San Marcos 1 - Diósïri Karakata P´urheepecha Jimbo

Juánu itsï atajtsïkpiri, jimesï enga nónema irekaka

¹ Jesukristueri ambakiti aiangperakua ísï uénasïndi, [ima enga Diósï uájpeka.]

² Isaiasï, Diósïri uandari ísï karasti: “Jucheti uandakua párinikini urhetatachepaxaka engakini xanharini ambantskachentapaaka.

³ Nema uinhachaparini, ísï uandaxati jimesïsï enga nónema irekaka: Ambantskarakuntsï je Diósïni ka jurhimbitku jásï ma xanhari mítaku je.”

⁴ Ísï jimbo, Juánu itsï atajtsïkpiri jimesï jámaspti enga nónema irekaka, ka arhijtsïkpesïrempti eska uétarhesïrempka Diósïni andarhentani, ka itsï atajtsïni, ka eska ísï jámani Diósï púakuantauaka.

⁵ Judea ka Jerusaleni isï anapuechaksï nirasïrempti kurhajchani. Ka p'amongorhentasïremptiksï, ka Juánu itsï atajtsïkuasïrempti iurhekuarhu enga Jordani arhinhajka.

⁶ Juánueri xukuparhakua kameiueri jauiri jimbo úkatespti, sïkuiri jóangorhesïrempti; chóchuechani ka juátarhu anapu tékua t'iresïrempti.

⁷ Ka ísï arhijtsïkpesïrempti: “Jurhaxati máteru Acheti sánderu k'éri ambe, ima engani ji no jamberi nitatarheka kuarhachichani kuerandukuani.

⁸ Jíksïni itsïjkusï atajtsïkuni jaka; ka imaksïni k'óru Espiritu Sántuni jimbo atajtsïkuati.”

Jesusiri itsï atajtsïkua

⁹ Imani jurhiatekuechani, Jesusi uéakuspti Nasareti enga Galilea isï jaka. Ka niraspti iurhekuarhu enga Jordani arhinhajka ka Juánu jima itsï atajtsïkuspti.

¹⁰ Uémentani jámani, Jesusi exespti eska auanda mítakorhexapka ka eska Espiritu kétsexapka imani andajtsïkuerani, jipunhini jáxespti.

¹¹ Ka auandarhu anapu uandakua ma kurhakorhespti, enga ísï uandani jápka: “T'úri jucheti uátsïtiska, engani ji xáni xénhchajka, ka ji t'úngeni jimbo kánekua tsípesïnga.”

Jesusiri ts'éjkukua

¹² Ka tátsekua, Espiritu Jesusini jimesï páspti enga nónema irekaka.

¹³ Ka tsimani ekuatse jurhia jarhaspti jima engaksï púkicha ka jiuatsïcha ka akuitsecha irekajka ka Nóambakiti Jesusini ts'éjkusïrempti, ka ánjelichaksï marhuakusïrempti.

Jesusiri aiangpekua

¹⁴ Ísï tátsekua, enga Juánu k'ataperakuarhu ónhanhapka, Jesusi Galilea isï niraspti Diósïri ambakiti aiangperakuani uandantani.

¹⁵ Ka ísï arhijpesïrempti: “Janoxati jurhiatekua, Diósïri juramukua janoxatiia. K'uanhatsentsï je Diósïri xanharirhu, ka imeri ambakiti aiangpekuani mintsita jinguni jakajku je.”

Jesusi ióarhiasti t'ámu uarhurichani

¹⁶ Enga Jesusi Galilea anapu japundarhu uanamukutini nitamani jápka, Simonini ka erachi jémba Andresïni exeaspti. Imaksï kurucha p'itamani jámaxapti, jimbokaksï kurucha p'itamatispka.

¹⁷ Ka Jesusi arhiaspti: –Chúxapujtsïni je, nóterujtsï kurucha p'itamatiuakia, iásïjtsï k'uiripuni tánani jámaakia.

¹⁸ Imaksï jurarkuaspti kurucha p'itamatarakuechani ka chúxapasptiksï.

¹⁹ Sántku urhepatini, máteru k'éri icharhutarhu, Jesusi Sebedeo uájpechani exeaspti, Santiaguni ka Juánuni, cheremakuechanksï sïriantaani jarhani,

²⁰ ióarhiaspti ka imajtuksï chúxapaspti, ka tátjemba Sebedeoni ka imeri jarhojpirichanksï icharhutarhu jurarkuaspti.

Jesusi nósesi jásïni xukaspti

²¹ Tátsekuaksï Kafarnaumi niraspti, ka sábadu jurhiatekua Jesusi k'umanchekua tángorhentskuarhu inchaspti, ka jurhentpeni uénaspti.

²² Ka imeri jurhentperakuani kurharini ísku pakareranhasïrempti, jimboka jarhamekua jinguni uandasïrempka, no ísï eskaksï máteru juramukua jurhentpiricha.

²³ Ka acheti ma enga nósesi jásï incharhetini jápka ima k'umanchekua tángorhentskuarhu jarhaspti, ka ima nósesi jásï Jesusini uinhamu arhispti:

²⁴ –Jesusi Nasareti anapu ¿Andijtsïnisï inchaakuchejki? ¿K'amajkuntsïni jurhaski? Jíkini míteska eskari Diósïri Sántueska.

²⁵ Ka Jesusi nósesi jásïni xukaspti, ísï arhiparini: –¡Pínasku ja! ¡Uérhentsï indeni achetini!

²⁶ Ka nósesi jásï, jiuakorheparini uérhentaspti achetini; matsïmatsïtantaspti nóna uérhentani.

²⁷ Ka chérakorhenhaspti, ka kurhamarhperasïremptiksï: –¿Ambeski i ambe? ¡Jimbanhe ambe ka juramukua jinguni jurhentpesïndi! ¡Ka nósesi jásï espirituechantu juramukuasïndi, ka kurhajchasïndiksï!

²⁸ Ka sóntku mítekorhespti Jesusiri ambe, Galilea uanondani isï.

Jesusi ambakerantaspti Simoniri tarhampirini

²⁹ Engaksï k'umanchekua tángorhentskuarhu uéntapka, Jesusiksï Simoni ka Andresïri k'umanchekuarhu niraspti; Santiagu ka Juánu jinguni.

³⁰ Ka Simoniri tarhampiri apondikuspti jimboka kánekua tinharaxapka. Eka Jesusi aiangunhapka,

³¹ andarheraspti ka jupijkuspti ka jauatani, ka ima tinharakua jupinapaspti, ka sóntku marhuakuaxaptia.

Jesusi p'amenchatichani ambakerantaasti

³² Tirimarhanduksï Jesusini pérakuaspti uánekua p'amenchatichani ka nóambakiti jukaratichani,

³³ ka imani k'umanchekuarhu jamukutini uánekua tángorhenhantaspti.

³⁴ Ka Jesusi uánekua ka mámaru jásï p'amenchatichani ambakerantaaspti, ka nósesi jásï jukaratichani petarhetantaaspti; ka no jiáretaasïrempti eskaksï nóambakiticha uandapiringa, jimbokaksï mítespka ima néspki.

Jesusi Diósïri ambakiti aiangperakuani aiangpesti

³⁵ Ka k'éri xarheni, sïuapentku, Jesusi jauaraspti, ka niraspti jandiojku uéramani isï uandamukukorheni.

³⁶ Simoni ka imeri pámpirichaksï niraspti Jesusini jirinhantani,

³⁷ engaksï na xéntapka arhisptiksï: “Iámenduechaksïni jirinhantani jámaxati.”

³⁸ Ka ima arhiaspti: “Ju je máteru iretecharhu engaksï ixujku isï jaka uandakua arhijtsïkpeni, jimbokani indeni únisïni juka.”

³⁹ Iámu Galilea isï, Jesusi nirasïrempti iámendu iretecharhu anapu k'umanchekua tángorhentskuecharhu, uandakua arhijtsïkpeparini ka ístu nóambakitichani petarhpeantaparini.

Jesusi xúta jukarhekorhetini ma ambakerantasti

⁴⁰ Acheti xúta jukarhekorheti ma, Jesusini andarheraspti, ka tinguixurhikutini arhispti: “Engari uékaaka, úakarini p'ikurhentani jucheti p'amenchakuani.”

⁴¹ Jesusi p'amojkuspti, ka p'árheni ka arhispti: “Uéksïnga. ¡Ambakentsïa!”

⁴² Ka p'amenchati xúta jimajku iámu uauarhekorhentaspti, ka ambakentaspti.

⁴³ Ka Jesusi axantani jámani arhispti:

⁴⁴ “Kurha, ásï nemani aiangu; tátantku ni andarherani, jurajkukini exekorheni eskari ambakentaskia, eskaksï míteaka eska ísïska, ka pa kéjtsïtakua eska Moisesiri juramukua na arhijka.”

⁴⁵ Enga úpka, ima acheti sóntku iámu ambe uandantaspti eska xáni ambe úkorhepka. Ka ísï jimbo Jesusi nóteru úsïrempti iretecharhu inchaakuni, uéramani ísku niárasïrempti, jimajku isï enga nónema jámempka; ka náuejki ísï, jimaksï nirasïrempti iápuru anapuecha exeni.