San Marcos 16 - Diósïri Karakata P´urheepecha Jimbo

Jesusiri tsíntskua

¹ Enga sábadu nitamapkia, Maria Magdalena, ka Maria, Santiagueri amamba, ka Salome, p'untsumekuechanksï piáspti engaksï Jesusini atarhentapiringa.

² Ka pauandekua xarhentku, enga jurhiata andarani jápkia, nirasptiksï jima engaksï uarhiricha jatsinhantajka,

³ ka arhijperapaxaptiksï: –¿Ka andi néjtsïni kénditacheaia tsakapu enga ómutakorheni jaka?

⁴ Ka engaksï na niárapkia, tsakapu t'uíni támu jarhasptia, náuejki ima tsakapu kánekua k'énharhipka.

⁵ Inchanhesptiksï jima nani enga Jesusi pénhantapka, ka jimaksï tumbini ma exespti, t'irerkandani uaxakatini jarhani, t'uput'upusï xukuparhatini, ka chérakorhesptiksï.

⁶ Ka ima tumbi arhiaspti: –Ásï che je. Chájtsï Jesusi Nasareti anapuni jirinhantaxamka, imani enga krúsirhu cháparhatanhaka. Nóteru ixu jarhastia, tsíntastia. Exetkiru jeia axu enga pénhantapka

⁷ Ni je imeri jurhengorherichani aianguaani, ka ístu Pédruni: Ima Galilea niraxati, jimajtsï exentaaka ménderu, ísï eskaksïni ima na arhirini jápkia.

⁸ Uarhitichaksï uiriapantaspti, manarapantani, ka nónemaniksï aianguspti, jimbokaksï chérakorhetixapka.

Jesusi Maria Magdalenani xarhakuntaspti

⁹ [Domingu juthiatekua tsípa, jiájkani enga Jesusi na tsíntapkia, Maria Magdalenani uénaspti xarhakuntani, imani Magdalenani enga iúmu tsimani nóambakitichani petarhetantaapka.

¹⁰ Ima máteruechani niraspti aianguantaani engaksï Jesusini p'amojkuni mískorheni ka uerani jápka.

¹¹ Ka nóksï jakajkukuspti nájkirukaksï kurhani jápka eska ima uarhiti Jesusini tsípiti exentaspka.

Jesusi xarhakuantasti tsimani jurhengorherichani

¹² Ísï tátsekua, Jesusi ménderueni xarhakuaspti máteru tsimani jurhengorherichani engaksï juátarhu nirani jápka.

¹³ Ka imajtuksï niraspti máteruechani aianguani; ka imajtuksï máteruecha májkueni no jakajkukuaspti.

Jurhengorhericheri ánchperata úkua

¹⁴ Ka tátsekua, k'ámarani jámania, Jesusi témbeni ma jurhengorherichani xarhakuantaaspti, engaksï t'ireni jápka. Ka arhinharhikuaspti jimbokaksï mintsitani chuperaspka ka jimbokaksï no jakajkukuaspka imechani engaksï exepka eska tsíntaspkia.

¹⁵ Ka arhiaspti: “Iámu parhakpentsï niuaka ambakiti aiangperakuani aiangpentani.

¹⁶ Ka ne eka jakajkuaka ka itsï atajtsïni, p'ímutantskateuati; ka ne enga no jakajkuaka, tsînchetini pakaraati.

¹⁷ Ka jakajkutichaksï íni ambe xarhataati: Jucheti juramukua jimboksï úati nóambakitichani petarhpeantani; ka úatiksï máteru uandakuechaniksï uandaani;

¹⁸ ka nómbemaksï úkorhenchaati náuejkiksï akuitsechani jupiani ka náuejkiksï uándikpetarakua itsïmani; ka p'amenchatichani p'ájtsïkuauati ka imaksï ambakentaati.”

Jesusiri kénchentskua

¹⁹ Ka enga Jesusi na k'amarapkia ísï uandani, p'íkunhantasptia auandarhu, ka Diósïri t'irerkandani uaxakaspti.

²⁰ Ka jurhengorherichaksï niraspti iápuru isï ambakiti aiangperakua aiangpeni, ka Acha jarhuatapasïrempti, jimbokaksï uandakuani milagruechani jimbo tsïrimerapasïrempka.]