San Marcos 14 - Diósïri Karakata P´urheepecha Jimbo

Jirinhakuntaxaptiksï néna Jesusini jupikani

¹ Páskueri k'uínchekua andamutani, enga tsimani jurhiaterku kueratani jápka, enga k'urhinda no xarhipiti jukari anhajka. Tátecheri juramuticha ka juramukua jurhentpirichaksï jirinhakuntaxapti nénaksï jupikapirini Jesusini ka sési arhiparinksï atani uándikuni.

² Ka máruksï uandasïrempti: –K'uínchekuarhu nómbe, jimboka ireta nósesi jámaaka uandakorheni.

Uarhiti ma Jesusini p'untsumekua atarhesti

³ Jesusi Betania niraspti, Simonio, enga xúta jukarikua jimbo mítenhapka. Ka enga t'irekua p'íjtsïtakuarhu uaxakapka, uarhiti ma niáraspti, tsúntsurhu ma p'untsumekua uiniratini enga kánekua jukaparhakuepka. Kakaspti tsúntsuni ka p'untsumekua Jesusini atajtsïkuspti.

⁴ Ka máru enga jima janhapka ikiasptiksï ka ísïksï arhijperaspti: –¿Andisï p'untsumekua ísku ambendarheia?

⁵ Sáno ma uéxurhini ánchekorhekata jimini nirasti, sánderu sésipirindi enga ataranhantapiringa ka tumina no jatsikorherichani íntsaani. Ka uarhitinksï arhindikperaparini arhinhchaxapti.

⁶ Ka Jesusi arhiaspti: –Jurajku je. ¿Nójtsï exesïni eskarini sési ambesï úcheka?

⁷ No jatsikorherichantsï úaka jarhuatani jarhani, jimbokajtsï méntkisï chánksïni jinguni jatsiauaka, ka na engajtsï jatini uékaaka úakajtsï jarhuataani; ka jíndentsïni no méntkisï chánksïni jinguni jámani jauaka.

⁸ I uarhiti jarhojpestia enga xántku inde úka: P'untsumekuarini atarhentastia engani jatsinhantani jámani atarhenhantapiringa.

⁹ Sési jimboksïni arhixaka eska iápuru ísï enga ambakiti aiangperakua aiangperanhani janhaaka eska jima míanhantaaka enga inde uarhiti jámaka.

Júdasï pakatperasti juramutichani jinguni

¹⁰ Ka Júdasï Iskarioti, enga témbeni tsimani jurhengorhericha jinguni miiukorhempka, uékaspti Jesusini sïpatani, ka niraspti tátecheri urhejtsïkurichani uandaxekuani.

¹¹ Ka imaksï kánekua tsípespti ísï kurhajchatini ka tuminaksï aiakuspti. Ka Júdasï jirinhakuntaxapti néna ch'anakupirini Jesusini ka intsïnharhitpentani.

Páskueri chúrekua anapu t'irekua

¹² Ka ima jurhiatekua enga k'uínchekua Páskueri uénakorhejka, enga k'urhinda no xarhipiti jukari anhajka, ka enga karichi uándikunhajka. Jesusinksï jurhengorheri jémbecha kurhamarhespti: –¿Naniri uéksïni eskaksïni Páskueri t'irekuani úchentaaka?

¹³ Ka tsimani jurhengorheri jémbechani axaaspti ka arhiaspti: Ni je Jerusaleni, ka ekajtsï achetini ma kúmaska enga k'amukua jimbo itsï páni jauaka; chúxapa je,

¹⁴ Ka nani enga inchantka, arhi je jima imani k'umanchekuarhu anapuni eska jurhentpiri kurhangorhexaka: ¿Nani ambandeski engani ji jucheti jurhengorherichani jinguni Páskueri t'ireaka?

¹⁵ Ka imaksïni páati k'umanchekuarhu miiurani, iótakuarhu enga sési tatsuntskakata ka ambantskakata jaka. Jimajtsï úntaaka juchari t'irekua.

¹⁶ Ka jurhengorherichaksï, niraspti iretarhu ka iámendu ambeksï kúntaspti, eska Jesusi na arhiapka, ka jimaksï úntaspti Páskueri t'irekua.

¹⁷ Ka Jesusi témbeni tsimani jurhengorherichani jinguniksï chúrekua niraspti jima.

¹⁸ Ka enga t'irenhani jápka, Jesusi arhiaspti: –Sési jimboksïnisï arhixaka eska jíndeni jinguni t'irexaka, ima engarini sïpataaka.

¹⁹ Ka imaksï kómu p'ikuarheraspti enga ima ísï arhiapka ka mándani arhisptiksï kurhamarheni: –¿Jíski?

²⁰ Ka Jesusi arhiaspti: –Cha ma ísïskajtsï, ima enga jíndeni jinguni atarhutani jaka kurhinda.

²¹ Acheti Uájpa jatsisti xanharini andarani eska karakata na jaka; ¡Násï úkorhenchaa ima enga Acheti Uájpani íntsïnnharhitpeaka! Sánderu sésipirindi eska no kángorhenhapiringa.

²² Engaksï t'ireni jápka, Jesusi kurhinda jupikaspti ka újchakuraspti ka k'epekuspti, ka íntsaaspti ka arhiaspti: –Jupika je, ka a je, i jucheti anhanhatakuesti.

²³ Tátsekua itsïmatarakuani p'íkuspti, ka Diósïni diósïmaiamukua arhispti ka íntsaani, ka iámendu itsïmanhaspti.

²⁴ Ka arhiaspti: –I jucheti iurhiristi, ka íni iurhiri jimbo pakatajperanhaati enga uánekuecheri jimbo sésiuaka.

²⁵ Ka sési jimboksïni arhixaka eskani nóteruni méni itsïmaakia úberi itsïrhukua, Diósïri juramukuarhia ménderu, imani jurhia engani úberi itsïrhukua jimbanhe itsïmaaka.

Jesusi aiangpespti eska Pédru no míteni uandapiringa

²⁶ Ka tátsekua engaksï na jakajkuticheri pirekuechani máru pireapkia, juátarhuksï nirasptia, imani juátarhu enga Olibusï arhinhajka.

²⁷ Ka Jesusi arhiaspti: –Chájtsïni iásï churekua iámeduecha, nóterujtsïni jakajkucheaka. Jimboka ísï karakata jarhaska: Karichichaksï etsapakurhiati ekani ataska karichi erangutini.

²⁸ Tátsekua ekani na tsíntaakia, jíksïni urhechepantaaka Galilea.

²⁹ Ka Pédru arhispti: –Jíkini nómeni jurajkuaka, náuejkiksïni iámenduecha jurarkuni.

³⁰ Ka Jesusi mókukuspti: –Sési jimbokini arhixaka, eska t'arhechu nótki tsimani xanhari uerani jauaka, ka t'úrini t'uíni tanimu xanhari no míteni uandaakia.

³¹ Ka Pédru sánderu arhisïrempti: –No ménikini no míteni uandaaka, náuejkini t'úngeni jinguni uarhini. Ka máteruechajtuksï májkueni arhisïrempti.

Jesusi Jetsemani kómarhaspti

³² Tátsekuaksï niraspti jima enga Jetsemani arhinhajka. Ka Jesusi arhiaspti imeri jurhengorherichani: –Ji nirasïnga uandamukukorheni, ixujkujtsïni erontsï je uaxakatini.

³³ Ka Pédruni ka Santiaguni ka Juánuni pájtaaspti, ka uénaspti kómu p'ikuarherani ka uandanheani.

³⁴ Ka arhiaspti: –Uarhintaxaka kómu p'ikuarhenheni, enajkirini uarhikua janocheni jakiia; ixu pakara je ka ásï jáma je k'uíni.

³⁵ Jima sántku urhepani kápatsetini kómarhispti Diósïni eska, enga úpiringa, kénditakupiringa imani ambe enga jurhani jápka.

³⁶ Ka arhisïrempti Diósïni: “¡Abba, Táte! Úsïngari iámendu ambe úni, kénditacherini ini nósesi jámarha ambe, k'óru ásï ima úkorhee engani ji uéjka, ima úkorhe eskari na t'u uéjka.”

³⁷ Tátsekua enga k'uanhatsentapka, jurhengorherichaksï t'uíni k'uíxaptia. Ka Pédruni arhispti: –Simoni, ¿K'uixakiri? ¿Nórini úski sóndi pámbetani?

³⁸ Asï k'uíni ja je, ka uandamukukorheni ja je, nóksïni terungutpiri andani. Jimboka chári espíritu uékani jarhasïnga, enga úka chájtsï sóntku jurajkutakorhesïnga.

³⁹ Ka Jesusi niraspti ménderu ka májkueni uandamukukorheni.

⁴⁰ Ka enga ménderu k'uanhatsentapka, ménderuksï t'uíni k'uíxaptia, jimbokaksï uarhixapka k'uínchani. Ka nóksï jánhaskasïrempti ambe arhini Jesusini.

⁴¹ Tanimu xanhari k'uanhatsentatini arhiaspti: –¿Andi útasterujtsï k'uíxaki? ¿Andi útasterujtsï mintsikorhexaki? ¡Sésku jarhastia! Iásïsï Acheti Uájpa k'amanharhintsticheri jájki jimbo íntspenhantaatia.

⁴² Jauara je, iáchka je; janoxatiia inde engarini íntspeaka.

Enga Jesusi jupinhapka

⁴³ Jesusi útasï ísï uandaxaptiteru enga Júdasï uánekuecha jinguni niárapka, ima Judasï enga imeri jurhengorheripka, chkári ka atajpetarakuechanksï anhajkutini. Ka imajtuksï niraspti engaksï tátecheri urhejtsïkuricha axaapka ka ístu engaksï juramukua jurhentpiricha axaapka ka engaksï achamasïcha axaapka.

⁴⁴ Júdasï arhiarixaptia: “Imeuati engani ji putinharhikuaka, sési jupikatini pa je.”

⁴⁵ Ka enga Judasï niárapka, andarheraspti Jesusini ka arhispti: –¡Jurhentpiri! Arhini. Ka putinharhikuspti.

⁴⁶ Ka sájparherasptiksïa Jesusini jupikani.

⁴⁷ K'óru nema tiámu atajpetarakua p'ijpaarhaspti ka kachujpandikuspti k'éri táteri jántspirini.

⁴⁸ Ka Jesusi arhiaspti: –¿Andijtsïnisï ísï juki jupikani, enajkini ambe ji sïpajkurhe, chkári ka tiámu atajpetarakua jupikatini?

⁴⁹ Pauanipauani cha jinguni jamaxapka tiósïo jurhentpeni, ka nójtsïni jupikaska. Enga úka i ambe ísï úkorhexati jimboka ísï karakata jarhaska.

⁵⁰ Ka iámendu jurhengorherichaksï sïpakorhespti, ka Jesusiniksï jandiojku jurarkuni.

⁵¹ Ka jimaksï jupikaspti tumbini ma, enga Jesusi jinguni jámani jápka ka enga takusï ts'irimbiti májku p'amantkukorhetini jápka.

⁵² Ka ima tumbi takusï ts'irimbiti jurarkuspti ka nómbe ma jukarini uiriaspti sïpakorheni.

Jesusi k'éri tángorhentskuarhu

⁵³ Tátsekuaksï Jesusini k'éri tátani pérakuspti, ka jimaksï tángorhentaspti iámendu tátecheri juramuticha, ka achamasïcha, ka juramukua jurhentpiricha.

⁵⁴ Pédru jima jamberi chúxapaspti, k'éri táteri k'umanchekuarhu ekuarhu jamberi, ka uaxakaspti ka tiósïo anapu kuárichani jinguni jurhentani pakareraspti.

⁵⁵ Ka táteri urhejtsïkurichaksï, ka iámendu engaksï tángorhentapka, jirinhakuntaxaptiksï ambe arhimetaparinksï Jesusini uándikupirini, ka nóksï ambe ma xékuntaspti.

⁵⁶ Uánekuaksï arhiparhatasïrempti chkuándiraparini, enga úpka nómbema terukuntasïrempti.

⁵⁷ Máruksï anhaxurhispti ka chkuándiraparinksï Jesusini arhijpekuspti:

⁵⁸ –Jucha ísï kurhajchaska: “Ji íni tiósïoni xerentaaka engaksï parhakpeni anapuecha úka, ka tanimu jurhia jimbo úntaaka máteru enga no parhakpeni anapu úaka.”

⁵⁹ Ka náuejki ísï, nóksï úsïrempti uandakuechani terukutaani.

⁶⁰ Ka k'éri táta jauaraspti, ka kurhamarhespti Jesusini: –¿Nóri ambe ma uandaa? ¿Ambeski i ambe engaksïni xáni arhini jaka?

⁶¹ Ka Jesusi nómbe ma mókukuspti, pínasku jarhaspti. Ka k'éri táta ménderu uéntaspti kurhamarheni: –¿T'úsï Krístue? ¿T'úsï Diósïri újchakurakata Uájpe?

⁶² Ka Jesusi arhispti: –Jo Jíska. Ka Acheti Uájpanitsï Diósïri uinhapekuarhu jurhijkandani xéaka enga uaxakatini jauaka, ka enga janikuarhu junguani jauaka.

⁶³ K'éri táta xáni ikiani tsapandurhispti takusïni enga xukuntatini jámani jápka, ka arhiaspti: –¿Ambeteruchisï úraia sándenderu uandantstichani?

⁶⁴ Kurhajchakorheskajtsïa eska Diósïni uéksïnga tájpanharhikuni. ¿Nénajtsï xésïni? Ka iámenduechaksï uandaspti eska ísï uandarini uarhikua andakorhespka.

⁶⁵ Máruksï t'uánharhikuspti, ka ónharhikusptiksï ka p'iaranksï kanharhikua atakuni, arhipariniksï: –¿Arhitki nékini ataia? Ka tiósïo kuárichajtuksï ataspti.

Pédru Jesusini no míteni uandaspti

⁶⁶ Enga Pédru ekuarhu kétsekua jápka, uarhiti ma nitamaxapti, k'éri táteri jántspiri ma;

⁶⁷ ka enga na exepka Pédruni eska imajtu jima jurhentaxapka, eratespti ka arhini: –T'újturi Jesusi Nasareti anapu jinguni jarhaspka.

⁶⁸ Ka Pédru arhispti: –Ji no míteska, níjtuni kurhangujki amberisï uandani jaki. Ka enga uéntapka jamukutini, t'arhechu ma ueraspti.

⁶⁹ Ka ima uarhiti ménderu exespti Pédruni ka máteruechani arhiaspti: –Indejtu imani jinguni jámaxapti.

⁷⁰ Ka Pédru ménderu no míteni uandaspti. Sáni tátsekua, máteruechaksï ménderu arhispti Pédruni: –Sési jimbo t'újturi imecha jinguni jámka, jimbokari Galilea anapueska.

⁷¹ Ka Pédru uénaspti uinhamu ka ikiatintku uandani: –¡No míteska indeni achetini engajtsïni arhini jaka!

⁷² Ka ménderu t'arhechu ueraspti ka Pédru míantaspti eska Jesusi arhispka: “T'arhechu nótki tsimani xanhari uerani jauati engarini t'u t'uini tanimu xanhari no míteni uandaakia.” Ka jurajkutakorhentaspti uerani.