San Lucas 22 - Diósïri Karakata P´urheepecha Jimbo

Teruatperanhasti Jesusini jupikani

¹ Andamutaxaptia k'uínchekua enga kurhinda no xarhipiti jukari anhajka enga Páskua arhinhajka.

² Ka tátecheri juramutichaksï ka juramukua jurhentpirichaksï chérhpeparini jirinhakuntaxapti néna Jesusini atani uándikuni.

³ Jimajkani Nóambakiti Judasïni incharhespti, enga Jesusiri témbeni tsimani jurhengorheri jémba mépka, engaksï Iskariote arhimpka.

⁴ Ima niraspti tátecheri juramutichani ka tiósïo kuarichani uandaxekuani, ka aiakuaspti Jesusini intsïnharhitaani.

⁵ Imaksï tsípespti ka Judasïnksï tumina aiakuspti.

⁶ Ka ima aiakorhespti ka úndaspti jirinhakuntani néna ka nani Jesusini intsïnharhitaani jima enga no jánhapiringa.

Acheri Páskua anapu t'irekua

⁷ K'uínchekua janospti enga no xarhipiti jukari kurhinda anhajka, jiájkani enga karichi Páskua anapu atanhempka.

⁸ Jesusi Pédruni ka Juánuni axaaspti, arhiaparini: –Níjtsïni je Páskueri chúrekua t'irekua tánacheni.

⁹ Imaksï kurhamarhespti: –¿Naniri uéksïni eskachi tánakata ambe péraaka?

¹⁰ Jesusi arhiaspti: –Iretarhu ínchaakuni jámantsï achetini ma kúmaaka enga k'amukua ma jimbo itsï páni jauaka. Chúxapa je nani enga inchantajka,

¹¹ ka imani k'umanchekuarhu anapu k'érini arhi je: Jurhentpiri uéksïndi míteni: ¿Nánisïni jucheti jurhentpirichani jinguni chúrekua anapu t'irekua Páskueri t'irea?

¹² Imaksïni exeraati k'umanchekua k'éri ma sési jántskantskata, enga karhakua jaka, engachi chúrekua t'ireaka. Jima péra je ambe engajtsï xáni tánajka.

¹³ Nirasptiksï ka iámu ambe ísï úkorhespti eska Jesusi na arhiapka, ka chúrekua anapu t'irekuaksï Páskueri tánaspti.

¹⁴ Enga na t'irekuepkia, Jesusi ka jurhengorherichaksï uaxakaspti t'ireni.

¹⁵ Ka Jesusi arhiaspti: –¡Xáni engani uékani jápka Páskueri t'irekuani cha jinguni arhani, jimbokani nósesi kánhaaka!

¹⁶ Aianguxakaksïni eskani jiájkani jamberi nóteru auaka, engachi na ménderu Diósïri irechekuarhu márku auakia.

¹⁷ Ka enga na tsúntsuni p'íkupka, diósmaiamukua arhintaspti, ka uandani: –Inde je ka intsïmpera je;

¹⁸ jimbokaksïni arhixaka eskani nóteru itsïmaaka uberi itsïrhukua enga jamberi Diósïri irechekua janonguaaka.

¹⁹ Tátsekua kurhinda p'íkuspti ka diósmaiamukua arhispti, k'epekuspti ka íntsaaspti, uandaparini: –I jucheti anhanhatakuesti, enga chári sési jimbo intsïnharhitpenhaaka ka atanhani uándikunhani. Ísïjtsïni míantsï je.

²⁰ Engaksï na k'amarapkia t'ireni, tsúntsuni májkueni kámaspti, uandaparini: –I itsïmakua jimbanhe pakatperakuesti enga jucheti iurhiri jimbo ts'ïrimeranhaka, enga chári sési jimbo tsîtakorheaka.

²¹ K'óru míte je, eska ixu jarhaska ima engarini sïpataaka, jíndeni jinguni t'irexati.

²² Jimboka acheti Uájpa jatsiska imani xanharini jatani enga míndanhaka ka ¡Jarhonheni ima enga intsïnharhitpeaka!

²³ Jimajkanksï ima uénaspti kurhamarhperani: –¿Néxamu ísï kámaa?

Nésï sánderu k'ériua

²⁴ Ka tátsekuaksï jurhengorhericha uinhamu jupiperaspti míteni uékani néxamusï sánderu k'éri ambepirini.

²⁵ Enga úpka, Jesusi arhiaspti: “Irechechaksï uinhandirasïndi juramukuaani iretechani ka juramutichaksï uandakorhesïndi eskaksï iretani marhuakuxaka.

²⁶ Ka chájtsï no xáxeaka. Jimini ménderueniaru, ne enga sánderu k'érika chánksïni jinguni jatsisti ima sánderu sapichueni, ka urherukuti máteruechani marhuakuaue.

²⁷ Jimboka ¿Andi ne sánderu k'éri ambeski? ¿Ima enga uaxakakorhejka t'ireni o ima enga kéntpejka? ¿Andi no ima sánderu k'ériski enga uaxakajka t'ireni? Ka ji cha jinguni kéntpiriska.”

²⁸ “Chájtsïni nómeni jurajkuska engani nósesi nitamakorheka.

²⁹ Jimboksïnisï juramukua ma jurajkucheni jaka, ísï eskarini jucheti Táte jíndeni na juramucheka,

³⁰ ka chájtsï jíndeni jinguni jucheti irechekuarhu t'ireaka ka itsïmantani, ka k'érikuarhuecharhujtsï témbeni tsimani Israeli anapu iretechani uaxakaaka útakuani.”

Jesusi uandantasti eska Pédru no míteni uandaaka

³¹ Acha uandasptiteru: –¡Simonita! Exe, Nóambakiti sésikua kurhajkorhesti chánksïni tríjueni uauatani;

³² ka jíkini arhijpecheska, eska chéti jakajkua no xántkueuaka. Ka engari na jíndeni jinguni k'uanhatseaka, jarhuataa chéti erachichani sési anhaxurhikorhetini jakajkiuni jarhani.

³³ Simoni arhispti: –Acha, t'u jinguni k'ataperakuarhu jamberi niuaka, ka t'u jinguni jamberi uarhiaka.

³⁴ Jesusi arhispti: –Pédru, arhixakakini eska iásï t'arhechu nótki jamberi uerani jauaka, engarini t'u t'uíni tanimu xanhari no míteni uandaakia.

Jesusi ts'éjkukua niáranchasti

³⁵ Tátsekua Jesusi kurhamarheaspti: –Engaksïni nóma tumina jinguni axapka, ka engaksïni nóma t'irekua ambe jinguni axapka, ka engaksïni xándurharku axapka, ¿Ambejtsï uétarhenchaspki? Ka imaksï arhispti: –Nóma ambechi uétarhenchaspka.

³⁶ Jimajkani arhiaspti: –Iásï jimini ménderuenia, ima enga jatsika tumina juáe, ka ístu akua ambe juáe; ka ne enga tiámu atajpetarakua no jatsikorheka, chereparhakua atarante ka piákorhe.

³⁷ Jimbokaksïni aianguxaka eskani jatsiska ísï úkorhenchani eskaksï karakatecha na arhijka: Ka nósesi járhatichani jinguni miuinhantasti. Jimboka iámu ambe enga jucheti ambe xáni karakata jaka jatsiska úkorheni.

³⁸ Imaksï arhispti: –Acha, tsimani tiámu atajpetarakuachi kámaxakaia. Ka ima arhiaspti: –Sésku jauatia.

Jesusi Getsemani uandamukukorhesti

³⁹ Tátsekua Jesusi uéraspti, ka eska na p'indekua jatsipka, Olibu juátarhu niraspti; ka jurhengorherichaksï chúxapaspti

⁴⁰ Engaksï niárapka, arhiaspti: –Uandamukukorhe je, nóksïni terungutpiri andani.

⁴¹ Xáni jarhareaspti eska ma xáni iauiani pérajka tsakapu k'uanirani, ka tinguixurhispti uandamukukorheni.

⁴² Uandaparini: “Táte, engari uéjka, íni k'amek'amechantskuarini kénditache; k'óru ásï ima úkorhe engani ji uéjka, ima úkorhe engari t'u uéjka.”

⁴³ [Enga ísï úkorheni jápka, auandarhu anapu ánjeli ma xarharaspti uinhapekua íntskuni.

⁴⁴ Ka náuejki xáni nósesi p'ikuarherani jápka, Jesusi sánderu uinhamu uandamukorhesïrempti, ka iurhirini jásï aparheta kánekua iurhuiurhujkutaxapti.]

⁴⁵ Enga na jauarapka jima enga uandamukukorheni jápka, niraspti jima niántani engaksï jurhengorhericha jápka, ka imaksï t'uíni k'uíxaptia jimboka mískorhekua andaaspkia

⁴⁶ ka arhiaspti: –¿Andijtsïsï k'uíni jaki? Jauara je ka uandamukukorheni je, ásïksïni terungutpiri ande.

Na enga Jesusi jupinhaka

⁴⁷ Jesusi útasï uandaxapti, enga uánekua niáranhapka. Ima enga Judasï arhinhempka ka enga imeri jurhengorheri mépka urhekupaaxapti. Andarheraspti Jesusini ka putinharhikuni,

⁴⁸ ka Jesusi arhispti: –Judasï, ¿Putinharhikua ma jimbojkuri intsïnharhitpexaki Acheti Uájpani?

⁴⁹ Ima engaksï Jesusini jinguni jámani jápka, ísï exerinksï kurhamarhespti: –Acha, ¿Akuarheauachi?

⁵⁰ Ka ima ma isï k'éri táteri jántspirini ataspti, ma akandani kachujpandikuspti.

⁵¹ Ka Jesusi uandaspti: –Jurajkua je jauatia.

⁵² Ka Jesusi táta urhejtsïkurichani ka k'éri tiósïo kuárichani ka arhijtsïkpirichani engaksï jupikani niárapka arhiaspti: –¿Andijtsïsï tiámu atajpetarakua ka chkári anhajkutini juki, enajkini ambe ji sïpajkurhe?

⁵³ Mándani pauani k'éri tiósïo chánksïni jinguni jámaxaka, ka nójtsïni méni jupikaska. K'óru i jándu cháristi, enga pájpakandeni jarhajka.

Pédru Jesusini no míteni uandasti

⁵⁴ Jesusinksï jupikaspti ka k'éri tátoksï páspti. Pédru sántku jarhaxapaxapti.

⁵⁵ Jima terunukuaksï kurhikaspti, ka uaxaparhakusptiksï; ka Pédrujtu imechani jinguni uaxaparhakuspti.

⁵⁶ Enga ísï úkorheni jápka, uarhiti jántspiri ma enga exepka imajtu jurhentani jarhani jatsikueraspti erateni ka uandaspti: –Íjtu ima jinguni jámaxapti.

⁵⁷ Ka Pédru no jiókorhespti uandaparini: –Nana, ji no míteska imani.

⁵⁸ No sáni ióndani, máteru nema exespti ka arhini: –T'újturi imechani jinguni jámsïnga. Ka Pédru uandaspti: –Nóchka ambeta, ji no imecha jinguniska.

⁵⁹ No ióndani, máteru ménderu inchandimentaspti arhini: –Sési jimbo i imani jinguni jámaxapti. Ka támu Galilea anapuesti.

⁶⁰ Pédru uandaspti: –Nóchkanda míteska, t'u ambendi uandajki. Enga Pédru nótki k'amarani jápka ísï uandani, t'arhechu ma ueraspti.

⁶¹ Jimajkani Acha p'irhikorhespti Pédruni erani, ka Pédru míjpaani eska Acha arhispka: “Iásï t'arhechu nótki uerani jauati engarini t'u t'uíni tanimu xanhari no míteni uandaakia.”

⁶² Ka Pédru uéntaspti, ka k'amek'amechantaspti uerani.

Na engaksï Jesusini teresmarhupka

⁶³ Ima acheticha engaksï Jesusini kuáni jápka teresmarhusïremptiksï ka atanksï.

⁶⁴ Jónharhikusïremptiksï ka kurhamarhenksï: –¿Arhitki nékini ataia?

⁶⁵ Ka nósesi ambeteruksï arhisïrempti.

Jesusi k'éri tángorhentskuarhu

⁶⁶ Enga na erandepkia, judiouecheri arhijtsïkpirichaksï ka tátecheri juramuticha ka juramukua jurhentpirichaksï tángorhentaspti, ka Jesusinksï k'éri tángorhentskuarhu páspti. Jimaksï kurhamarhespti:

⁶⁷ –Arhijtsïni, ¿Jeteru t'úsï Krístue? Ka ima uandaspti: –Engaksïni jo arhiska, nójtsïni jakajkucheaka.

⁶⁸ Ka engaksïni ambe ma kurhamerheska, nójtsïni úaka mókucheni.

⁶⁹ Enga úka, iásïtki uératini acheti Uájpa, Diósï uinhapitini t'irejkandani uaxakakutini jauatia.

⁷⁰ Tátsekuaksï iámenduecha kurhamarhespti: –Jiájkani, ¿T'u Diósï uájpeski? Jesusi arhiaspti: –Chájtsï uandaska.

⁷¹ Ka imaksï uandaspti: –¿Ambeteruchi úraua uandantstichani? Kurhajchakorheskachia.