San Lucas 3 - Diósïri Karakata P´urheepecha Jimbo

Juánu itsï atajtsïkpiriri jurhentperakua

¹ Enga Tiberio témbeni iúmu uéxurhini Roma juramuni jápkia, ka enga Pónsio Pilatu Judea juramuni jápka, Erodesi Galilea juramuxapti, Filipu Iturea ka Trakonitejtu juramuxapti, ka Abilene Lisania juramuxapti. Erodesi ka Filipu erachisptiksï.

² Anasi ka Kaifasiksï k'éri tátechespti. Jimajkani isï, Sakariasï uájpa Juánuni Diósïri uandakua niárakuspti, enga jimesï jámani jápka enga nónema irekaka.

³ Ka Juánu iápuru iurhekua Jordanirhu uanamukuni isï jámaspti, arhijtsïkpeparini eska itsï atajtsïnhapiringa ka eskaksï Diósïni andarhentapiringa, ka eska ísï, Diósï púakuantaapiringa.

⁴ I ambe ísï úkorhesti eska Diósïri uandari Isaiasi na karaka: “Nema uinhachaxati jimesï enga nónema irekaka: ‘Achani xanhari ambatskakuntsï je; Jurhimbendu ma xanhari mítaku je.

⁵ Iámendu jauandekuechaksï uininhanhantaati, ka iámendu juáta ka k'úmstechaksï p'arhikua jájtsïtanhantaati, xanharicha engaksï k'untsïndeka jurhimbentskaranhantaatiksï, ka nani enga penhendeka p'arhikjantskanhantaati.

⁶ Ma parhakpeni exeati p'ímutantskua enga Diósï axani jaka.’ ”,

⁷ Enga uánekua ninhempka eska Juánu itsï atajtsïkuapiringa, ima ísï arhiasïrempti: “¡Akuitseni járhaticha! ¿Chánksïni ne arhiski eskajtsï úaka ikimperatani sïpakorhekuni enga janoni jaka?

⁸ Jángua jimbo xarhata je eskajtsï sési jimbo chári irekuani jurhimberantaskia, ásï uéna je uandani: ‘¡Jucha Abraniri sïrukueska!’ Jimbokaksïni sési jimbosï arhijka eska Diósï úsïnga arini tsakapuechani jamberi Abraniri sïrukua úantaani.

⁹ Ka támu, ch'aparakua uarhomukuntskakata jarhastia enga p'ukurichani sïrangua jinguni p'itaskuajka. Náki uéjki ma anhatapu enga nómbema marhuajka, ch'apanhasïndi ka chpírirhu k'uanijpanhasïndi.”

¹⁰ Jimajkanksï Juánuni kurhamarhespti: –¿Ka jucha néna jámaia?

¹¹ Ka Juánu ísï arhiaspti: –Ne enga tsimani xukuparhakua jatsika, íntskue ma imani enga nóma jatsika; ka ne enga t'irekua jatsikorheka, imani jinguni marhuate enga nómbema jinguni t'ireni jaka.

¹² Ístuksï máru tumina tánaticha andarheraspti itsï atajtsïkuekani, ka Juánunksï kurhamarhespti: –Jurhentpiri, ¿Juchari jimbo ambe úkueski?

¹³ Ka Juánu arhiaspti: –Ásï nitamama je jukari maiampetarpeni eska xántku juramukata jaka.

¹⁴ Ístuksï máru p'urhejkuticha kurhamarhespti: –¿Ka andi jucha ambe uétarhenchasïnki úni? Juánu arhiaspti: –Ásï nemani ambe ma chéraparini euakorhe je ka níjtu ísku jatini nemani k'uaninharhitantani ambe ma enga no úka; ka jaiapanhentsï je eskajtsï xáni maiamunhajka.

¹⁵ Ísï jánhaspti kánekua eroeronharhinhani ka kurhamarhekorhenhasïrempti: “¿Andi Juánu Krístueia?”

¹⁶ Ka Juánu iámendu arhiaspti: “Sési jimbo jíksïni itsï jimbojku itsï atajtsïkuxaka; k'óru jurhaxati ma engaksïni Espiritu Sántu ka chpíri jimbo pímbinhajkuntaaka. Ima jíndeni jinguni sánderu k'éri ambesti, xáni k'éristi engani jamberi no nitatarheka imeri kuarhachichani kuerandukuani.

¹⁷ Kátakutarakua jupikapuxatia, ka tríjuni kátakuati, ka pájani jarharetaati. Tríjuni patsakorheati, ka pájani kurhintaati chpírirhu enga nómeni pójpeaka.”

¹⁸ Ísï jámaparini ka máteru uánekua ambe jimbo arhistatspeparini; Juánu ambakiti aiangperakuani aiangpesïrempti.

¹⁹ Juramuti Erodesintu xukaspti, jimboka imeri erachi témba Erodiasïni kúrhetixapka, ka iámu imani ambe jimbojtu enga xáni nósesi ambe niátapka;

²⁰ ka Erodesi kújtsïnchakorhesptiteru, enga Juánuni ónhatarkorhepka.

Jesusijtu itsï atajtsïkunhaspti

²¹ Arisï úkorhespti enga Juánu itsï atajtsïkpeni jápka, Jesusijtu itsï atajtsïkunhaspti; ka enga na uandamukukorheni jápka, auanda mítakorhespti

²² ka Espiritu Sántu, jipunhini jásï ma kétsespti andajtsïkuerani, ka auandarhu kurhanchekorhespti uandakua ma enga ísï arhimpka: –T'úri jucheti uátsïti xénhchakateska, engani ji erakuka.

Jesusiri sïrukua

²³ Jesusi ma ekuatse témbeni uéxurhini isï jatirispti enga imeri úkuani uénapka. Ka uandanhasïrempti eska Jose uájpespka. Ka Jose Eli uájpespti,

²⁴ ka Eli Matati uájpespti, ka Matati Lebiri, ka Lebi Mélkiri, ka Mélki Janairi, ka Janai Joseri,

²⁵ ka Jose Matatiasïri, ka Matatiasï Amosiri, ka Amosi Naumiri, ka Naumi Esliri, ka Esli Nagairi,

²⁶ ka Nagai Máatiri, ka Máati Matatiasïri, ka Matatiasï Semeiri, ka Semei Josekiri, ka Joseki Joderi,

²⁷ ka Joda Joananiri, ka Joanani Reseri, ka Resa Sorobabeliri, ka Sorobabeli Salatieliri, ka Salatieli Neriri,

²⁸ ka Neri Mélkiri ka Mélki Adiri, ka Adi Kosamiri, ka Kosami Elmadamiri, ka Elmadami Eriri,

²⁹ Ka Eri Josueri, ka Josue Elieseriri, ka Elieseri Jorimiri, ka Jorimi Matatiri,

³⁰ ka Matati Lebiri, ka Lebi Simeoniri, ka Simeoni Juderi, ka Juda Joseri, ka Jose Jonamiri, ka Jonami Eliakimiri,

³¹ ka Eliakimi Melea uájpespti, ka Melea Menairi, ka Mena Matateri, ka Matata Nataniri,

³² ka Natani Dabiri, ka Dabi Isairi, ka Isai Obediri, ka Obedi Bóosiri, ka Bóosi Salmoniri, ka Salmoni Náasoniri,

³³ ka Náasoni Aminadabiri, ka Aminadabi Adminiri, ka Admini Arniri, ka Arni Jesroniri, ka Jesroni Fáresiri, ka Fáresi Juderi,

³⁴ ka Juda Jakobu uájpespti, ka Jakobu Isaakiri, ka Isaaki Abraniri, ka Abrani Táreri, ka Táre Najoriri,

³⁵ ka Najori Serukiri, ka Seruki Ragaueri, ka Ragau Pélejiri, ka Péleji Eberiri, ka Eberi Selajiri,

³⁶ ka Selaji Kainaniri, ka Kainani Arfaksadiri, ka Arfaksadi Semiri, ka Semi Noéri, ka Noe Lamekiri,

³⁷ ka Lameki Matusaleni uájpespti, ka Matusaleni Enokiri, ka Enoki Jarediri, ka Jaredi Malaleliri, ka Malaleli Kainaniri,

³⁸ ka Kainani Enosi uájpespti, ka Enosi Setiri, ka Seti Adaniri, ka Adani Diósï uájpespti.