharhintstichanisïni juka ióarhiantani, no imechani engaksï sési jaka.

K'arhinda jakueri kurhamarhperakua

¹⁸ Jarhaspti ma jurhia engaksï Juánu itsï atajtsïkpiriri jurhengorhericha k'arhinda jápka, ka ístu fariseueri jurhengorhericha, ka máruksï Jesusini niraspti kurhamarheni: –¿Andiksïsï chéti jurhengorhericha no k'arhinda jarhajki, ka jiniksï Juánueri ka fariseueri jurhengorhericha k'óru k'arhinda jarhani?

¹⁹ Ka Jesusi ísï arhiaspti: –¿Andi ua nómbema anhani janhani jima enga tembuchakua úkorheni jarhajka ka tembucha jima jarhani? No úati.

²⁰ Ka niáraati jurhiata enga tembucha p'íkunhantaaka: Jimajkani k'óru k'arhinda janhaati.

²¹ “Enga xukuparhakua tamapu jiángorhejka nónema takusï jimbanhe jimbo maiarasïndi, jimboka takusï jimbanhe tskúntasïnga ka tátsekua jimbanhe sánderu tsapakurhini.

²² Nójtu úsïndi kauikua jimbanhe, sïkuiri tamapurhu xarhiperanhani, jimboka ióni jimbo kauikua k'úmentasïnga ka sïkuiri tamapuni katikuntani, ka ísï jámani tsimani ambeksï tsîjpesïndi.”

Sábadu juramukua

²³ Sábadu jurhiatekua ma, Jesusi tríju jatsikatarhu isï nitamaxapti, ka imeri jurhengorherichaksï uénaspti tríju kuarhajtsïkuni.

²⁴ Ka fariseuechaksï kurhamarhespti Jesusini: –Era chéti jurhengorherichani ¿Andi nóksï míteski eska juramukua no jiáretpesïnga íni jurhiatekua jimbo ánchekorheni?

²⁵ Ka ima ísï arhiaspti: –¿Andi nójtsï méni arhintaski Dabidi ambe enga úpka jiájkani enga k'arhimani p'ikuarherapka imeri pámpirichani jinguni? ¿Enga t'irekua nómbepka?

²⁶ Dabidi tiósïo inchaspti, jiájkani isï enga Abiatari táta k'éripka, kurhindechani auaspti engaksï Diósï míndakatepka, imeni jásï kurhinda engaksï tátechajku sésikua intsïnhajka arhani, ka imeri pámpirichantu íntsaaspti.

²⁷ Jesusi arhiasptiteru: –K'uiripusï úmenhati sábadu, ka no eska k'uiripu sábadueriuaka.

²⁸ Ka ísï jimbo, Acheti Uájpa sábadujtu juramukua jatsisti.