San Lucas 17 - Diósïri Karakata P´urheepecha Jimbo

Kamanharhintskua tandojchpesïndi

¹ Jesusi imeri jurhengorherichani arhiaspti: “No úati nósesi jásï ambe no jurhani, k'óru ¡Che ima enga ísï niátatarpejka!

² Sánderu sésipirindi eska tsakapu urhuratarakua ma jójchakunhapiringa ka k'éri japundarhu k'uanimanhani, eska íni ma isï sapini nósesi niátatarani.

³ ¡Xéparini je!” “Eka chéti erachi k'amanharhintaska, xuka; ka enga imeri jángua mójtakuska, púakuntsï.

⁴ Na uéjkikini ma jurhiatekua jimbojku iúmu tsimani xanhari nósesi ambe úcheni, ka iúmu tsimani xanharikini jurhani arhini: ‘Nóteruni ísï jámaakia; púakuntaakari.’ ”

Jakajkukua uinhapesti

⁵ Uandakua párichaksï Achani arhispti: –Sánderujtsïni jakajkutara.

⁶ Acha arhiaspti: –Mostaseri tskípuentku engajtsï úpiringa jakajkuni, úpiringajtsï p'ukurini ma arhini: Uétsentsï ka k'éri japundarhu mótse arhini, ka p'ukuriksïni kurhajchapirindi.

Jántspiriri úkua

⁷ “Enga chári jántspirini ma, juátarhu junguarinia ka tarherinia ka karichichani ónhantaatinia, ¿Andi arhisïnijtsï incharantani sáni imani urheta t'irerani?

⁸ Nómbe chájtsï arhisïnga: ‘Mórhekorhentsï kókuani ka jupajku ka úmachentsïrini, ka jatsiracherini ka itsïjturini jatsirache. Ka tátsekuari úakia t'u arhani.’

⁹ Ka nójtujtsï diósïmaiamukua arhintasïnga enga sési úka eskajtsï na juramukupka.

¹⁰ Chájtujtsï ísï, engajtsï na iámu ambe úakia engaksïni Diósï úraka, uandaakajtsï: ‘Jántspiri nómbemarueskachi, jimbokachi imantkusï úka engachi úranhapka.’ ”

Jesusi témbeni xúta jukarichani ambakerantaasti

¹¹ Jerusaleni níntani jámani, Jesusi Samaria ka Galilea ísï parhiakuntaspti.

¹² Ka ireta sapichurhu ma niáraspti, ka jimaksï témbeni acheti xúta jukaricha uéakuspti kúmani, iauani jatinksï

¹³ uinhachaparini arhispti: –¡Jesusi, Jurhentpiri, p'amojkujtsïni!

¹⁴ Enga Jesusi exeapka, arhiaspti: –Tátechani jinguni ni je. Tátecha jinguni nirani jámanksï ambakentaspti.

¹⁵ Ka ima ma ísï enga exekorhepka eska ambakentaspka, k'uanhatsentaspti uinhachaparini Diósïni k'éri ambe arhiparini,

¹⁶ ka Jesusini tinguixurhikuspti, kápatsentaspti diósïmaiamu arhintani. Ima acheti Samaria anapuespti.

¹⁷ Jesusi uandaspti: –¿Andi nóksï témbenispki engaksï ambakentaka? ¿Máteru iúmu t'ámuksï na úskia?

¹⁸ ¿Andisï uérakua iretijku k'uanhatsentsï Diósïni k'éri ambe arhini?

¹⁹ Ka achetini arhispti: –Jauara ka ni níntani chéti jakajkukuakini ambakerantasti.

Néna jánhaskorheski Diósïri irechekuarhu

²⁰ Fariseouechaksï Jesusini kurhamarhespti Diósïri irechekua na jatini janopirini, ka ima arhiaspti: –Nónema mítetini jauati enga Diósïri irechekua janoaka.

²¹ Nónema úati uandani: Ixu jarhasti o jimini jarhasti; jimboka Diósïri irechekua chánksïni jinguni jarhaska.

²² Ka imeri jurhengorherichani arhiaspti: –Niáraatiksï jurhiatecha engajtsï náuejki ma jurhiatekuajku acheti Uájpani uékaaka exeni, ka nójtsï exeaka.

²³ Máruksï uandaati: Ixu jarhasti, o jimini jarhasti; kóru ásï ni je, ka ásïjtu chúxapaa je.

²⁴ Jimboka jimajkani enga acheti Uájpa junguaaka, piritakueni junguaati, enga iámu t'íkjaxejka,

²⁵ k'óru acheti Uájpa urheta jatsisti nósesi ambe úkorhenchani ka eskaksï urheta íni jurhiatekua anapuecha no xénhchani kámaaka.

²⁶ Ísï eska na úkorhepka jimajkani enga Noe irekani jápka, májkuentu úkorheati enga acheti Uájpa junguaaka.

²⁷ Jukari t'irenhasïrempti, ka kauinhani ka tembuchanhani jiájkani jamberi enga Noe k'éri icharhutarhu jatapka, enga iurhentpepka ka iámu uarhimenhani.

²⁸ Májkueni úkorhespti jiájkani ísï enga Lóti irekapka: Jukari t'irenhasïrempti ka kauinhani, ka ambe ataranhantani ka ambe piánhani ka tarhenhani ka k'umanchekuecha únhani;

²⁹ ka enga Lóti Sodoma uéakupka, auandarhu uératini chpíri uekorhespti janhajanhajkuparini ka iámu uarhinhaspti.

³⁰ Ísï úkorheati enga acheti Uájpa xarharaaka.

³¹ “Ima jurhiatekua, ne enga taiajtsïtakatarhu jámani jauaka ka imeri kángorhekua ambe k'umanchekuarhu incharini jatsini, ásï kétse ambe petakorheni; ka ásï nínte chénjembo ne enga juátarhu jámani jarhajka.

³² Míantsï je Lótiri uarhitini.

³³ Ne enga jángorhentaska tsípekuani patsakorheni, sánderu sóntku tsîtaati, k'óru íoni sési jauati ne enga tsípekuani tsîtaaka.

³⁴ Aianguxakaksïni eska imani chúrekua, náuejki márku k'uínhani jarhani ma pánhantaati ka ma jurajkunhaati.

³⁵ Ka engaksï nanachicha márku urhuni jauaka, ma pánhantaati ka ma jurajkunhaati.”

³⁷ Jimajkanksï kurhamarhespti: –¿Acha, nani ísï úkorhea? Ka ima arhiaspti: –Náni enga uarhiri jándentaaka k'uákichaksï jima tángorheati.