San Juan 7 - Diósïri Karakata P´urheepecha Jimbo

Jesusiri erachichaksï no jakajkukusti.

¹ Ísï tátsekua, Jesusi Galilea isï jámaxapti. No uéksïrempti Judea jámani jarhani, jimbokaksï judiouecha uándikukuekaxapka.

² Ka enga judiouecheri Uapajtsïtakuecheri k'uínchekua andamutani jápkia,

³ erachi jémbechaksï arhispti: –Ásï ixujku ja; Judea ni, jurajkuksïni imajtu exeni ambe engari újka, ima engaksïni mintsikajka.

⁴ Jimboka enga nema uéjka eska mítekateuaka nómbema jirikorhetini úsïndi. Engari indeni ambe újka, iámenduechani japarini u.

⁵ Jimbokaksï erachi jémbecha jamberi no jakajkukusïrempka

⁶ Jimajkani Jesusi arhiaspti: –Jucheti jurhiatarini nótki janochexati, enga úka, chájtsï ambe uéjki jurhiata sési xésïnga.

⁷ Parhakpeni anapuechaksïni no úsïndi chánksïni kurhunheni; jíndentsïni k'óru kurhunhesïndi, jimbokani ji k'amak'amasï xarhatakuasïnga ambe engaksï nósesi niátani jaka.

⁸ Cha ni je k'uíncheni; ji no niuaka, jimboka nótki janosïnga jucheti jurhia.

⁹ Ísï arhiaspti ka Galilea pakaraspti.

Jesusi k'uínchekuarhu nirasti

¹⁰ Ka engaksï na erachi jémbecha nípkia k'uínchenia, Jesusijtu sïpatekuarhku niraspti ka no xarhatspespti.

¹¹ Judiouechaksï k'uínchekuarhu jirinhantaxapti, ka uandasïremptiksï: –¿Nanixamu jámani jaki ima acheti?

¹² Kánekua imeri ambe uandatsenhaxapti. Máruksï uandasïrempti: “Sési ambe úristi”; ka máteruksï uandasïrempti: “No sési ambe úsïndi; tandojchpesïndi.”

¹³ Enga úpka, k'uiripuni japarini nónema tekaasïrempti imeri ambe uandani jimbokaksï judiouecheri achamasïchani chérheasïrempka.

¹⁴ Enga k'uínchekua terumeni jápka, Jesusi k'éri tiósïo inchaspti ka jurhentpeni uénaspti.

¹⁵ Judiouechaksï ísku pakareratini uandasïrempti: –¿Néna jámani i xáni uáni ambe míteski, nándi no jurhengua p'iti?

¹⁶ Jesusi arhiaspti: –No juchetisti xáni jurhengua engani kámka, imeristi engarini axaka.

¹⁷ Enga nema uéjka Diósïri eratsekua úni, exeati eka Diósïrika jucheti jurhentperakua o ekani újtsïkorheni jaka.

¹⁸ Ne enga uandakorhejka, k'érikua jirinhakorhexamti; ka ne enga imeri k'érikua jirinhajka enga axaka, imani ambe uandasïndi enga ísïka, ka nómbema arhikua jukasti.

¹⁹ “¿Andi nóksïni Moisesisï juramukuani íntsku? Ka k'órujtsï nónema kurhandirakusïnga. ¿Andijtsïnisï uandikukuekajki?”

²⁰ Arhisptiksï: –¡Nóambakitikini incharhetixati! ¿Andi nékini uandikukuekaxaki?

²¹ Jesusi arhiaspti: –Iamendujtsï ísku pakareraspka ima milagruni jimbo engani [sábadu] úpka.

²² Moisesiksïnisï jurajkucheti eskajtsï sapichani ts'iuekuarhu pasïri p'ikujtsïkukuauaka, (nájkiruka no Moisesi jimboeka, tua anapuechani jimboesti) ka chájtsï p'indeska sábadu jurhiatekua ts'iueratichani ísï káani.

²³ Ekajtsï sábadu jurhiatekua ts'iueritichani mínda jatsikuajka, Moisesiri juramukuanijtsïsï no uékani jurajkuni ísï jámka, ¿Jimajkani andijtsïnisï ikiachejki engani ji achetini sábadu jurhiatekua k'amak'amasï ambakerantaka?

²⁴ Ásï nósesi xétspe je ambe ma imani jimbojku eska na xarharanhani janhajka, sési mítetini arhijpe je.

Jesusi uandakorhentaxati néski.

²⁵ Máruksï Jerusaleni anapuecha uandani uénaspti: –¿Andi nóksï ínisï jirinhantani jaki uándikukuekani?

²⁶ Nájkichka jimini jakiia uadaxetspeni ka nónema ambe arhisïndi. ¿Óksï juramuticha jiókorhia sési jimbo eska inde Krístueska?

²⁷ Ka juchachi míteska inde nani enga anapueka; ka eka Krístu janoaka, nónema míteati ima nani anapueski.

²⁸ Jesusi, tiósïo jurhentpeni jatini, uinhachaparini uandasti: –¡Cháchkajtsïni míteskia anoo! ¡Ka míteskachkajtsïa anoo ji nani anapueski! K'óruni no jutsïkorheska, nemarini axasti enga mintsinharhikueka ka enga cha no míteka.

²⁹ Ji míteska imani, jimbokani imeriska ka imarini axasti.

³⁰ Jimajkanksï jupikani uékaspti, k'óru nónema tekaaspti, jimboka nótki niárakusïrempka jurhia.

³¹ Uánekuaksï jakajkukuspti, ka uandasïremptiksï: –Enga ambe Krístu jurhaska ¿Imaxamu sánderu k'érati milagruechani úaua?

Fariseuechaksï Jesusini jupikani uékasti

³² Fariseuechaksï mítespti enga Jesusiri ambe uandanhempka; ka imaksï tátecheri urhejtsïkuricha jinguni axaaspti máru tiósïo anapu p'urhejkutichani eskaksï jupikapiringa.

³³ Jimajkani Jesusi uandaspti: –Sánderkusïni chánksïni jinguni jauakia, ka tátsekua k'uanhatsentaaka imani jinguni engarini axaka.

³⁴ Chájtsïni jirinhantaaka, ka nójtsïni xéntaaka, jimbokajtsï no úaka jima nirani engani ji jauaka.

³⁵ Judiouechaksï jimajkani uénaspti kurhamarhperani: –¿I nanixamu xáni iauani niua, engachi no úaka xéntani? ¿Óxamu judiouecha jinguni niua engaksï máteru iretecharhu irekaka ka no judiouechani jurhendaani?

³⁶ ¿Ambe arhikuekaxaki enga uandajka: Jirinhantaakajtsïni, ka nójtsïni xéntaaka, jimbokajtsï no úaka nirani jima engani ji jauaka?

Itsï tsípitiri iurhekua

³⁷ K'uínchekua k'amarhuni jámani jurhiatekua sánderu k'érispti. Ima jurhiatekua Jesusi anhaxurhitini ka uinhachaparini uandasti: –Ne emanga k'arhichani jaka, andarhererini ka itsïme,

³⁸ ne engarini mintsikajka. Eska na jataka Karakatarhu: Imeri inchanhetinksï itsï tsípiti iurhekuecha iurheati.

³⁹ Indeni uandakua jimbo, arhikuekaxamempti eska ne enga imani mintsïkapiringa Espirituni intsïnhapiringa; ka jimbokachka Espiritu Sántu nótki íntspenhasïrempka, jimboka Jesusi nótki uarhixapka ka tsíntani.

Arhukurhinhasti

⁴⁰ Teruakuni isï janhaspti máru engaksï ísï kurharini uandapka: –Ístimendiata Diósïri Uandari engachi aiamenhapka.

⁴¹ Máteruksï uandasïrempti: –Ístia enga Erakukateka. Enga úpka, máruksï uandasïrempti: –Nómbe, ¿Andi Erakukata ua Galilea anapueni?

⁴² Karakata arhisïndi eska Erakukata irecha Dabiri sïrukueuaka, ka eska Beleni anapueuaka, jima enga Dabi anapuepka.

⁴³ Ka ísï jimbo, Jesusini jimbo arhukurhinhaspti.

⁴⁴ Máruksï uéksïrempti k'ataperakuarhu páni, k'óru nónema p'árhespti pákuekani.

Juramutichaksï Jesusini no jakajkukusti

⁴⁵ P'urhejkutichaksï niántaspti jima engaksï fariseuecha ka tátecheri urhejtsïkuricha jápka, ka kurhamarheasptiksï: –¿Andijtsïsï no jua?

⁴⁶ Kuárichaksï mókukorhespti: –¡Nónema, ka nómeni nema ísï uandasti eska ima!

⁴⁷ Jimajkanksï fariseouecha arhiaspti: –¿Chájtu jurajkutakorheskia eskaksïni tandojchaaka?

⁴⁸ ¿Andi náki juramuti jakajkukuxaki, o náki fariseo jakajkukuxaki?

⁴⁹ Eka úka, ima engaksï no míteka juramukuani, ikimenhaatiksï.

⁵⁰ Nikodemu, enga fariseuepka ka enga nitipka ma xanhari Jesusini uandaxekuni arhiaspti:

⁵¹ –¿Andi juchaari Juramukua nemani ísku jatini ambe ma nósesi xékusïnki? ¿Andi no urheta kurhajchasïnki ka míteni ambe enga úka?

⁵² Imaksï arhispti: –¿Andi t'újtu Galilea anapueski? Arhintsïtkiria, ka exeakari eska Galilea anapu nónema Diósïri uandariska.

Uarhiti ísku jándi

⁵³ Ka táchani isï nitsïkorhenhantasptia.