San Marcos 15 - Diósïri Karakata P´urheepecha Jimbo

Jesusi Pilatuni japarini

¹ Ka táta k'ératichaksï xarhentku tánperantaspti achamasïcheri urhejtsïkuricha ka juramukua jurhentpiricheri urhejtsïkuricha jinguni, ka iámendu k'éri tángorhentskuarhu anapuecha. Ka Jesusiniksï jójkutini Pilatuni pérakuspti.

² Ka Pilatu kurhamarhespti: –¿Jeteru t'u judiouecheri irecheski? Ka Jesusi arhispti: –T'úri ísï uandaska.

³ Ka tátecheri juramutichaksï uánekua ambe arhiparhataspti,

⁴ Ka Pilatu ménderu kurhamarhespti: –¿Kurhaxakiri engaksïni xáni ambe arhinharhiparhatani jaka? ¿Nóri ambema uandakorhea?

⁵ Ka Pilatu ísku pakareraspti enga Jesusi nómbema mókukorhempka,.

Jesusiri uarhikua kurhajkorhekua

⁶ K'uínchekuarhu p'indekua jarhaspti eska Pilatu k'atakatani ma petantapiringa, imani enga k'uíripu kurajkorhentapiringa.

⁷ Ka Barrabasi máteru uándikpiticha jinguni jupikata jarhaspti, imecha jinguni engaksï márku jámempka uarhipeni.

⁸ Uáni niáranhaspti jima enga Barrabasi jápka ka arhisptiksï eska jurajkupiringa ma, eska p'indekuani no jurajkupiringa.

⁹ Ka Pilatu kurhamarhpespti: –¿Uéksïntsï eskaksïni judiouecheri irechani jurajkucheaka?

¹⁰ Jimboka mítespka eskaksï táteri juramuticha ipuperakua jimbojkusï pérakupka.

¹¹ Ka tátecheri juramutichaksï sóntku manatpespti eskaksï Barrabasini kurhajkorhentapiringa.

¹² Ka Pilatu ménderu kurhamarhpespti: –¿Ka ambe úkua indeni, engajtsï arhijka judiouecheri irecha?

¹³ Ka uinhachapariniksï arhispti: –¡Krúsirhu cháparhata! ¡Krúsirhu cháparhata!

¹⁴ Ka Pilatu kurhamarheaspti: –¿Andi ambechka nósesi úski? Ka imaksï sánderu uinhachaspti uandani: –¡Krúsirhu cháparhata! Arhani.

¹⁵ Ka Pilatu sési pakaratspeni uékani, Barrabasini intsantaaspti, ka Jesusini urheta k'uikirhetarkorhespti, ka tátsekua jurajkukuaspti eskaksï pápiringia krúsirhu cháparhatani.

¹⁶ Ka p'urhejkutichaksï Jesusini imecheri ekuarhu péraspti, ka iámenduksï p'urhejkuticha jima tángorhentaspti.

¹⁷ Ka irecherini jásïksï xukuparhatantaspti, ka kanakuaksï tsurhumueri úkata ma inchajtsïtaspti.

¹⁸ Ka teresmarhunksï ka uinhachakunksï uénaspti, arhiparini: –¡K'éri ambe arhinhe judiouecheri irecha!

¹⁹ Ka p'atamu jimboksï uájtsïskasïrempti atani, ka t'uánharikuniksï ka tinguixurhikusïremptiksï.

²⁰ Engaksï na k'ámarapkia teresmarhuni, irecheri xukuparhakuaksï p'ikuntaspti, ka ménderuksï imeri takusïni jatsikuntaspti, ka pásptiksïa krúsirhu cháparhatani.

Jesusi néna enga cháparhatanhapka

²¹ Ka juátarhu junguani jámani jimesï nitamantaxapti Simoni, Sirene anapu, enga Alejandrueri ka Rúfueri tátjembepka, ka p'urhejkutichaksï uinhapetarhu páraspti Jesusiri krúsini.

²² Ka Jesusiniksï Gólgota arhikatarhu péraspti (enga: “Uarhiriri únicha” arhikuekajka).

²³ Ka kauikuaksï uékaspti íntskuni, kauikua mirra jinguni jeuetakata, k'óru Jesusi no arhaspti.

²⁴ Engaksï na krúsirhu cháparhatapkia, p'urhejkutichaksï arhungurhispti, ch'anakua jimbo, Jesusiri xukuparhakuani.

²⁵ Ióndakuarhuesptia engaksï krúsirhu cháparhatapka.

²⁶ Ka krúsirhuksï chájtsïtaspti karakata ma enga arhimpka: “Judiouecheri irecha” arhini.

²⁷ Ka máteruksï tsimani kuárhukujpiticha Jesusi jinguni cháparhatanhaspti, ma jurhijkandani ka máteru uikixkandani.

²⁸ [Ísï jámani úkorhespti eska na karakata jaka: “Ka nósesi járhaticha jinguni miiunhantaspti.”]

²⁹ Ka k'uiripu enga jimesï nitamempka, manajtsïsïreptkiksï ka mámaruksï arhimasïrempti nitamani jámani: –¡Exekorhea! ¡T'u engari tiósïoni xerentapiringa, ka enga uandempka eskari tanimu jurhia jimbori úntapiringa!

³⁰ ¡Kuájpekorhechkia, ka kétsekorhentsïchu!

³¹ Ka tátecheri juramutichaksï ka juramukua jurhentpirichajtuksï teresmarhusïrempti, ka arhijperasïremptiksï: –Máteruechani kuájpeasti, ka inde k'óru no úsïndia kuájpekorheni.

³² ¡Eka Krístueka, ka israelicheri irecheni, kétsekorhentechka, eka kétsekorhentaska, jakajkukuakachi! Ka imajtuksï májkueni arhisïrempti engaksï márku cháparhatakorhetini jápka.

Jesusiri uarhikua

³³ Tátsekua pájpakandespti, teruxutini uénani ka téjkamatiru jamberi.

³⁴ Ka téjkamatiru Jesusi uinhachaspti: “Eloi, Eloi, ¿Lama sabaktani?” (Enga arhikuekajka: “Jucheti Diósï, jucheti Diósï, ¿Andirinisï jurajkia?”)

³⁵ Máru enga jima janhapka, ísïksï kurhajchatini, arhijperasïrempti: –Kurha je, Eliasïni ióarhixati.

³⁶ Jarhaspti ma enga uiriapka takusïni binagre jimbo kuakarhutani, ka p'atamurhu ma jórhukuspti ka Jesusini íntskuspti, arhiparini: –Eroki je, ju je exeni, nándika Eliasï juuaka késkuntani.

³⁷ Jimajkani Jesusi mátirku uinhamu mintsiraspti, ka uarhinia.

³⁸ Ka takusï k'uék'uetsasï enga tiósïo arhunhempka, terujkani karupakurhispti.

³⁹ Ka p'urhejkuticheri urhejtsïkuri, Roma anapu, enga jima jápka, exespti na enga Jesusi uarhipka, ka uandaspti: –Sési jimbo, i acheti Diósï Uájpespti.

⁴⁰ Ka jima no iauanksï eraaxapti Maria Magdalena, ka Salome, ka Maria, Joseri amamba ka Santiagu sapichueri amamba, máteru uarhiticha jinguni,

⁴¹ engaksï Galilea uératintki pámbetapuni ka jarhuatapuni jápka Jesusini. Ka ístu máteru uarhiticha engaksï Jerusaleni kúngorhepka.

Jesusiri jatsintskua

⁴² Xatinisptia ka t'irekua tánakuespti jimboka pauandekua sábadu jurhiatekuespka, enga judiouecha mintsikorhejka,

⁴³ Jose Arimatea anapu ts'iuentaspti ka niraspti andarherani Pilatuni ka sésikua kurhakuspti késkuntani Jesusini. Josejtu k'éri tángorhentskuarhu jámasïrempti, ka Diósïri irekuani erokorhexapti.

⁴⁴ Ka Pilatu, no jakajkusïrempti eska Jesusi uarhispkia, jimbosï p'urhejkuti urhejtsïkurini ióarhipti ka kurhamarhespti, na jatini uarhispi.

⁴⁵ Enga p'urhejkuti urhejtsïkuri aiangupkia, Pilatu íntspespti sésikua eska intsïnhantapiringa Jesusini.

⁴⁶ Ka Jose késkuntasptia Jesusini, ka takusï pitsïpiti ma jimbo irhispti, enga piápka, ka p'orhotarhu ma jatsintaspti, jima enga jarhanharhitarkorhepka, ka tsakapu jimbo ómutaspti.

⁴⁷ Maria Magdalena, ka Maria Joseri amambaksï, exexapti nani engaksï jatsintani jápka Jesusini.