San Lucas 10 - Diósïri Karakata P´urheepecha Jimbo

Na enga Jesusi máteru jurhengorherichani axaapka

¹ Tátsekua enga na i ambe úkorhepkia, Acha máteru tanimu ekuatse témbeni tsimani erakuaspti, (72) ka tsimandani axaaspti urhetatapaani iámendu iretecharhu enga ima niárapiringa.

² Arhiaspti: “Sési jimbo p'ikuntskua kánesti, ka p'ikuntstichaksï sántkuesti. Jimbo, arhi je cha Achani enga p'ikuntskua jatsika eska axauaka p'ikuntstichani p'ikuntani.

³ Cha ni je; exe je eskaksïni karichi sapirhati, jiuatsïchani inchachataani isï axaxaka.

⁴ Tumina ásï pa je ka akuajtu ásï pa je, ka kuarhachijtu ásï pa je; ka ásï nemani jimbo p'íngukorhema je uandajpeni.

⁵ Ekajtsï inchajka nemo, urheta uandajpe je, arhiparini: ‘Ixu sési jánhe,’

⁶ Ka enga jima sési janhaka, chári sési jakua imechani andarheraati; ka eka no ísïka chájtsï nómbema tsîtaaka.

⁷ Imani k'umanchekuarhu pakara je ka a je ka itsïma je ambe engajtsï intsïmbenhajka, jimboka uétarhesïnga eska ánchekorheri maiamunhaaka. Ásï axu ka axu inchapu je.

⁸ Engajtsï ma iretarhu niáratini jiónhaaka, a je ambe engaksïni jatsiracheaka;

⁹ iámendu p'amenchatichani ambakerantaa je, ka arhia je: ‘Diósïri irechekuaksïni andarheraxatiia.’

¹⁰ Ka engaksïni mápuru iretarhu no jiókaska, xanharu jimbo ni je uandaparini:

¹¹ ‘¡Chári ireteri t'upuri jamberichi uauanduntaxaka chánksïni nósesi xécheni! K'óru míte je eskaksïni Diósïri irechekua andarheraxakaia.’

¹² Arhixakaksïni eska Sodoma no xáni nósesi kánhaska eska inde ireta na kánhaaka.”

Na engaksï ireta no jakajkuticha arhinharhikunhaaka

¹³ “¡Áke t'u Korasini! ¡Áke t'u Betsaida! Jimboka eka Tiro ka Sidoni únhapiringa milagru enga ixu úkorheka, ióntkiksïsï ch'ech'erasï ambe jukarini ka t'upuri japu atajtsïparini Diósïni andarhentapiringa.

¹⁴ K'órujtsï cha imani jurhiatekua arhinharhikperakuarhu sánderu nósesi kánhaaka, eskaksï ima engaksï Tiro ka Sidoni anapueka.

¹⁵ Ka t'u, Kafarnaumi, ¿Tsípestakorhexakiri eskari auandarhu jamberi karhatanhaaka? ¡Sánderuri uarhicho jamberisï andanheraaka!”

¹⁶ “Ima engaksïni kurhajchajka chánksïni, jíndenisï kurhajchajti; ka ima engaksïni no jiókajka, jíndenisï no jiókajti; ka ne engarini jíndeni no jiókajka, imanisï no jiókorhejti engarini axaka.”

Na engaksï jurhengorhiricha k'uanhatsentapka

¹⁷ Ima tanimu ekuatse témbeni tsimanksï kánekua tsípeparini k'uanhatsentaspti, uandaparinksï: –¡Acha, chéti jakangurhikuani jimbojtsïni nóambakiticha jamberi kurhajchasïndi!

¹⁸ Ka Jesusi uandaspti: –Ísïsti, jimbokani ji exespka enga Nóambakiti auandarhu uératini piritakueni uekorheka.

¹⁹ Jíksïni íntskuska uinhapekua chánksïni eskajtsï úaka akuitsechani ka k'uarapuechani jatanduani, ka eskajtsï andaaka iámendu uinhapekua ménderueni eratseticheri, ka nójtsï ambe ma úkorhenchani.

²⁰ K'óru ásï tsípe je engaksïni espirituecha kurhandirachejka, sánderu imani jimbojtsïsï tsípeaka enga chári jakangurhikua auandarhu pakaratini jakaia.

Tátjembani Uájpajkusï míteti

²¹ Enga na ísï arhiapkia, Jesusi Espiritu Sántuni iámu incharhekorhetini uandaspti: “K'éri ambeskari, Táte, auanda ka parhakpeniri Acha, jimbokari exeraaska sapirhatichani imani ambe engari jískakuaka kánekua jurhendichani ka kurhangutichani. Jo Táte jimbokari ísï uékaska.”

²² “Jucheti Táterini iámu ambe íntskusti. Nónema mítesti nésï uájpe, Tátejku; ka nónema mítesti nésï Táte, Uájpajku ka imajku enga Uájpa uékaaka mítetarani.”

²³ Jurhengorherichani andarhentaatini imechanku arhiaspti: “Imaksï k'ória engaksï exeaka imani ambe enga cha exeni jaka;

²⁴ jimbokaksïni aianguxaka eskaksï uánekua Diósïri uandaricha ka irechecha uékaska exeni íni ambe enga cha exeni jaka, ka nóksï exesti; uékastiksï kurhani íni ambe enga cha kurhani jaka ka nóksï kurhasti.”

Samaria anapueri uandantskua

²⁵ Juramukua jurhentpiri ma niraspti Jesusini uandaxekuni, ka ts'éjkuni uékani kurhamarhespti: –Jurhentpiri, ¿Ji néna jámaa eskani úaka méntku isï anapu tsípekua p'irani?

²⁶ Ka Jesusi arhispti: –¿Andi juramukuarhu néna karakata jarhaski? ¿O t'u ambe arhintasïnki?

²⁷ Ka ima juramukua jurhentpiri arhispti: Chéti Acha Diósïni iámu chéti mintsita jinguni íntskukorhentsï ka iámu chéti álma jinguni ka iámu chéti uinhapekua jinguni ka iámu chéti kurhangukua jinguni; ka máteru nemani xáni xénhcha eskari t'u xáni xénhchakorhejka.

²⁸ Ka Jesusi arhispti: –Sésiri arhiska. Ekari ísï jámaaka tsípekuari jatsiaka.

²⁹ K'óru juramukua jurhentpiri, ójchakurani uékani imani enga kurhangorhepka, arhispti Jesusini: –¿Ka nésï máteru nemeia?

³⁰ Jimajkani Jesusi arhispti: –Acheti ma xanhari jimbo niraxapti enga Jerusaleni uératini Jeriko niárajka, ka kuárhukpiticha máruksï kuárhukuspti ka takusï jamberiksï euakorhespti; atasptiksï ka níntanksï, uándikuxaptiksïa.

³¹ Táta ma jimesï nitamaxapti; ka enga exepka, ísku uanondaspti ka terutsemani nirani.

³² Tiósïo jándi májtu jimesï niraxapti, enga na exepka, imajtu ísku uanondaspti ka terutsemani nirani.

³³ Samaria anapu ma k'óru enga jimesï nitamatipka, ísï exerini p'amojkuspti.

³⁴ Andarheraspti ka sïpiati atamakuspti ka jomakuni. Ka jimajku ch'anchakirhu jatsiraspti ka jájkorhekuarhu páspti ka sési kámaxapti.

³⁵ Pauandekuarhu, ima Samaria anapu p'íarhaspti tsimani jurhia andakata ka jájkorhekua jatsirini íntskuspti ka arhini: Exe je íni achetini, ka engajtsï sánderu úraska, jíksïni maiamumunguaka.

³⁶ Ka ia, ¿Ima tanimueri, néniri xésïnki eska sési kámaska imani engaksï kuárhukupka?

³⁷ Ka ima juramukua jurhentpiri arhispti: –Ima enga p'amojkupka. Jesusi arhispti: –Ka níchka, ka t'újtu méntkueni jáma.

Jesusi Mártao ka Mariao niraspti

³⁸ Jesusi xanharasptiteru ka ireta sapichurhu ma niáraspti, jima iretarhu enga nanaka ma Márta arhikorhe pápka mintsikorhetarani.

³⁹ Márta jingunekuani ma kámasïrempti enga Maria arhinhempka, ima uaxandentaspti Jesusini kurhajchani.

⁴⁰ Ka Márta, enga xáni uánekua ambe úkua jimbo jatajchakukorheni jápkia, andarheraspti Jesusini ka arhini: –Acha, ¿Nóri ambe ma sáni uandasïnki engarini jucheti jingunekua jandiojku jurarkucheka iámendu úkua? Arhi eskarini jarhuataaka.

⁴¹ Ka Jesusi arhispti: –¡Mártata! Uánekua ambe jimbori uandanheaxaka ka uánekua ambe jimbori no andajkorhexaka,

⁴² ka ma ambejkusï uétarhejti. Maria imani erakusti enga sánderu ambakiti ambeka, ka nónema euantaati.