San Lucas 5 - Diósïri Karakata P´urheepecha Jimbo

Uánekua kurucha p'itamanhasti

¹ Ma xanhari ísï úkorhespti enga Jesusi Genesareti anapu japundarhu uanamukuni jámani jápka, ísï p'ikuarherasïrempti eskaksï pucharaxapka enga xáni uáni uékanhempka Diósïri aiangperakuani kurhanhani.

² Ka japundarhu uanamukutini tsimani icharhuta teparichani exeaspti. Ka uarhorichaksï kétsespti cheremakuechani uaromantaani.

³ Ka Jesusi Simoniri icharhuta teparirhu jataspti, ka kómarhispti eska sáni inchamapiringa. Tátsekua teparirhu uaxarhukuspti ka jima uératini uénaspti jurhentpeni.

⁴ Enga na k'amarapka uandani, Simonini arhispti: –Inchama sánderu teparini ka cheremakuechani jima k'uanimaa je uarhuni.

⁵ Ka Simoni arhispti: –Jurhentpiri, erantskutakuskachi uarhoni ka nómachi p'itamaska; ka jimboka t'u uandasïnga, ménderuchi k'uanimaaka.

⁶ Engaksï na ménderu k'uanimapka, uánekuaksï kurucha p'ímaspti, tsapakurhixaptiksïa cheremakuecha engaksï xáni uáni p'itamapka.

⁷ Jimajkanksï níjkurhakuaspti máteruechani engaksï máteru teparirhu jámani jápka eskaksï nipiringa jarhuataani p'ímantani. Nirasptiksï jarhuataani ka tsimanksï teparichani sési uiniraaspti ka uekamexaptiksïa jamberi xáni uáni p'itamatini.

⁸ Simoni Pédru ísï exeparini Jesusini tinguixurhikuspti ka arhini: –¡Acha, jarharentsïrini jimbokani ji k'amanharhintstiska!

⁹ Simoni ka iámenduksï chérakorhetixapti xáni uánekua kurucha p'itamaatini.

¹⁰ Santiagu ka Juánu, Sebedeo uájpechajtuksï chéxapti, ima engaksï Simoni jinguni jámani jápka. Ka Jesusi Simonini arhispti: –Ásï che, iásï uératiniri k'uiripu tánatiuaka.

¹¹ Jimajkanksï icharhutechani uémantaaspti; jurarkusptiksï iámendu ambe ka chúxapasptiksï.

Jesusi xúta jukarini ma ambakerantasti

¹² Ma jurhiatekua, enga Jesusi ireta ma jimbo jámani jápka, acheti xútku ma jima jarhaspti; ka enga Jesusini exepka, kápatseraspti ka kómarhispti: –Acha, engari uékaaka, úakarini ambakerantani.

¹³ Ka Jesusi p'árhespti uandaparini: –Uékasïnga. ¡Ambakentsïa! P'amenchati sóntku xúta jupinapaspti.

¹⁴ Ka Jesusi juramukuspti arhini: –Ásï nemani aiangu; táta jinguntku ni, tátechaksï míte eskari ambakentaskia, ka pa kéjtsïtakua eskamendu Moisesi na juramukata jurajkuka.

¹⁵ Enga úpka, sánderu mítekorhepaxapti, ka uánekua tángorhenhantasïrempti kurhajchani ka eska ambakerantaapiringa.

¹⁶ K'óru Jesusi kéndikusïrempti uandamukukorheni jimesï enga nónema jámempka.

Jesusi púakuntasti ka ambakerantasti achetini enga no újka xanharani

¹⁷ Ma xanhari enga Jesusi jurhentpeni jápka, jimaksï uaxakaspti máru fariseuecha ka máru juramukua jurhentpiricha engaksï Galilea ka Judea ka Jerusaleni uératini jutipka. Ka Acheri uinhapekua Jesusi jinguni xarharaxapti enga p'amenchatichani ambakerantauempka.

¹⁸ Jimajkanksï niáraspti máru engaksï jatatsekua ma jimbo pérapka achetini ma enga no úempka xanharani. Ka uéksïremptiksï incharani Jesusini pérakuni,

¹⁹ ka nóksï úsïrempti incharani, jimboka uánekua janhaspka; ísï jimboksïsï k'umanchekuani jini p'enojtsïtapti ka p'amenchatinksï jimesï kénhaspti jatatsekua jatsiakutini Jesusini pérakuni.

²⁰ Ka eka Jesusi exepka na engaksï xáni mintsikempka, p'amenchatini arhispti: –P'íchpiri, k'amanharhintskuechaniri púamenhantaskia.

²¹ Ka jimajkanksï juramukua jurhentpiricha ka fariseuecha uénaspti eratseni: “¿Néski i enga tekajka Diósïni tájpanharhikuni? ¿Andi no Diósïjkusï újki k'amanharhintskuechani púatspentani?”

²² K'óru Jesusi míteparini ambe engaksï eratseni jápka, kurhamarheaspti: –¿Andijtsïsï ísï eratsejki?

²³ ¿Ambe sánderu no úkua jukaski, arhini: “K'amanharhintskuechaniri púamenhantaskia”, o arhini: “Jauara ka xanhara”?

²⁴ Ka nirasïngaksïni mítetarani eska íni parhakpeni acheti Uájpa juramukua jatsiska k'amanharhintskuechani púatspeantaani. Jimajkani p'amenchatini arhispti: –Arhixakakini, jauara ka k'arhantani chéti jatatsekuani ka ni níntani.

²⁵ Sóntkusontku, ima enga no úempka xanharani jauaraspti, ka iámenduechaksï exexapti, k'arhantaspti jatatsekuani enga jatatsetini jápka ka níntaspti Diósïni k'éri ambe arhipantani.

²⁶ Ka iámenduechaksï ísku pakareraspti ka Diósïnksï k'éri ambe arhispti, ka iámu chéparinksï uandaspti: –Iásïchi kánekua k'éri ka sési jásï ambe exeska.

Jesusi Lebini ióarhisti

²⁷ Ka tátsekua Jesusi uéraspti ka tumina Roma axakua tánatini ma exespti enga Lebi arhinhempka, ka jima uaxakatixapti enga tumina tánempka. Ka Jesusi arhispti: –Chúxapurini.

²⁸ Jimajkani Lebi jauaraspti, ka iámendu ambe jurajkuspti ka Jesusini chúxapaspti.

²⁹ Ísï tátsekua Lebi chénjembo k'éri ma jarhojpekua jatsispti; ka uánekua máteru tumina tánaticha tángorhenhaspti, ka márkuksï uaxakatixapti.

³⁰ Ka fariseouechaksï juramukua jurhentpiricha jinguni uénaspti Jesusiri jurhengorherichani arhinhchaani, arhiaparini: –¿Andijtsïsï tumina tánaticha ka k'amanharhintsticha jinguni t'ireni ka kauini jaki?

³¹ Ka Jesusi arhiaspti: –Imaksï tsinajpirini no uétarhenchasïndi engaksï no p'amenchani jaka, engaksï sési jámani jaka; tsinajpirinksï p'amenchatichasï uétarhenchajti.

³² K'amanharhintstichanisïni juka tánantaani, eskaksï Diósïni andarhentaaka; no imechani engaksï sési jaka.

Kurhamarhperakua k'arhinda jakueri

³³ Ka Jesusinksï jimajku arhispti: –Juánueri jurhengorhericha ka fariseuecheri jurhengorherichajtuksï méntkuksï k'arhinda jarhasïndi ka méntkuksï uandamukukorheni jarhasïndi, ka chéti jurhengorherichaksï méntku t'ireni ka kauini jarhasïndi.

³⁴ Ka Jesusi arhiaspti: –¿Andi úsïntsï cha k'arhinda jatsiani tembucheri pámbetpirichani, enga tembucha imecha jinguni jauaka?

³⁵ K'óru niáraati jurhiata engaksï tembuchani kénditaaka; ka enga janoaka ima jurhiatekua, jimajkani k'óruksï k'arhinda jauati.

³⁶ Arini terukutarantskua arhiaspti: –Nónema takusï jimbanhe, takusï tamapu jimbo maiarasïndi; jimboka takusï jimbanhe ísku tsîjpeaka; kájtu, jimbanhe no kasïpeati tamapu jinguni.

³⁷ Ka nójtu kauikua jimbanhe sïkuiri úrakatarhu jatsiranhasïndi, jimboka úberi itsïrhukua jimbanhe sïkuirini tsapakusïnga, ka kauikua tsînchesïndi, ka sïkuirijtu ambendarhekorheni.

³⁸ Jimbosï úberi itsïrhukua sïkuiri jimbanherhu jatsirakueti.

³⁹ Ka nónema jarhasti enga kauikua sési xarhiperakatani ts'émutini, tátsekua auaka no iámu xarhiperakatani, jimboka uandasïnga: “Sési xarhiperakata sánderu áspesti.”