San Lucas 14 - Diósïri Karakata P´urheepecha Jimbo

Jesusi k'úrhekorhetini ma ambakerantaspti

¹ Sábadu jurhiatekua Jesusi fariseouecheri juramutio ma niraspti t'ireni, ka máteru fariseouechaksï eranguxapti.

² Ístu jima jarhaspti acheti ma enga k'úrhekorhepka.

³ Jesusi juramukua jurhentpirichani ka fariseoechani kurhamarheaspti: –¿Andi sábadu jurhiaatekuechani jiáretperanhasïnki p'amenchatini ma ambakerantani?

⁴ Ka imaksï pínasku pakarasti. Jimajkani ima p'amenchatini ambakerantaspti ka arhispti eska níntapiringa.

⁵ Ka fariseoechani arhiaspti: –¿Ne cha ma isï, enga chári sapi uekanheaka nani o enga úakasï ma uekanhaska; ka náuejki enga sábadueuaka no p'ínhantapaa?

⁶ Ka nóksï ambe ma úspti mókukuni.

Nani engaksï atsïpiticha uaxakaaka

⁷ Enga Jesusi exepka néna engaksï pámbetpiricha erakukorheni jápka k'érikuarhu uaxakani, arini arhistakuaspti:

⁸ –Ekari ambe tembuchakuarhu uandajpanhantaska, nóri jámaaka k'érikuarhu uaxakani, jimboka tátsekua jámaaka nema niárani enga t'u jinguni sánderu k'éri ambeuaka;

⁹ nándika ima engakini uandajpantaka andarheraaka ka arhinkini: Kéndiku, jurajku i uaxakani. Jimajkaniri k'uratseparini mótsentaaka, tárhukutini niárani.

¹⁰ Jimini ménderueni jama, engari uandajpanhantaska, tárhukutini niárakorhe, eska ima engakini uandajpantaka juuaka arhini: P'íchpiri, sánderu sáni k'érikuarhu niára. Ísï jámanksïni sánderu k'éri ambe exeati ima engaksï jarhojpekuarhu t'u jinguni uaxakatini jaka.

¹¹ Jimboka ima enga jandiojku k'éri arhikorhejka, ísku nemeni exenhaati; ka ima enga ísku nema exekorhejka, k'éri ambe únhaati.

¹² Imani achetini arhispti enga uandajpantapka: –Engari méni jámka t'irekua intsïmpeni, ásï jáma chéti p'íchpirichani uandajpantaani, níjtu chéti erachichani uandajpantaani níjtu chéti márkuechani uandajpantani, níjtu chéti irenguti jatsikorherichani uandajpantaa; jimbokaksïni imajtu úaka intsïmbentani t'irekua, ka ísï jámaniri maiamukorhentaaka.

¹³ Jimini ménderueni jáma, na engari jatini intsïmpeska ambakiti ma t'irekua, imechani intsïmbea engaksï no jatsikorheka, ka imani engaksï no újka jángorheni, ka pátenharhichani;

¹⁴ ka sésiri p'ikuarheraaka. Jimbokaksïni ima no úaka maiamuntani, ka jiájkaniri andakua p'iuaka engaksï kaxumbiticha tsíntaaka.

K'éri t'irekueri uandantskua

¹⁵ Indeni kurharini, ima ma isï engaksï t'ireni uaxakatini jápka Jesusini arhispti: –¡Tsípe ima enga Diósïri irechekua ambakiti t'irekuarhu jauaka!

¹⁶ Jesusi arhispti: –Acheti k'éri t'irekua ma intsïmpespti, ka uánekua uandajpentaspti.

¹⁷ Enga t'irenhani janhapkia, imeri jántspirini axaspti eska arhijpepiringa: Juia je jimboka t'irekua jaiaraskia.

¹⁸ K'óruksï iámenduecha uénaspti uandakorheni. Ma, uénani jámani uandaspti: Iáiasï echeri ma piáska ka eraatani niuaka. Sánirini tekaachentsï.

¹⁹ Máteru uandaspti: Témbeni úakasïchani piáska, ka ts'éjkuani niuaka exeani eskaksï jurhenaka tarheni, sánirini tekaachentsï.

²⁰ Ka máteru uandaspti: No úaka nirani jimbokani iásï no ióni tembuchatixaka.

²¹ Jántspiri k'uanhatsespti ka irecha jémbani aianguspti eskaksï na arhipka. Jimajkani irecha ikiatintku jántspirini arhispti: Kókuani xanharu jata, ka ireta k'ériri ambokutecharhu ni kókuani, ka no jatsikorherichani júaa, ka imani engaksï no újka jángorheni, pátenharhichani ka renhejtechani júaa.

²² Tátsekua jántspiri uandasptiteru: Tata, juájpeskia eskarini na arhika, ka útasï ambandesti.

²³ Irecha jántspirini arhispti: Xanhari jimbo ka uéramani isï ni ka máteruechani uinhapetarhu incharaa, eska jucheni uininhaaka.

²⁴ Jimbokaksïni arhixaka eskaksï nóma ima ts'émuaka k'éri t'irekuani engaksï uénani jámani uandajpanhantapka.

No néuejki úsïndi Diósïri újchakurakatani chúxapani

²⁵ Uánekuaksï Jesusini chúxapaxapti; ka ima eraparhasti ka uandani:

²⁶ “Engarini nema andarherani jaka jíndeni ka nórini sánderu uékani eska tátjembani ka eska nánde jémbani ka eska uarhiti jémbani ka eska uájpechani ka eska erachi jémbeni ka eska pirembechani, ka sánderu jamberi eska jandiojku xénhchakorheni, no úati jucheti jurhengorherini.

²⁷ Ka ne enga no míngorhentaska krúsini ka chúxapunirini, no úati jucheti jurhengorherini.

²⁸ Enga cha ma ísï k'umanchekua iótati ma uékaaka úni, ¿Andi no urheta uaxandentasïnki miuni náxani tumina uétarhea, ka exeni jatsiski tumina enga k'amarataraaka?

²⁹ Ka jimini ménderueni, enga uénaaka pítsekua tsïntsïni ka tátsekua no k'amarani, iámenduechaksï teresmarhuati,

³⁰ arhiparini: I acheti k'umanchekua uénasti, ka no ústi k'amarania,

³¹ O enga irecha ma ísï uétarhenchaaka máteru irechani jinguni uarhiperani, ¿No urheta uaxandentasïni miuantaani ua témbeni míli (10 míli) p'urhejkutichani jinguni kúmaani imani enga ma ekuatse míli (20 míli) jinguni jurhani jaka?

³² Ka enga eratseaka no úni jakuni, enga ima máteru irecha útasï iauani jauaka, axakuauati uandakua párichani eskaksï niuaka arhini eskaksï no uarhiperaakia.

³³ Ístuchka cha ne uéjki enga no jurajkuska eska xáni ambe jatsikorheka, no úati jucheti jurhengorherini.”

Parhakpeni anapu etukua

³⁴ “Etukua ambakesti; k'óru enga nóteru etumeska, ¿Nénateru marhuaua áspetarani?

³⁵ Echerirhu no marhuauati, ka terendapuntu no marhuakuati, ísterku tsîtakuestia. Ima engaksï újka kurhani, kurhangueksï.”