San Lucas 4 - Diósïri Karakata P´urheepecha Jimbo

Nóambakiti Jesusini ts'éjkusti

¹ Jesusi Espiritu Sántuni iámu incharhekorhetini, Jordani iurhekuarhu uératini k'uanhatsentaspti. Ka Espiritu jimesï páspti enga nónema irekaka,

² ka tsimani ekuatse jurhiatekua jima jarhaspti, ka Nóambakiti ts'éjkuspti. Imani jurhiatekuechani Jesusi nómbema arhaspti, ka k'arhimaxaptia.

³ Nóambakiti jimajkani arhispti: –Ekari sési jimbo Diósï Uájpeka, juramuku íni tsakapuni eska kurhinda úkorhentaaka.

⁴ Jesusi arhispti: –Karakata arhisïndi: “No kurhinda atintku irekanhaati.”

⁵ Ka tátsekua nóambakiti iótakuarhu uératini, sóntku iámendu parhakpeni anapu iretechani exeraaspti,

⁶ ka arhispti: –Íntskuakakini iámu juramukua, ka inde k'érati iretecheri k'érikua. Jimbokani ji intsïnhaska, ka ji íntskuaka néni engani ji uékaaka.

⁷ Ekarini tinguixurhicheska, iámu ambe chétiuati.

⁸ Ka Jesusi arhispti: –“Karakata jarhasti: Chéti Acha Diósïniri k'éri ambe arhiaka ka imantku marhuaku.”

⁹ Tátsekua Nóambakiti Jesusini Jerusaleni páspti, ka k'éri tióstarhu, sánderu iótakuarhu karhataspti ka arhini: –Ekari sési jimbo Diósï Uájpeka, ixu uératini k'uanikurhi;

¹⁰ jimboka karakata ísï arhisïnga: Diósï juramuati eskaksïni imeri ánjelicha kúajchakuaka ka exenksïni jarhani.

¹¹ Nómari tsakapurhu téksarhutaaka, jimbokaksïni jupijtatini páaka.

¹² Ka Jesusi arhispti: –Ístu karakata arhisïndi: “Ásï jama chéti Acha Diósïni ts'éjkuni.”

¹³ Enga Nóambakiti nóteru jánhaskapka nénateru Jesusini ts'éjkuni, sóndi kéndikukuspti.

Jesusi Galilea uénasti ánchekorheni

¹⁴ Jesusi Galilea k'uanhatsentaspti, Espiritu Diósïri uinhapekuani iámu incharhekorhetini, ka iápuru jimesï imeri ambe uandanhasïrempti.

¹⁵ Ka ima iretecharhu k'umanchekua tángorhentskuecharhu jurhentpesïrempti, ka iámenduechaksï k'éri exesïrempti.

Jesusi Nasareti jarhasti

¹⁶ Jesusi Nasareti niraspti, jima enga ima k'uiripepka. Ka eska na p'indekua jatsipka, sábadu k'umanchekua tángorhentskuarhu inchaspti, ka arhintani jauaraspti.

¹⁷ Diósïri uandari Isaiasiri karakata intsïnhaspti eska arhintapiringa. Ka enga na karakatani p'irakupka, terunharhispti jima enga ísï karakata jaka:

¹⁸ “Acheri Espiriturini incharhetixati, jimbokarini míndaska eskani no jatsikorherichani ambakiti aiangperakua pákuauaka; axastirini ónhakatechani aianguani eskaksï sésikua intsïnhaaka irentani, ka eskani pátenharhichani éskatarantauaka; ka kuájpeani imechani engaksï jatajchakukorheni jaka;

¹⁹ ka uandantani eska Acheri sési jásï uéxurhini janoskia.”

²⁰ Tátsekua Jesusi karakatani irhintaspti, k'umanchekua tángorhentskuarhu anapu jarhojpirini íntskuntaspti ka uaxakantaspti. Iámendu enga xáni jima janhapka jatsikueratixaptiksï exeni.

²¹ Ka ima ísï uénaspti uandani: –Inde ambe, engajtsï k'amaraka kurhani iásï úkorhestia.

²² Iámenduechaksï Jesusini sési uandatsesïrempti ka ískuksï pakareratixapti enga xáni sési jásï ambe uandempka. Ka kurhamarhperasïremptiksï: –¿Andi no ísï Jose uájpe?

²³ Jesusi arhiaspti: –Ísïmendujtsïni arhiakia jamberi: “Tsinajpiri, t'úchu urheta tsinakorhe.” Kájtujtsïni arhiaka: “Ambe engani jucha míteka eskari Kafarnaumi úska, ixujtu u chéti iretarhu.”

²⁴ Ka chúngutaspti uandani: –Ísïsti eska nóma Diósïri uandari imeri iretarhu sési eronhantasïnga.

²⁵ Ísïsptimendu, Israeliksï uánekua uarhiti tsîndicha jarhaspti, imani jurhiatekuechani jimbo enga Diósïri uandari Eliasï irekani jápka, enga tanimu uéxurhini ka terujkani no janipka ka enga kánekua k'arhimakua japupka.

²⁶ K'óru, Eliasï nóma tsîndi Israeli anapu jinguni axanhaspti, ka Sarepta anapu ma jinguni axanhaspti, Sidoni no iauani jarharetini.

²⁷ Ka ístuksï Israeli uánekua xúta jukarhekorhericha irekaxapti, jimajkani isï enga Diósïri uandari Eliseo jima irekani jápka, enga úpka, Naamanijku ambakeranhastaspti, ima enga Síria anapuepka.

²⁸ Íni ambeksï kurharini, iámendu engaksï k'umanchekua tángorhentskuarhu jápka kánekuaksï ikiaspti.

²⁹ Ikiatku anhaxurhinhaspti ka Jesusinksï petaataspti, ka jimaksï páspti enga sánderu iótarhukurhapka, imani juátarhu enga imecheri ireta jaka, ka jima uératinksï uekopani uéksïrempti.

³⁰ K'óru Jesusi terujkani ísï nitamakuaspti ka jarhareantaaspti.

Acheti ma enga nósesijasï espiritu incharhetini jápka

³¹ Jesusi Kafarnaumi kétsemaspti, imani ireta enga Galilea anapueka, ka sábaduechani jurhentpesïrempti.

³² Ka ísku pakareranhasïrempti exeparini eska ima na jurhentpempka, jimboka jarhamekua jinguni uandasïrempka.

³³ K'umanchekua tángorhentskuarhu jarhaspti acheti ma enga nósesijasï espiritu incharhetini jápka, ka ima uinhachaspti:

³⁴ –¡Jurajkujtsïniata! ¿Amberi uéksïni juchantsïni jinguni, Jesusi Nasareti anapu? ¿Jurhaskijtsïni k'amajkuni? Jíkini míteska, ka míteska eskari Diósï Uájpa pímbinhaxetiska.

³⁵ Jesusi nóambakitini ísï arhiparini xukajchaspti: ¡Pínasku ja ka uérhentsï indeni! Jimajkani nóambakiti achetini jima terujkani k'uanintskaspti iámenduechani japarini, uérhentaspti ka nómbema nósesi úkuspti.

³⁶ Ka iámenduechaksï chérakorhespti, ka arhijperasïremptiksï: –¿Ambe jásï uandakueski inde? Enga juramukua ka uinhapekua jinguni nósesi járhati espirituechani juramukuajka, ¡Ka nóambakitichaksï úsïndi uérhpentani!

³⁷ Ka jimesï Jesusiri ambeterku uandanhaxaptia.

Jesusi Simoniri tarhampirini ambakerantasti.

³⁸ Tátsekua Jesusi k'umanchekua tángorhentskuarhu uéntatini Simonio inchaspti. Ka jima Simoniri tarhampiri kánekua tinharaxapti, ka kómarhisptiksï Jesusini eska ambakerantapiringa.

³⁹ Jesusi andarheraspti ka k'utitsetini tinharakuani xukaspti, ka tinharakua jurajkuspti. Ka sóntku jauaraspti, ka marhuakuaxaptia.

Jesusi uánekua p'amenchatichani ambakerantaasti

⁴⁰ Enga na jurhiata ínchajtsïkupkia, iámendu engaksï xáni mámaru járhati p'amenchati jatsiapka, Jesusinksï pákuaspti; ka mándani arhispti p'ájtsïkuani, ka ambakerantaaspti.

⁴¹ Uánekua ima p'amenchatichajtuksï nóambakitichani uérhekorhentaspti, ísïksï uinhachaparini: –¡T'úri Diósï uájpeska! Ka Jesusi nóambakitichani xukaasïrempti, ka no jiáretaasïrempti eskaksï uandapiringa, jimbokaksï nóambakiticha mítespka eska ima Krístuespka.

Jesusi k'umanchekua tángorhekuarhuecharhu uandantasti

⁴² Enga na erandepkia, Jesusi iretarhu uéakuspti, ka jima niraspti enga nónema jámempka. K'óru uáni k'uiripu niraspti jirinhantani. Nóksï jiánguntasïrempti,

⁴³ ka Jesusi arhiasïrempti: –Uétarhesïndi eskani ambakiti aiangperakuani; enga Diósïri irechekueka máteru iretechantuni aianguauaka, jimbokani indeni niátanisïni axanhaka.

⁴⁴ Jesusi uandakuani judiouecheri k'umanchekua tángorhentskuecharhu aiangpepasïrempti.