San Marcos 11 - Diósïri Karakata P´urheepecha Jimbo

Jesusi irecheni inchaakuntasti Jerusaleni

¹ Engaksï Jerusaleni andaparhakuerani jápkia, Betfage ka Betaniaksï niáraxapti, Olibusïrhu juátarhu isï, jima uératini Jesusi axaaspti tsimani jurhengorheri jémbechani,

² íni uandakua jinguni: –Ni je amani iretarhu engajtsï eraani jaka, ka ekajtsï na niárajka, ch'anchakini májtsï jima xéaka enga nótki nema jatajka, jima jótakata jauati. Kuerata je ka juáchejtsïni.

³ Engaksïni nema kurhamarheska. ¿Andijtsïsï kueratani jaki? Arhiakajtsï eska Acha úraaka, ka eska sóntku juánguaka.

⁴ Imaksï niraspti, ka ch'anchakinksï xéntaspti, enga xanharu k'umanchekuarhu jamukutini jótakata jápka, ka kueratasptiksï.

⁵ Ka máru engaksï jima jápka kurhamarheasptiksï: –¿Ambejtsï úsïnki? ¿Andijtsïsï ch'anchakini kueratani jaki?

⁶ Ka imaksï ísï arhiaspti eska Jesusi na arhistakuapka; ka jurajkukuasptiksïia.

⁷ Imecheri sununda ambeksï tatsuparhakuaspti, ka Jesusiniksï pákuspti, ka ima jataspti.

⁸ Xanhari jimboksï uánekua sunundechani ambe, ka pímu tatsuntskarakusïrempti engaksï juátarhu isï p'ikupka.

⁹ Ka iámendu engaksï xáni urhekupempka ka chúxapanksï, uinhamuksï mintsitapasïrempti: –¡K'uájpetsïni! ¡T'u újchakurakata, engari Acheri juramukua jimbo jurhani jaka!

¹⁰ ¡Újchakurakatesti juramukua enga janoni jaka, juchari Táte Dabiri juramukua! ¡K'uájpejtsïni auandarhu uératini!

¹¹ Jesusi Jerusaleni inchaakuspti, ka tiósïo niraspti. Ka iámendu ambe exespti, ka tátsekua imeri témbeni tsimani jurhengorherichani jinguni Betania niraspti, jimboka chúrexapkia.

Jesusi xukasti jígusïni enga no úempka jukani

¹² Ka pauandekua, engaksï uéakuntani jápka Betania, Jesusi úndaspti k'arhimani.

¹³ Ka iauani jatini exespti jígusïri anhatapuni ma enga xuxunhaxkurhipka, ka andarheraspti erarhutani nándika jukapka jígusï, ka chkúrhichantku erarhutaaspti, jimboka nótki jígusï jukakuespka.

¹⁴ Ka xukajchaspti jígusïni, arhispti: –¡Ásteru méni anhe chéti amanhejchakua! Ka imeri jurhengorherichaksï kurhaspti.

Jesusi tiósïo ambantskantasti

¹⁵ Tátsekuaksï Jerusaleni niáraspti, ka Jesusi tiósïo inchaspti ka petantaaspti imechani engaksï jima atarantani ka piáni jápka. Ka imechani engaksï tumina mójtakutspeni jápka, kéjpatarakua xerekuantaaspti, ka imechantu májkueni káaspti engaksï jipunhichani atarantaani jápka;

¹⁶ Ka nónemani jiáretasïrempti eska tiósïo ísï parhikutapiringa atarantskua.

¹⁷ Ka jurhentpeni uénaspti uandaparini: –Karakatarhu arhisïndi: Jucheti k'umanchekua iámendu iretecheri kómarhijpetarakuesti. Ka chájtsï kuárhukujpiticheri irekua úntaskia.

¹⁸ Engaksï tátecheri juramuticha ka juramukua jurhentpiricha íni ambe kurhapka, uénasptiksï jirinhakuntani nénaksï atapirini uándikuni Jesusini, jimbokaksï chérhesïrempka enga imeri jurhentperakua jimbo iámenduecha ísku pakaranhempka.

¹⁹ Enga na chúreni jápkia, Jesusi uéakuntaspti iretarhu imeri jurhengorhericha jinguni.

Jakajkukueri jurhentperakua

²⁰ Pauandekuaksï ménderu jígusïrhu isï nitamaspti, ka exesptiksï eska iámu k'arhispkia.

²¹ Ka Pédru, miántaspti Jesusi néna enga uandapka, ka arhispti: –Jurhentpiri exe, k'arhistia jígusï engari nósesi arhipka.

²² Ka Jesusi arhispti: –Mintsika je Diósïni.

²³ Jíksïni jurhimbitkusï arhini jaka eska, eka nema indeni juátani arhiaka: ¡Kéndikorhe ka japundarhu uekame! Arhini. Ka eka jakajkuparini ka nósani tsimanitsimanheaparini ísï eratseaka, ísï úkorheati.

²⁴ Jimboksïnisï arhini jaka eska iámendu ambe engajtsï kómarhijpekorheni jauaka, mintsika je eskajtsï intsïnhaskia, ka intsïnhaakajtsï.

²⁵ Ka ásï nemani jatanhekutini uandamukukorhe je, ekajtsï nemani jatanhekutini jaka, púakuntsï je, ka chári Táte enga auandarhu jaka, imajtuksïni májkueni púachentaati chári k'amanharhintskuechani.

²⁶ [Jimboka ekajtsï cha no púatspentaska, chánksïntuksïni Táte enga auandarhu jaka no puáchentaati chári k'amanharhintskuechani.]

Jesusiri juramukua

²⁷ Tátsekuaksï ménderu Jerusaleni niántaspti. Ka enga Jesusi tiósïo isï jámani jápka, tátecheri juramuticha, ka juramukua jurhentpiricha ka k'érati tatechaksï andarheraspti

²⁸ ka kurhamarhenksï: –¿Náki juramukua jimbori ísï ambe úxaki? ¿Nékini íntskuski juramukua indeni ambe úni?

²⁹ Ka Jesusi arhiaspti: –Jíjtuksïni kurhamarheaka ambe ma: Arhijtsïni je, ka jíjtuksïni arhiaka náki juramukua jimbo íni ambe úxaki.

³⁰ ¿Ne axaspki Juánu itsï atajtsïkpirini? ¿Diósï, o parhakpeni anapuecha?

³¹ Ka imaksï arhinhaskperaspti: “Engachi arhiska eska Diósï axaspka, arhiatijtsïni, ka: ¿Andijtsïsï no jakajkukupkia?

³² ¿Ka nénachisï arhia eskaksï parhakpeni anapuecha axaspka?” Ísïksï arhispti jimbokaksï k'uiripuni chérhesïrempka, ka jimboka mítekata jarhaspka eska Juánu Diósïri uandarispka.

³³ Ka ísï jimboksïsï arhipti: –Nóchi míteska. Ka Jesusi arhiaspti: –Jíjtuchkaksïni no arhiakia náki juramukua jimbo íni ambe úxaki.