San Juan 6 - Diósïri Karakata P´urheepecha Jimbo

Jesusi uánekua t'irerpesti

¹ Tátsekua enga na ísï ambe úkorhepka, Jesusi Galilea anapu japundarhu niraspti, enga Tiberiasi arhinhajka,

² Uánekuaksï chúxapaxapti, jimbokaksï exespka eska xáni ambe xarhatempka p'amenchatichani ambakerantaani jámani.

³ Ka Jesusi juátarhu karhamaspti ka jima jurhengorheri jémbecha jinguni uaxakaspti.

⁴ Judiouecheri k'uínchekua páskueri andamutaxaptia.

⁵ Enga Jesusi eraapka, ka exejpeni enga xáni uáni chúxapanhani jápka, arhispti Felipeni: –¿Nanichi pía xáni t'irekua enga andanguaka iámendu t'irerpeni?

⁶ Ísku ísï arhispti uékani kurhani Felipe néna arhipirini, jimboka Jesusi sési mítespkia néna enga jámapiringa,

⁷ Felipe arhispti: –Témbeni ekuatse jurhiatekua andakata jimbo t'irekua piákata no andangupirindi ka útasï sánhantku intspeparini.

⁸ Andresï, enga Jesusiri jurhengorheripka, ka enga Simoni Pédrueri erachi jémbepka, arhispti:

⁹ –Tumbi ma ixu jámaxati, enga iúmu (5) echakua tríjueri kurhinda kámani jaka ka tsimani (2) kuruchechani; nénajtuchi andangutaa xántku, uánenhasti.

¹⁰ Ka tátsekua Jesusi uandaspti: –Uaxastpe je. Jima xúxunhandespti; ka achetichaksï iúmu míli isïspti.

¹¹ Jesusi p'íkuaspti imani kurhindechani, ka diósmaiamu arhintatini, arhustakuaspti engaksï xáni uaxandetini jápka; ka kuruchechantu méntkueni íntspeaspti, anhaspti eska xáni anhejchanhapka.

¹² Ka engaksï na uiniarhapkia, arhiaspti jurhengorheri jémbechani: –Tánantsï je enga xáni pakaraka, eska no sáni tsîncheaka.

¹³ Ka témbeni tsimani tsïkiataksï uinirantaspti, engaksï iúmu (5) tríjueri kurhinda pakatapka.

¹⁴ Jimajkani kóru ísï exénhatini ambe enga Jesusi xarhatapka, uandanhaspti: –Ístia sési jimbo ima Diósïri uandari enga parhakpeni jupiringa.

¹⁵ Ka enga Jesusi exepka eskaksï uinhapetarhu Irecheni pérakuekaxapka, ménderu kéndikukuaspti, ka juátarhu jandiojku niraspti.

Jesusi itsïrhu parhijtsïkusti

¹⁶ Enga na chúrepkia, Jesusiri jurhengorherichaksï japundarhu kétsemaspti andamukuerani,

¹⁷ icharhutarhu máksï jataspti, ka Kafarnaumi nirani jámanksï parhimexaptia. Chúresptia ka Jesusi útasï nótki andanguntaasïrempti.

¹⁸ Ka japunda ísku úndaspti kánekua nósesi tarhameni jimboka uinhamu tarhiaxapka.

¹⁹ Engaksï na iúmu o kuímu kilometrueni isï xanharapkia, eronukorhesptiksï Jesusini eska andarheraaxapka itsïrhu parhijtsïkuparini, ka chérakorhesptiksï

²⁰ K'óru ima arhiaspti: –¡Ásï che je, jíska!

²¹ Jámastiksï icharhutarhu jatsirakuekani, ka k'óruksï nóteru ióndasptia andamukuentani jima engaksï niárapiringa.

Kafarnaumiksï niraspti Jesusini jirinhantani

²² Pauandekuarhu, enga xáni jiniani parhimetini pakaranhapka, exesptiksï eskaksï jurhengorhericha ma icharhuta jimbojku niraspka enga jima jápka, ka eska Jesusi no jataspka imechani jinguni, ka eskaksï jurhengorheri jémbechajkusï nípka.

²³ Ka máteru icharhutechaksï Tiberiasi uératini niáraspti, jima no iauani enga t'irenhapka ka enga Acha urheta diósmaiamu arhintapka.

²⁴ Ka engaksï exepka eskaksï nóteru jima jarhaspkia Jesusi jurhengorheri jémbecha jinguni, icharhutecharhu jatanhantaspti ka Kafarnaumiksï niraspti Jesusini jirinhantani.

Imani ambe jimbo ánchekorhe je enga no k'amakurhijka

²⁵ Ka engaksï na niárapka jiniani parhimetini, xéntasptiksï Jesusini ka kurhamarhesptiksï: –Jurhentpiri, ¿Na jatiniri jurhaski xúeni janoni?

²⁶ Jesusi arhiaspti: –Jíksïni sési jimbo arhixaka eskajtsïni cha jirinhantaxaka no jimbokajtsï kurhangukia milagruechani sánderu sáni jimbokajtsï niáchantaska t'ireni.

²⁷ Ásï t'irekua jirinhani ánchekorhe je enga ísku k'amakurhijka, sánderu sáni imani t'irekua jimbo ánchekorhe je enga no k'amakurhijka ka engaksïni méntku isï anapu ambakiti tsípekua íntskujka. Indeni jásï t'irekuaksïni íntskuati Acha Uájpa, jimboka Diósï erakuska enga Tátjembeka.

²⁸ Ka imaksï arhispti: –¿Néna uétarhesïnki eskachi jámaaka Diósïni marhuakuni?

²⁹ Jesusi arhiaspti: –Diósïni marhuakuni imajkuesti eskajtsï jakajkukuaka imani enga ima axaka.

³⁰ Ka ménderuksï kurhamarhespti: –¿Ambejtsïni ua xarhatacheni, eskaksïni jucha imani exerini jakajkucheaka? ¿Amberisï úaia?

³¹ Juchari sïrukuechaksï mana t'iresti jimesï enga no nema irekapka, eska karakatarhu na jataka: Auandarhu anapu t'irekua íntsaasti.

³² Jesusi arhiaspti: –Jurhimbitkuksïni aianguxaka, nóksïni Moisesisï t'irekua auandarhu anapu íntskupti, jucheti Táteksïnisï ambakiti t'irekua auandarhu anapu íntskujti.

³³ Jimboka Diósïri t'irekuasï auandarhu uératini kétsejka ka parhakpeni ambakiti tsípekua intspeni.

³⁴ Imaksï arhispti: –Tata, méntkisïjtsïni indeni jásï t'irekua íntsku.

³⁵ Ka Jesusi arhiaspti: –Jísïni t'irekueka enga ambakiti tsípekua íntspejka. Ne engarini andarhentajka, nómeni k'arhimaati; ka ne engarini míntsikajka, nómeni k'arhichaati.

³⁶ Eskaksïni k'óru na arhikia, chájtsï no jakajkusïnga náuejkijtsïni exekia.

³⁷ Imechani engarini Táte íntsaajka andarhentasïndijtsïni; ka imechani engajtsïni andarhentajka, ji sési eroasïnga.

³⁸ Jimbokani ji no juramukorheni andajpenuska, sánderu sáni imani marhuakuxamka engarini axaka.

³⁹ Ka imeri eratsekuesti engarini axaka, eskani nónemani uéjkuaka engarini ima íntsaaka, sánderu sáni eskani k'amarhuni jámani tsítantauaka.

⁴⁰ Jimboka Jucheti Táteri eratsekueska, eska ne engaksï míteaka Diósï Uájpani ka mintsikanksï, eskaksï méntku isï anapu ambakiti tsípekua intsïnhaaka; ka eskani ji k'amarhuni jámani tsítantauaka.

⁴¹ Jimboksïsï Judiouecha uénapti Jesusini uandatseni, jimboka uandaspka: “Jíska t'irekua enga auandarhu uératini andajpenuka.”

⁴² Ka uandasptiksï: –¿Andi no ísï Jesusi Jose uájpe? Míteskachi amambani ka tátjembani. ¿Néna jimbosï uandajki eska auandarhu úeratini andajpenuska?

⁴³ Jesusi arhiaspti: –Ásteru uandatseni ja je.

⁴⁴ Nónemarini úsïndi jíndeni andarherani, enga no Táte andarhetantajka; ka k'amarhuni jámani ji tsítantaaka.

⁴⁵ Diósïri uandaricheri karakatecharhu arhisïndi: Diósï iámenduechani jurhendauati. Ísï jimbo iámendu ima engaksï kurhajchajka Táteni ka engaksï kurhangujka imeri ambe, andarhentasïndijtsïni.

⁴⁶ “No jimboka nema Táteni exerika; imajkusï exeriti enga imerika.

⁴⁷ Sési jimboksïni arhixaka, ne engarini mintsikajka, méntku isï anapu ambakiti irekua jatsikorhestia.

⁴⁸ Jísïni t'irekueka enga ambakiti tsípekua intspejka.

⁴⁹ Chári ióntki anapuechaksï mana t'iresti jimesï enga no nema irekaka, ka uarhistiksïa;

⁵⁰ ka ji imani t'irekuasïni uandani jaka enga auandarhu uératini jurhajka; ne enga imani arhajka, no uarhisïndi.

⁵¹ Ji ima tsípiti t'irekueska enga auandarhu uératini andajpenuka; ne enga arhaska indeni t'irekuani, méntku isï ambakiti tsípekua jatsiati. T'irekua engani ji íntspeaka jucheti kuiripuekuesti. Engani ji iámenduechani jimbo íntspeaka.”

⁵² Judiouechaksï arhinhaskperani uénaspti: –¿Nénajtujtsïni inde inderi k'uiripuekuani íntskua?

⁵³ Jesusi arhiaspti: –Sési jimboksïnisï arhijka eska engajtsï Acha Uájperi k'uiripuekuani ka iurhirini no arhaska, nójtsï p'iuaka ambakiti tsípekua.

⁵⁴ Ne enga jucheti k'uiripuekuani ka jucheti iurhirini arhajka, méntku isï anapu irekua jatsisïndi; ka ji k'amarhuni jámani tsítantaaka.

⁵⁵ Jimboka jucheti k'uiripuekua sési jimbo t'irekueska, ka jimboka jucheti iurhiri sési jimbo itsïmakueska.

⁵⁶ Ne enga jucheti k'uiripuekuani ka jucheti iurhirini arhajka, jíndeni jingunisïndia, ka ji imani jingunisïnga.

⁵⁷ Ísï eskarini Táte enga irekani jaka na jíndeni axaka, ji Táteni jimbo irekaxaka; ka ne engarini p'iuaka, ji irestani jauaka.

⁵⁸ Imani t'irekuanisïni arhijka enga auandarhu uératini andajpenuka. No manani engaksï chári ióntki anapuecha aka ka uarhinksï; ne enga arhajka íni t'irekuani no méni uarhiaati.

⁵⁹ Jesusi íni ambe, Kafarnaumi tángorhetskuecharhu jurhentpespti.

Méntku isï anapu tsípekueri uandakua

⁶⁰ Uánekua jurhengorheri jémbechaksï ísï kurharini uandaspti: –Indeni ambe enga uandajka kánekua ts'unhapesti kurhanguni; ¿Néjtu kurhangua?

⁶¹ Jesusi mítetini ambe engaksï arhindikperani jápka, kurhamarheaspti: –¿Nósesiksïni pásïni indeni ambe kurhani?

⁶² ¿Nénajtsï jámapirini jimajkani engajtsï exepiringa Acha Uájpani karhanchentani jarhani jini niántani enga jápka?

⁶³ Espiritusï ambakiti tsípekua íntspejti; k'uiripuekua nómbema marhuasïndi. Ka indeni ambe engaksïni arhika espirituesti ka tsípekuesti.

⁶⁴ Jarhaskajtsï k'óru cha máru engajtsï no jakajkujka. Jimboka Jesusi uénani jámantki mítetixaptia ne engaksï no jakajkupiringa ka ne enga imani intsïnharhitpepiringa.

⁶⁵ Ka uandasptiteru: –Indeni jimboksïnisï arhijka eskarini nónema úaka andarherani, enga no Táte jimboeuaka.

⁶⁶ Jimajkani uératinksï uánekua jurhegorheri jémbecha kéndikukuspti engaksï ima jinguni jámani jápkia, ka nóteruksï chúxapasptia.

⁶⁷ Jesusi jimajkani témbeni tsimani jurhengorherichani kurhamarheaspti: –¿Chájtu ninhejchantaxakiia?

⁶⁸ Simoni Pédru arhispti: –Tata, ¿Nénguntuchi niua? T'úrisï méntku isï anapu ambakiti tsípekueri ambe uandajka.

⁶⁹ Jucha jakajkuskia ka míteskachi eskari t'u Diósïri Újchakurakateska.

⁷⁰ Jesusi arhiaspti: ¿Andi nóksïni ji chánksïni témbeni tsimani erakuski? Ka náuejki isï, cha ma isïjtsï nóambakitiska.

⁷¹ Ísï uandarini, Jesusi Júdasïnisï arhini jápti, Simoni Iskariote uájpani, jimboka Júdasisï intsïnharhitpepiringa, náuejki imechani jingunipka.