San Lucas 2 - Diósïri Karakata P´urheepecha Jimbo

Jesusiri andajpenukua

¹ Jimajkani ísï, k'éri irecha Sésari Augustu juramuspti eska ma parhakpeni karajperanhantapiringa.

² I miújperantskua jimajkani únhaspti enga Kirinu Siria juramuni jápka.

³ Ka iámenduechaksï jatsipirindi nirani níntani imeri iretani jimbo karakorhentani.

⁴ Ísï jimbo, Jose uéakuspti imani iretani Nasareti, enga Galilea jaka, ka Beleni karhamaspti, enga Judea jaka, jima engajtu irecha Dabi kángorhenhapka, jimboka Jose Dabiri sïrukuespka.

⁵ Imeri kurhajkorhekata Maria jinguni enga sapini erokorheni jápka, jiniksï niraspti karakorhentani.

⁶ Ka engaksï Beleni jápka, niáraspti jurhiata enga Maria charhakuni kángorhepiringa.

⁷ Ka uájpa urhetini úakasï jatakuarhu kángorhespti, ka takusï irhirhitaspti, ka chekakuarhu aponhaspti, jimboka jájkorhekuarhu no ambandespka.

Ánjelicha ka karichi eranguticha

⁸ Jima Beleni no iauani jarhareti, karichi erangutichaksï jámaxapti engaksï juátarhu pakarempka karichichani kuákorheani.

⁹ Ka mátirku Acheri ánjeli ma xarhakuaspti, ka ma uirhipandani Acheri t'íntskua t'íntskakuaspti; ka kánekuaksï chérakorhespti.

¹⁰ Enga úpka, ima ánjeli arhiaspti: “Ásï che je, jimbokaksïni ambakiti aiangperakuasï juácheni juka, imani enga jimbo kánekua tsípenhaaka.

¹¹ Iásï Dabiri iretarhu p'ímutantspiri ma andajpenusti, enga Acha Krístueka.

¹² Arisïjtsï mítentaaka: Tataka sapichuni májtsï xéntaaka takusï irhiakukata ka chekakuarhu aponhetini.”

¹³ Ka ístuksï mátirku, ánjeli jinguni, máteru ánjeli auandarhu anapuecha xarharaspti, engaksï Diósïni k'éri ambe arhimpka, ísïksï uandaparini:

¹⁴ “¡Jini auandarhu k'éri t'íntskua Diósïristi! ¡Ka parhakpeni Diósïri xénhchakatecha, sési pájperanhe!”

¹⁵ Ka engaksï ánjelicha karhanchentapka, karichi erangutichaksï arhijperaspti: –Ju je Beleni exeni ambesï úkorhe, engajtsïni Acha aianguka.

¹⁶ Ka sóntkuksï niraspti, ka Mariani ka Josenksï xéntaspti; ka tataka sapichu chekakuarhu aponhetixapti.

¹⁷ Ka engaksï xéntapka, p'iárasptiksï uandantani enga xáni tataka sapichueri ambe ánjeli arhiapka.

¹⁸ Ka iámendu engaksï kurhauempka imani ambe engaksï karichi eranguticha uandantempka ískuksï pakarerasïrempti.

¹⁹ Ka Maria eratsentaparini iámendu íni ambe mintsitarhu patsakorhesïrempti.

²⁰ Ka karichi erangutichaksï Diósïni k'éri ambe arhipantaspti ka pirekupantanksï, iámendu imani ambe jimbo engaksï exepka ka kurhani, jimboka iámendu ambe ísï úkorhespka eskaksï na aiangunhapka.

Jesusi sapiparini k'éri tiósïo pánhaspti

²¹ Ka enga na iúmu tanimu jurhiatekua jatiripkia, tataka sapichu ts'iuerakuani pasïri p'ikujtsïkumenhapirindi, ka Jesusi arhinhataranhaspti, ísï eska ánjeli Mariani na arhipka enga nótki sapini kámani jápka.

²² Enga na nitamapkia jurhiatekuecha, ka jimboka Moisesiri juramukuarhu ísï arhisïnga, tataka sapichunksï Jerusaleni páspti Achani míndakuntani.

²³ Ísïksï jámaspti jimboka Acheri juramukuarhu ísï karakata jarhaska: “Ts'iueriti urheti, Acha míndamenhaati.”

²⁴ Ka nirasptichkaksï kéjtsïtakua pákuni, ísï eska Acheri juramukua na arhijka: Tsimani jipunhi k'érati o tsimani jipunhi sapinharhichani.

²⁵ Jimajkani isï, Jerusaleni irekaxapti acheti ma enga Simeoni arhinhempka. Acheti kaxumbitispti ka k'éri tiósïo jándini, enga erokorheni jápka eska Israeli p'ímutanhantapiringa. Ka Espiritu Sántuni incharhekorhetixapti,

²⁶ ka aianguspti eska nótki uarhini japiringa eska urheta Krístuni exepiringa.

²⁷ Simeoni k'éri tiósïo niraspti jimboka Espiritu Sántu ísï p'ikuastaspka; ka engaksï Jose ka Maria Jesusintu pápka, ísï úni eska juramukua na arhijka,

²⁸ Simeoni sapini kamanharhispti ka Diósïni ísï k'éri ambe arhispti:

²⁹ “Acha, iásï k'ória, íntspeskaria engari aiatspepka: Ekari uéjka jurajkunia eska chéti jántspiri sési p'ikuarheraparini uarhiaka.

³⁰ Jimbokani chéti p'ímutantskuani exeskia

³¹ engari iámendu iretechani japarini uénaka úskuni.

³² Erajkutarakua enga ma parhakpeni t'íntskaraaka ka enga chéti ireta Israeli k'érika.”

³³ Jesusiri tátjemba ka amambaksï ísku pakareraspti Simeonini kurharini enga tataka sapichueri ambe uandempka.

³⁴ Jimajkani Simeoni újchakuraspti, ka Mariani, Jesusiri amambani arhispti: –Exe, i tataka sapichu erakukatesti, uánekua Israeli anapuecha inderi jimbo tsînchenhaati ka uánekua sési niánhantaati. Indeni Diósï xarhataati, ka uánekuaksï no jiókaati,

³⁵ ka indeni jimbori t'u nósesi p'ikuarheraaka, ísï eskaksïni mintsitarhu tiámu ma jarhanhani, ka mítekorheati enga xáni ambe jatanhetsperanhajka.

³⁶ Ístu jima jarhaspti Diósïri uandari ma enga Ána arhinhempka, kánekua kutsimiti ma enga Fenueli uájpepka ima enga Aseriri sïrukuepka. Ima kánekua sapichu uambuchaspti ka uámbani jinguni iúmu tsimani uéxurhini irekorhespti,

³⁷ ka tsîndisptia ka t'ámu ekuatse t'ámu (84) uéxurhini jatirisptia. Ka k'éri tiósïo nómeni kéndikusïrempti, ka tiósïo k'arhinda japarini ka uandamukukorheparini Achani chúrekua ka jurhiakua marhuakusïrempti.

³⁸ Nana Ánajtu tiósïo ima jándu niáraspti, ka uénaspti Diósïni k'éri ambe arhini ka tataka sapichueri ambe aianguani imechani engaksï Jerusaleni p'ímutantskua erokorheni jápka.

Nasaretiksï níntasti

³⁹ Engaksï na k'amarapka iámu ambe úni, eska Acheri juramukua na arhistatspejka, Nasaretiksï níntaspti enga Galilea jaka.

⁴⁰ Ka tataka sapichu t'arhexexapti ka uiuinhaxeni jarhani ka mímixeni jarhani, ka Diósï xénhchasïrempti.

Tataka sapichu k'éri tiósïo pakarasti

⁴¹ Jesusiri tátjemba ka amambaksï p'indekua jatsispti mándani uéxurhini Jerusaleni nirani Páskueri k'uíncheni.

⁴² Ka enga Jesusi témbeni tsimani uéxurhini jatiripkia, imaksï iámendu karhamaspti Jerusaleni k'uíncheni.

⁴³ Ka nimatiru, k'uanhatsentani jámani, tátjemba ka amambaksï no exespti eska Jesusi Jerusaleni pakaraspka.

⁴⁴ Ma jurhiatekuaksï xanharasptia eratseparini eska Jesusi máteruecha jinguni k'uanhatsentaxapka, ka engaksï jámapka imeri márkuechani kurhamarheani ka engaksï jinguni xáni mítperapka,

⁴⁵ nóksï xéntaspti. Ka k'uanhatsentasptiksï Jerusaleni Jesusini jirinhantani.

⁴⁶ Tanimu jurhia jimboksï k'éri tiósïo xéntaspti, ima juramukua jurhentpiricha jinguni uaxakatini jarhani, kurhajchaani ka mámaru ambe kurhamarheaxapti;

⁴⁷ ka iámendu engaksï xáni k'urhajchani jápka eratsentanksï pakarerasïrempti, jimboka kánekua mímixespka ka sési mókukorhesïrempti ambe enga kurhamarhenhapiringa.

⁴⁸ Engaksï tátjemba ka amamba exepka, ískuksï pakaraspti; ka amamba arhispti: –Jucheti uátsï, ¿Andijtsïnisï ísï manata? Táte jingunksïni uandanheaparini jámaska jirinhantani.

⁴⁹ Ka Jesusi arhintaspti: –¿Andijtsïnisï jirinhantani jápi? ¿Andi nójtsï míteski eskani jucheti Táteri k'umanchekuarhu japiringa?

⁵⁰ Ka imaksï no kurhangukuspti ambesï arhikuekani jápi.

⁵¹ Tátsekuaksï tátjemba ka amamba jinguni Nasareti níntaspti, ka Jesusi jima irekaspti kurhandirakuaparini. Ka amamba iámendu íni ambe mintsitarhu patsakorhepasïrempti.

⁵² Ka Jesusi mímixekua káneraxapti ka iójtarhani jarhani, ka Diósï xénhchasïrempti ka ístuksï iámenduecha xénhchanhasïrempti.