San Juan 9 - Diósïri Karakata P´urheepecha Jimbo

Jesusi pátenharhini éskatarasti

¹ Enga uéntapka, Jesusi achetini ma exemaspti enga pátenharhi kángorhenhapka.

² Ka jurhengorheri jémbechaksï kurhamarhespti: –Jurhentpiri, ¿Andisï inde acheti ísï kángorhenha? ¿Tátjemba ka amamberi k'amanharhitskua jimboeski o inderi k'amanharhitskua jimboeski?

³ Jesusi arhiaspti: –No inderi jimboesti, ka níjtu tátjemberi o amamberi k'amanharhintskue, jimbosï ísï jati eska indeni jimbo xarharaaka ambe enga xáni Diósï újka uni.

⁴ Enga jurhiakuejka, jatsiskachi ánchperata úkuni imani engarini axaka; jimboka chúrexamka enga nónema újka ánchekorheni.

⁵ Engani jámberi íni parhakpeni jámani jaka, parhakpeni anapu erajkutarakueska.

⁶ Ísï uandaspti ka t'uantskarani, kuechenda jimbo atsïmu sáni úspti ka pátenharhini éskuarhu atanharhikuspti.

⁷ Ka uandaspti: –Ni jupanharhintani itsï jatakua Siloerhu (enga “Axakata” arhikuekajka), Pátenharhi niraspti eska na arhinhapka ka jupanharhintaspti ka exepunguasptia.

⁸ Jimesï anapuecha ka iámendu ima engaksï exepka eska tumina kurhajkorheni jarhasïrempka, kurhamarhekorhesïremptiksï: –¿Andi no indesï uaxandetini jarheni tumina kurhajkorheni?

⁹ Máruksï uandasïrempti: –Jo indesti. Máteruksï uandani: Nombe, no jindesti, jinisï májkueni jánharhiti. Ka ima enga patenharhipka uandakorhesïrempti: –Jo, jíska.

¹⁰ Ka kurhamarhesptiksï: –¿Ka nénari jámani iásï úsïngia exeni?

¹¹ Ka pátenharhi arhiaspti: –Ima acheti enga Jesusi arhinhajka, atsimurini atanharhikusti, ka arhistirini: Ni itsï jatakua Siloerhu ka jupanharhintsï. Ji niraska, ka jupanharhintatini, eskaska.

¹² Jimajkuksï kurhamarhespti: –¿Andi nani jámaxaki ima acheti? Ka ima arhiaspti: –No míteska.

Jesusi néna éskataraski pátenharhini

¹³ Pátenharhinksï fariseuechani pákuaspti,

¹⁴ sábadu jurhiatekuespti enga Jesusi atsïmu jimbo eskatarantapka.

¹⁵ Ka imaksï kurhamarhespti néna jámaspi enga úempkia exenia. Ka ima arhiaspti: –Eskuarhurini atsïmu atanharhikusti, jupanharhintaska, ka úsïngia exeni.

¹⁶ Máruksï fariseouecha uandasïrempti: Ne emanga ísï niátaka, no Diósïristi, jimboka no janhanharhisïnga sábadu jurhiatekuani. Ka máteruksï undasïrempti: –¿Nénajtu úpirini indeni járhati milagru xarhataani enga k'amanharhintstika? Ísïksï arhijperaparini arhukurhispti,

¹⁷ ka ménderuksï uéntaspti kurhamarheni imani enga patenharhipka: –Ka engakini ísï éskataraka, t'u imeri ambe, ¿Ambe sáni uandasïni? Ima uandaspti: –Jucheti jimbo Diósïri uandaristi.

¹⁸ Ka judiouechaksï no uékaspti jakajkuni eska pátenharhispka ka eska iásï úsïrempkia eskani, ka tátjembani ka nánde jémbanksï p'itajkorheaspti,

¹⁹ ka kurhamarhesptiksï: –¿I chári sapiski? ¿Uandantaxakijtsï eskajtsï pátenharhi kángorheska? Ka ¿Néna jimbosï iásï újkia exeni?

²⁰ Tátjemba jembechaksï undaspti: –Míaxakachi eska juchariska, ka eskaksï pátanharhini kángorheska;

²¹ k'óruchi no míteska néna jimbosï újkia exeni, nójtuksi míteska ne eskatarantaski. Indeni kurhamarhekorhe je; k'éristia, indeksïni úatia aiangukorheni.

²² Tátjembechaksï chéta jimbo ísï uandaspti, jimbokaksï judiouecha arhijperatixapka eskaksï petantapiringa tángorhentskuarhu néni enga jiókorhepiringa eska Jesusi Krístuespka.

²³ Jimboksïsï ísï uandapti tátjembecha: “K'éristia, kurhamarhekorhe je.”

²⁴ Judiouechaksï ménderu p'itajkorhespti imani enga pátenharhipka, ka arhisptiksï: –Sésijtsïni aiangu Diósïni japarini. Jimbokani jucha míteska eska ima acheti k'amanharhintstiska.

²⁵ Jimajkani ima arhiaspti: –Enga ambe k'amanharhintstika, ji no míteska. K'óruni míteska eskani ji no éskasïrempka ka iásï éskasïngia.

²⁶ Ménderuksï kurhamarhespti: –¿Ambekini úcheski? ¿Nénakini kámaski éskatarantani?

²⁷ Ima arhiaspti: –Arhiskaksïnia, ka chájtsïni ísku kurhajchasïnga. ¿Andijtsïsï uéjki eskaksïni méntku úndaaka aianguni? ¿Andi chájtu uékaxaki chúxapani?

²⁸ Útakusptiksï enga ima ísï arhiapka, ka arhisptiksï: –T'úri jindeka imeri jurhengorherini; jucha Moisesiri jurhengorheriska.

²⁹ Ka mítetixakachi eska Diósï Moisesinisï uandaxekuka, ka indenchi no jamberi míteska nani jutiski.

³⁰ Ima enga pátenharhipka arhiaspti: –¡Nénajtia isï! Cha no míteni nani jutiski, ka imarini úni jámberi éskatarantani.

³¹ Sésichi mítetixaka eska Diósï no kurhauasïnga k'amanharhintstichani; p'amojpitichanisï kurhajchaajti ka imechani engaksï ísï irekajka eska ima námendu uéjka.

³² Nómeni mítekorhexapti eska nema éskatantapiringa máteru nemani enga pátenharhi kángorhenhaka.

³³ Eka imani achetini no Diósï axapiringa, nómbema úpirindi úni.

³⁴ Ísï jimboksï arhispti: –¿Tekaasïnijtsïni juchantsïni t'u xukani? Engari iámu k'amanharhintatini kángorhenhaka. Ka tángorhentskuarhuksï petantaspti.

Jesusi parhakpeni sési péjpentani jurhasti

³⁵ Jesusi mítespti eskaksï pátenharhini petantaspka; ka enga na kúpka kurhamarhespti: –¿T'u Acha Uájpani mintsikasïnki?

³⁶ Ima arhispti: –Arhirini ima néski, ka ji jakajkuaka.

³⁷ Jesusi arhispti: –Xériskaria: Jíska, jíndeni jinguniri uandaxexaka.

³⁸ Acheti tinguixurhikuspti Jesusini ka arhispti: –Acha, mintsikasïngakini.

³⁹ Tátsekua Jesusi uandaspti: Ji parhakpeni sési péjpentanisïni juka, eskaksï pátenharhicha éskaaka ka eskaksï pátenharhiaka ima engaksï exejka.

⁴⁰ Máru fariseouecha engaksï jima jápka, ísïksï kurharini kurhamarhespti: –¿Arhikuekaxakiri eskani juchajtuni no exesïnga?

⁴¹ Jesusi arhiaspti: –Engajtsï no exepiringa, nójtsï k'amanharhintapiringa. Ka engajtsï uandakorheni jaka eskajtsï exesïnga, k'amanharhintstiskajtsï.