San Lucas 8 - Diósïri Karakata P´urheepecha Jimbo

Uarhiticha engaksï Jesusini jarhuatempka

¹ Tátsekua enga i ambe úkorhepka, Jesusi uánekua ireta k'ératicharhu ka ireta sapirhaticharhu jámaspti, Diósïri irechekua jimbanhe aiangperakuani arhijtsïkpeparini. Ka témbeni tsimani jurhengorherichaksï pámbetapaxapti,

² ka ístuksï máru uarhiticha pámbetapaxapti enga ima ambakerantaapka ka máru enga nósesi járhati espirituechani petarhetantaapka. Imani uarhitichani jinguni niraxapti, Magdalena arhikata ka Juanajtuksï jima niraxapti, ima Juana engaksï iúmu tsimani nóambakiticha uérhentapka;

³ Kúseri témba, ima enga Erodesiri patsaripka ka Susana, ka uánekuateruksï uarhiticha engaksï jatsikorhekua ambe jinguni jarhuatauempka.

Tsíri jatsiriri uandantskua

⁴ Uánekua uéakunhaspti iretecharhu Jesusini exeni, ka ísï jámani uánenhantaspti. Jimajkani Jesusi arini uandantskua terukutarantskua aianguaspti:

⁵ “Tarheri ma niraspti tríju k'uájpani. Ka tríju k'uájpani jámani, máruksï tríjuecha xanhari andatseraspti ka t'auajchakunhasptiksï ka kuínichaksï ántaspti.

⁶ Máteruksï namoni tsakapendu andatseraspti; ka enga na andarapka, itsïksï kueratanchani k'arhispti.

⁷ Máteruksï namoni akarheni jinguni andatseraspti; ka jimbokaksï márku andaraspka, akarheni ójchakuraspti.

⁸ K'óru máteru namoni tríju ambakiti echerindu andatseraspti; ka k'éraspti, ka ambanharhiksï tríju jukaspti.” Ísï uandaspti Jesusi ka uinhamu uandasptiteru: “¡Ne engaksï kámka kurhangukua, kurhangueksï!”

⁹ Jurhengorherichaksï kurhamarhespti Jesusini, ima uandantskua terukutarantskua ambe arhikuekasïrempki.

¹⁰ Ima arhiaspti: “Chánksïnksïni Diósï imeri irechekuarhu anapu ambe mítetaraxati enga nótki nema mítejka, ka máteruechani uandantskua terukutarantskuechani jimbojku aianguasïndi, eskaksï ísï jámani no exeaka, náuejkiksï xáni éskani jarhani, ka náuejkiksï xáni kurhani jarhani eskaksï no kurhanguaka.”

Jesusi tsíri jatsiriri uandantskua aiangpespti

¹¹ “Uandantskua terukutarantskua íni ambesï arhikuekajti: Tríju jatsintskua Diósïri uandakuesti;

¹² ima namoni enga xanhari jimbo andatseraka imechani arhikuekaxati engaksï aiangperakuani kurhajka ka jurhasïndi nóambakiti ka mintsitarhu kénditakuasïndi, ásïksï ísï jámani jakajkue ka p'ímutanhantanksï.

¹³ Ima namoni tríju enga tsakapendu andatseraka; imechani arhiaxati engaksï aiangperakuani kurhajka ka tsípekua jingunksï jiókorheni, k'óruksï no kánekua sïrangua pásïndi; namoni jurhiajkuksï jakajkusïndi, ka nóksï úsïndi jima engaksï ts'éjkunhajka.

¹⁴ Ima tríju enga akarhenirhu andatseraka imechani arhikuekaaxati engaksï kurhajka, ka engaksï sánhani arhijka uandanheani ka jatsikorhenhchani ka ambeksï kánhchani ka xénhchani, ísï jámanksï no úsïndi ambakiti ambe íntspentani.

¹⁵ Ka ima k'ória tríju engaksï ambakiti echerindu andatseraka, imestiksï engaksï ambakiti mintsita jinguni uékaparini kurhajka ka nóksï ísku kurhani, ka engaksï sési anhaxurhikorhetini ambakiti ambe íntspentajka.”

Erajkutarakueri uandantskua

¹⁶ “Nónema erajkutarakua ma étskutini ójchakurasïndi o jískani; sánderu sáni, karhakua pérasïndi eskaksï exeaka ima engaksï inchajka.

¹⁷ Méntkueni, nómbema jarhasti enga no mítekorheaka, ka nójtu ambe ma jarhasti enga sïpatekuarhku patsakata jaka enga no mítekorheaka, ka iámendu ambe k'amak'amasï mítekorheati.”

¹⁸ “Ísï jimbo sési kurha je, jimboka ima enga jatsikorheka, sánderu intsïnhaati; ka ima enga nómbema jatsikorheka, imani jamberi euanhaati enga eratseni jaka eska jatsikorheska.”

Jesusiri amamba ka erachi jémbecha

¹⁹ Jesusiri amamba ka erachichaksï jima niáraspti enga ima jápka, ka nóksï úspti andarherani jimboka uánekua janhaspka.

²⁰ Jesusinksï aianguspti: –Chéti nánde ka chéti erachichaksï uérakua jarhasti, ka uandaxechenksïni uékaxati.

²¹ Ka ima arhiaspti: –Imaksïsï jucheti nándeti ka jucheti erachini, engaksï Diósïri uandakuani kurhajka ka marhuatanksï; ka nóksï ísku kurhani.

Jesusi tarhiatani p'ínguspti

²² Ma xanhari, Jesusiksï imeri jurhengorherichani jinguni teparirhu ma jataspti, ka arhiaspti: –Ju je japundani parhimeni. Ka uérasptiksï nirani,

²³ ka engaksï parhimeni jápka Jesusi k'uíspti. Ka uénaspti uinhamu tarhiameni, ka tepari uénaspti itsï jatani ka uekamexaptiksïa.

²⁴ Jimajkanksï Jesusini tsínharhitaspti ka arhinksï: –¡Jurhentpiri! ¡Jurhentpiri! ¡Uekamexakachia! Jesusi jauarasti ka tarhiatani ka jenguerakuechani xukaaspti, ka ambajpatespti.

²⁵ Tátsekua imeri jurhengorherichani arhiaspti: –¿Andichkajtsïnisï no mintsikajki? Ka imaksï chérakorhetini ka ísku pakareratini kurhamarhperani uénaspti: –¿Néxamue i enga tarhiatani ka itsïni juramukujka ka kurhajchasïndiksï?

Jerasa anapu acheti enga nóambakiti incharhekorhetini jápka

²⁶ Ka úsptiksï Jerasa niárani, enga japundarhu parhimetini jaka, Galilea erangurhini.

²⁷ Enga Jesusi kétsepka, iretarhu uéakuspti acheti ma enga nóambakiti incharhetini jápka, ka Jesusini andarheraspti. Ióni patsïkjasï jámasptia, ka k'umanchekua no jatsikorhespti, uarhiri jatsintskatecharhu ísï irekaspti.

²⁸ Enga exepka Jesusini, tinguixurhikuspti ka uinhachaparini arhispti: –¡Jesusi K'éri Diósï Uájpa, ásïrini inchaakuche! ¡Kómarhixakakini eskarini no nósesi kámaaka!

²⁹ Ísï uandaspti jimboka Jesusi nósesi jásï espirituni juramukuspka eska uérhentapiringa. Nóambakiti mémechani uéntaspti achetini míngorheni; ka náuejki sïndari tiámueri jimbo jójkunhani ka jóndukunhani, ima katsïndurhiasïrempti, ka nóambakiti jimesï pásïrempti enga nónema irekapka.

³⁰ Jesusi kurhamarhespti: –¿Nári arhikorheski? Ka ima arhispti: –Lejioni arhinhasïnga. Ísï uandaspti jimbokaksï uánespka nóambakiticha engaksï incharhetini jápka,

³¹ nósesi járhati espirituechaksï arhispti Jesusini eska no k'éri kauaru uekanhaapiringa.

³² Imani juátarhuksï uánekua kúchicha jámaxapti, ka nóambakitichaksï kómarhispti eska jiáretaapiringa eskaksï kúchichani incharheapiringa; ka Jesusi jiáretaaspti.

³³ Nóambakitichaksï uérhentaspti achetini ka kúchichanksï incharheaspti, ka imaksï uiriaspti kétsemani japundarhu jamberi ka jimaksï uarhimespti.

³⁴ Ima kúchi eranguticha engaksï exepka néna enga úkorhepka uiriasptiksï sïpakorheni ka iretarhu ka juátarhuksï niraspti uandantani.

³⁵ Uéranhaspti exenhani ambe enga úkorhepka. Ka engaksï niárapka jima enga Jesusi jápka, exesptiksï eska ima acheti engaksï nóambakiticha uérhentapka uaxandetixaptia Jesusini kurhajchani, xukuparhatini ka sési ambakentatini; ka chérakorhenhaspti.

³⁶ Ka ima engaksï exepka néna enga úkorhepka, uandantasptiksï na engaksï ambakeranhantapka ima enga nóambakitichani káani jápka.

³⁷ Iámendu Jerasa isï anapuechaksï jíani uénaspti Jesusini kómarhini eska uéakukuantaapiringa, jimbokaksï kánekua chéxapka. Jimbo, Jesusi jatantaspti icharhutani ka níntaspti.

³⁸ Ima acheti engaksï nóambakiticha uérhentapka, kómarhispti eska jiáretapiringa imani jinguni nirani, enga úpka, Jesusi juramukuspti eska pakarapiringa, arhispti:

³⁹ –Chénio níntsï ka uandantsï ambe enga t'úngeni jimbo Diósï xáni úka. Ima acheti níntaspti ka iámu iretarhu uandantaspti embe enga Jesusi úkupka.

Uarhiti p'amenchati ka nanaka Jáiru uájpa

⁴⁰ Enga Jesusi japundarhu parhimentapka, tsípekua jinguni eronhantaspti, jimbokaksï iámenduecha erontaxapka.

⁴¹ Jimajku niáraspti ma enga Jáiru arhinhempka, ima enga k'umanchekua tángorhentskuarhu k'érini jápka. Ima acheti, Jesusini kápatsekuspti, ka kómarhispti eska p'urhembepiringa,

⁴² jimboka májku nanaka sapichuni kángorhesïrempka, témbeni ka tsimani uéxurhini isï jatiri ma enga uarhini jápkia. Enga Jesusi nirani jápka, katsinhapaxaptiksï jimbokaksï uánekua chúxapaxapka.

⁴³ Jima niraxapti uarhiti ma enga témbeni tsimani uéxurhini iurhiri késkuparini jámani jápkia, ka enga na k'amajkutapkia eska xáni jatsikorhepka, xáni tsinajpirichani maiamuaani, ka enga nónema úpka ambakerantani.

⁴⁴ Ima uarhiti Jesusini tátsepani ísï andarheraspti ka karona jupirhukukuspti, ka iurhiri anhakuatsekuspti.

⁴⁵ Jimajkani Jesusi kurhangorhespti: –¿Nérini p'árheski? Ka jimboka nónema jiókorhesïrempka, Pédru ka engaksï márku jápka arhisptiksï: –Jurhentpiri, iápuru ísïksïni katsinhaxati ka p'ákchakuni ka útasïri kurhangorhesïnga: ¿Nérini p'árheski arhini?

⁴⁶ Ka Jesusi ménderu uandaspti: –Nemarini p'árhesti, jimbokani p'ikuarheraska eskarini uinhapekua uérheska.

⁴⁷ Ima uarhiti, enga na jánhaskakorhepka eska piáranhaspka, manaraparini niraspti Jesusini tinguixurhikuni. Iámenduechani japarini aianguspti andisï p'árhepi, ka néna enga ambakentapapka enga p'árhepka.

⁴⁸ Jesusi arhispti: –Jucheti uátsï, p'ímutanhantaskaria jimbokarini mintsikaska. Sési p'ikuarherapantsï.

⁴⁹ Jesusi útasï uandaxapti, enga Jáiro anapu uandakua pári ma niárapka, ka arhispti: –Ásteru ójkutani jaia jurhentpirini; chéti nanaka sapichu uarhistia.

⁵⁰ Enga Jesusi kurhapka, arhispti: –Ásï che; ma mintsita jinguntkurini mintsika, ka chéti nanaka sapichu ambakentaati.

⁵¹ Ka eka k'umanchekuarhu niárapka, íchanku jiáretaspti eskaksï ima jinguni inchapiringa: Pédruni ka Santiaguni ka Juánuni, ka nanaka sapichueri tátjemba ka amambani.

⁵² Iámenduechaksï nanaka sapichuni uekuxapti ka p'amojkuni, ka Jesusi arhiaspti: “Ásï uera je; nanaka sapichu no uarhirixati, k'uíxati.

⁵³ Iámenduechaksï Jesusini teresmarhuspti, jimbokaksï mítespka eska nanaka sapichu uarhirixapkia.

⁵⁴ Ka Jesusi jupijkuspti nanaka sapichuni ka uinhachaspti uandani: –¡Nanaka sapichu, Jauara!

⁵⁵ Ka ima nanaka sapichu tsíntaspti; ka jauarapaspti, ka Jesusi juramuspti eskaksï t'irerapiringa.

⁵⁶ Tátjemba ka amambaksï kánekua ísku pakareraspti, ka Jesusi juramukuaspti eskaksï nónemani aiangupiringa néna engaksï jámapka.”