San Lucas 12 - Diósïri Karakata P´urheepecha Jimbo

Arhijtsïkperakuecha

¹ Enga jamberi ísï úkorheni jápka, uánekua tángorhenhaspti, xáni uáni enga jamberi jatajchakperannhani jápkia. Jesusi uénaspti uandani ka imeri jurhengorherichani urheta arhiaspti: “Jinguntku je fariseouecheri xarhiperakua jinguni, engaksï ísku ísï arhijpejka.

² Jimboka nómbema no mítekorheaka enga sïpatekuarhku patsanhani jaka, ka imajtu mítekorheati enga jískakata jaka.

³ Ísï jimbo, iámendu ambe engajtsï pájpakandu uandaka, jurhiakua t'íkjandu kurhakorheati; ka imani ambe engajtsï sïpatekuarhku ka mínhakorhetini uandaka, taiajtsïtakatarhu uératini uinhaparini uandanhantaati.”

Nésï chérhekue

⁴ “Jucheti p'íchpiricha, chánksïnisï arhini jaka eskajtsï no chérheauaka imani engaksï anhanhatakuani atajka uándikuni, ka engaksï tátsekua nóteru ambe ma újka úni.

⁵ Jíksïni arhiaka néntsïsï chérhea: Imantsïsï chérheaka enga juramukua jatsika tsípekua euajpentani ka útasï infiernurhu uekajpajpeni. Imani k'óru chérhe je.”

⁶ “¿Andi nóksï iúmu kuinicha tsimani tumina jimbojku ataranhantasïnki? Ka Diósï nóma imani jurajkuasïndi.

⁷ Diósïksïni jauiri jamberi sési mándani miucheatixati. Chájtsï kuínicha jinguni sánderu jukaparhaska, ísï jimbo ásï che je.”

Jesusiri ambe uandani

⁸ “Arhixakaksïni enga nema uandakorhejka eska jíndeni jinguniska jima enga janhaaka, acheti Uájpajtu uandaati eska imani jinguniska Diósïri ánjelichani japarini;

⁹ ka ne engarini no míteni uandaska jima enga janhaaka, no jiókorhenhaati Diósïri ánjelichani japarini.”

¹⁰ “Diósï imani jamberi púakuntaati enga acheti Uájpani arhinhchaaka; k'óru imani no púakuntaati enga imeri uandakua jimbo Espiritu Sántuni arhinhchaaka.”

¹¹ “Engaksïni k'ératichani jinguni ka juramutichani jinguni k'umanchekua tángorhentskuarhu p'itajkorheaka, ásï uandanhea je nénajtsï kuájpekorhea, ka ambe engajtsï uandaaka,

¹² jimboka engajtsï uandaranhaakia, Espiritu Sántuksïni arhistacheati ambe engajtsï uandaaka.”

Jatsikorhekua nósesi pájpesïndi

¹³ Nema teruakuni uératini Jesusini arhispti: –Jurhentpiri, arhi jucheti erachini eskarini íntskuaaka eska xáni juchetika engani jucha pakatamenhaka.

¹⁴ Ka Jesusi arhispti: –P'íchpiri ¿Nérini jíndeni arhijkutpirini o arhungustpirini péraxaki?

¹⁵ Kájtu uandaspti: –Iámendu jásï jatsinchakorhekua jinguni, jingunku jáma je; jimboka tsípekua no jatsikorhekua jimboeska.

¹⁶ Ka jimajku arini uandantskua terukutarantskua aianguaspti: “Jarhaspti ma acheti enga jatsikorheripka, ka imeri echerichaksï kánekua sési uéraspti.

¹⁷ Ima jatsikorheri uénaspti eratsentani ‘¿Néna jámaa? No jatsiska nani patsani engani p'ikuntaaka.’

¹⁸ Ka jandiojku arhikorhespti: ‘Míteskia néna engani jámaaka. Xerentauaka p'ikuntskata jatakuechani ka sánderu k'érati úantauaka, ka jima patsaaka iámu engani xáni p'ikuntaaka ka eskani xáni ambe jatsikorheka.

¹⁹ Ka jandiojkuni arhikorheni jauakia: P'íchpiri, uánekua amberisï jatsikia patsarini engakini ióni marhuacheaka; mintsikorheia, t'ire, kaui, íni irekuani tsípekorhe.’

²⁰ Ka Diósï arhispti: ‘Inchandime, iásï chúrekuari uarhiaka, ka imani ambe engari patsani jaka, ¿Nériua?’

²¹ Ísï úkorhenchasïndi ima enga jatsikorhekua ambe kánerakorhejka, ka Diósïni japarini nóma ambe jatsikorheni.”

Diósï imeri uájpechani kuájchakuasïndi

²² Tátsekua Jesusi jurhengorheri jémbechani arhiaspti: “Arhixakaksïni: Ásï uandanhea je akua ambe jimbo engajtsï nitamakorheraaka, xukuparhakua jimbojtu ásï uandanhea je.

²³ Tsípekua sánderu jukaparhasti eska t'ireni, ka anhanhatakua takusï jiguni sánderu jukaparhakuesti.

²⁴ Exea je k'uákichani: Nóksï tsíri jatsisïndi nóksï p'ikuntasïndi ka p'ikuntskata jatakuaksï no jatsisti, ka náuejki ísï, Diósï t'ireraasïndi. ¡Chájtsï k'uákicha jinguni sánderu jukaparhakueska!

²⁵ K'óru nónema úati juchari tsípekuani ióstarani náuejki sóndi,

²⁶ ka ekajtsï no újka xáni sapichu ambe úni, ¿Andijtsïsï máteru ambe uandanheajki?”

²⁷ “Exe je tsïtsïkichani néna engaksï tsikijka, nóksï ánchekorhesïndi, ka nójtuksï sïrikusïndi. Ka náuejki ísï, arhixakaksïni eska irecha Salomoni jamberi enga xáni sési xukuparhempka no xáni ísï kasïpesïrempka.

²⁸ Ka enga Diósï ísï kasïperajka uitsakuani enga juátarhu jukarini jaka, ka enga sóntku kurhinhantajka, ¡Náxanksïni chánksïni no sánderu sési xukutaa, engajtsï arisku jakajkutika!

²⁹ Ísï jimbo, ásï mískorheparini jámani ja je t'irekua ka itsïmakua jirinhani.

³⁰ Jimboka íni parhakpeni inde ambe uandanheanhasïnga, ka chájtsï Táteni ma jatsikorheska enga mítetini jakaia eskajtsï indeni ambe uétarhenchasïnga.

³¹ Cha Diósïri juramukuani engajtsï míani jauaka, ka indeni ambejtsï intsïnhaaka.

³² Jucheti karichicha, ásï che je, chájtsï namonkueska, ka Táte eratsetixatiia eskaksïni imeri irechekuani íntskuaka.

³³ Atarantsï je engajtsï xáni jatsikorheka, ka no jatsikorherichani intsïkorhea je; ambakiti sutupu kánhchaa je enga no jiángorheaka, jatsikorhekua enga auandarhu nómeni k'amakurhiaka, jima enga sïpajkurha no újka inchani o seperi arhani.

³⁴ Jimboka jima, enga chári jatsikorhekua jauaka, chári mintsitajtu jima jauati.”

Jinguntku jakuesti

³⁵ “Cha, jinguntku ja je ka erajkutarakuechani étskutini,

³⁶ ísï eskaksï ima jántspiricha engaksï jinguntku jarhajka imeri juramutini erontani enga tembuchakuarhu ma nika sési t'irekorheni, jinguntkuksï jarhasïndi enga janonguajka ka uámutani, ka mítakusïndiksï.

³⁷ Tsípeksï ima jántspiricha enga juramuti jémba no k'uítku exenunguauaka. Sési jimboksïni arhixaka eska juramuti uaxastakorheauaka t'ireraani.

³⁸ Tsípeksï imecha, enga ima tsínharhitini exenunguauaka náuejki terujkani chúrekua o erandepakua janonguani.

³⁹ Ka kurhangu je: Eska enga nema mítepiringa ambe jándu inchaakua sïpajkurha, kuáni japirindi ka no jiáretpeni eska inchamenhapiringa.

⁴⁰ Chájtu jingunku ja je; jimboka acheti Uájpa jiájkani juuaka enga cha sánderu no erokani jauaka.”

Jántspiri mintsinharhikua

⁴¹ Jimajkani Pédru kurhamarhespti: –Acha, ¿Indeni uandantskua terukutarantskuari juchantsïnkusï arhini jaki óri iámenduechanisï arhiani jaki?

⁴² Acha uandaspti: “¿Náki jántspiricheri urhejtsïkuri mintsinharhikueski? Ima enga imeri k'umanchekuarhu anapuechani ánchetpirini jurajkukuajka eska t'irerauaka na enga jándu uétarheaka.

⁴³ Tsípe ima jántspiri enga ánchetpiri ánchekorheparini exenunguaska.

⁴⁴ Sési jimboksïni arhixaka eska ánchetpiri imani jinguni jéndaaka iámendu ambe enga xáni jatsikorheka.

⁴⁵ Ka eka ima jántspiri, eranhaskaparini eska ánchetpiri ióndaaka junguani, uénaska nósesi káani máteru uarhiti ka acheti jántspirichani, ka uénani jukari t'ireni ka itsïmani ka kauini,

⁴⁶ ánchetpiri ima jurhiatekua junguaati enga sánderu no erontani jauaka, ka ima jándu enga jántspiri no míteka ka maiampetaraati ka no mintsinharhikueni útamenhantaati.”

⁴⁷ “Ima jántspiri enga míteka ánchetpiri nénasï uéjki, ka no jinguntku jarhani, ka nójtu kurhandirakuni, kánekua nósesi kánhaati.

⁴⁸ Ka ima jántspiri enga no míteparini támisï ambe újka, no xáni nósesi kánhaati. Ne enga kánekua ambe intsïnhajka ístu kánekua ambe kurhamenhaati; ne enga uánekua ambe patsaranhajka, sánderu uánekua ambe uinhamarhemenhaati.”

Jesusini jimbo arhukurhinhasïndi

⁴⁹ “Ji parhakpeni úrhutani jurhaska ka ¡Náxani uékapirini eska úrhupiringia!

⁵⁰ No sési jásï ma uandanheata nitamaaka, ka ¡Násïni p'ikuarherani jaki enga jamberi ísï úkorheaka!

⁵¹ ¿Cha uandasïnki eskani ji íni parhakpeni sési jakuasïni juka juáni? Arhixakaksïni eska no ísïska, ikiatsperakuasïni juáka.

⁵² Jimboka iásï uénatini, iúmuchani ikiatsperanhaati, tanimuksï arhirperaati máteru tsimani jinguni, ka tsimanksï máteru tanimu jinguni arhirperaati.

⁵³ Táte, uájpa tatakani ikiaakuati ka uájpa tataka, tátjembani ikiakuaati; nánde, uájpa nanaka jinguni ikiatsperaati ka uájpa nanaka, nánde jémbani jinguni ikiatsperaati; tarhampiri, tarhamba jinguni ikiatsperaati ka tarhamba, tarhampiri jinguni ikiatsperaati.”

Ambe enga Diósï xarhataaka

⁵⁴ Jesusi arhijpesptijtu: “Engajtsï exejka eska janikua jurhiata andarakuarhu ísï tángorhentani jarhasïnga, uandasïngajtsï eska janiaka, ka janisïndi.

⁵⁵ Ka enga kétsemani ísï uératini tarhiani jarhajka, uandasïngajtsï eska aparhekorheaka, ka aparhekorhesïndi.

⁵⁶ ¡Jukari uandaricha! Engajtsï sési mítekuka arhini ambe enga auandarhu ka parhakpeni úkorheaka, ¿Néna jimbojtsï no úsïni uandani íni jurhiatekuechani ambe úkorhea?”

Ikiatspirichani jinguni teruatperantani

⁵⁷ “¿Andijtsïsï no erakukorhentajki ambe enga sésika?

⁵⁸ Engakini nema p'itajkorhejka juramukuarhu ka juramuti jinguni nirani jámantsï márku nirani jarhani, engari andajkorhejka, jángorhentsï je teruatperantani, ásïkini andajkorhe juramuti jinguni pérani; jimbokakini juramuti p'urhejkutichani intsïnharhitaaka ka imaksïni k'ataperakuarhu incharaati.

⁵⁹ Aianguxakakini eskari jima pakanheaka, nóri petanhaaka, urhetari iámu ambe maiampentaaka.”