San Juan 5 - Diósïri Karakata P´urheepecha Jimbo

Acheri ánjeli ma kétsesïrempti

¹ Namoni jurhia tátsekua, judiouechaksï k'uínchekua ma úntaxapti, ka Jesusi Jerusaleni karhamaspti.

² Jerusaleni, no iauani jarharetini jima inchakuarhu enga Karichicha arhinhajka, itsï jatakua ma jarhasti enga ebreo jimbo Betsata arhinhajka. Iúmu inchakua sapirhati jukaasti,

³ ka jimaksï umbamukuspti uánekua p'amenchaticha, pátenharhicha, chkéjchuecha, k'urhujkurhecha (ka engaksï no úempka manakorheni. Iámenduksï ima erokorheni jarhasïremti eska manamepiringa,

⁴ jimboka Acheri ánjeli ma kétsesïrempka itsï manamani ka ima p'amenchati enga urheta inchamempka ambakentasïrempti ambe uéjki p'amenchakua kámani japiringa.)

⁵ Jima jarhaspti acheti ma enga ma ekuatse témbeni iúmu tanimu uéxurhini p'amenchani jápkia.

⁶ Enga Jesusi exepka eska jima apomukuspka ka enga mítepka eska xáni ióni p'amenchaspkia, kurhamarhespti: –¿Uéksïndi ambakentani?

⁷ P'amenchati arhispti: –Tata, nónemani kángorhesïnga engarini inchamaaka sáni enga manamejka. Engani uékani jarhajka inchameni máterurini t'uíni urhechepasïndia.

⁸ Jesusi arhispti: –Jauara, k'arhantsï chéti jatatsekuani ka xanhara.

⁹ Acheti ambakentapaspti, ka k'arhakorhentaspti jatatsekuani ka xanharaspti. Ka jimboka sábadu jurhiatekuepka,

¹⁰ judiouechaksï Jesusini arhispti: –Iásï sábaduesti; ka nósesisti jatatsekua pákorhentani.

¹¹ Ima acheti arhiaspti: –Ima engarini ambakerantaka arhistirini: Tarhatakorhe jatatsekua ka xanhara.

¹² Ka imaksï kurhamarhespti: –¿Néski ima acheti engakini arhika: Tarhatakorhe jatatsekua ka xanhara?

¹³ K'óru ima enga ambakeranhantapka no mítespti nésï ambakerantapi, jimboka Jesusi jimajku nónespka jimboka uáni jánhaxapka.

¹⁴ Tátsekua Jesusi tiósïo xéntaspti, ka arhini: –Exe, iásï engari ambakentakia, ásteru jáma kámanharhintani, nóri sánderu nósesi ambe úkorhenchani.

¹⁵ Acheti níntaspti ka aianguani judiouechani eska Jesusisï ambakerantapka.

¹⁶ Jimboksïsï judiouecha Jesusini jirinhantani jámani jáptia, jimboka sábadu jurhiatekuechani xásï ambe úsïrempka.

¹⁷ Ka Jesusi arhiaspti: –Jucheti Táte méntku isï ánchekorhesïndi, ka jíjtuni ánchekorhesïnga.

¹⁸ Indeni jimbo, judiouechaksï sánderu uéksïrempti atani uándikuni, jimboka no sábadu jurhiatekuankusï juramukuani no kurhandirakuempka, ka jimbokajtu ima uandasïrempka eska Diósï jinguni májkuenispka, uandaparini eska Diósï imeri Tátjembespka.

Iámu ambe enga xáni Tátjemba újka, Uájpajtu úsïndi

¹⁹ Jesusi arhiaspti: “Sési jimboksïni arhixaka eska Diósï Uájpa nómbema úsïnga úni jandiojku; imani ambejkusï újti enga Tátjembani exeni jarhajka. Iámu ambe enga xáni Tátjemba újka, Uájpajtu úsïndi.

²⁰ Jimboka Tátjemba xénhchasïnga Uájpani ka exerasïndi iámu ambe eska xáni újka; ka xéraatiteru sánderu k'érati ambe, enga chánksïni ísku pakataaka.

²¹ Jimboka ísï eska Tátjemba na tsítantaajka uarhirichani ka tsípekua íntsaani, Uájpajtu ísï íntsaasïndi tsípekua imechani enga uéjka intsaani.

²² Ka Táte nónemani k'amanharhirantasïndi, ka Uájpani íntskusti iámu juramukua eska k'amanharhirpentaaka,

²³ eskaksï iámenduecha májkueni k'éri ambe exeaka Uájpani eska Tátjembani. Ne enga no k'éri exejka Uájpani, nójtu k'éri exesïndi Tátjembani enga axaka.”

²⁴ “Sési jimboksïni arhixaka eska ne enga sési kurhajtsïtani jaka engani ji uandani jaka ka enga jakajkuska imani engarini axaka, ambakiti tsípekua méntku isï anapu p'itixatiia; ka no k'amanharhiranhantaati, jimboka uarhikuarhu uératini ambakiti tsípekuarhu niáraskia.

²⁵ Sési jimboksïni arhixaka eska janoxakaia jurhiata, ka iásïstia, engaksï uarhiricha Diósï Uájpani kurhauaka mintsïrani; ka ima engaksï kurhaska, ambakiti tsípekuaksï jatsiati,

²⁶ jimboka májkueni eska na Tátjemba kángorhejka tsípekua, májkueni ústi eska Uájpajtu támu kángorheaka tsípekua

²⁷ ka íntskusti juramukua arhinharhikpeni, jimbokajtu támu acheti Uájpeska.

²⁸ Ásï nósesi exe je íni ambe, jimboka niáraaka jurhia engaksï iámendu uarhiricha imeri mintsirakua kurhauaka

²⁹ ka uétsentaatiksï. Ima engaksï sési ambe úka, tsíntaatiksï ambakiti tsípekua p'irani; ka ima engaksï nósesi ambe niátaka, tsíntaatiksï ka uekajpanhaatiksï ka nóksï méni k'amajpeati.”

Jesusini Táte axasti

³⁰ “Ji nómbema úsïnga jandiojkuni úni. Eskani xáni kurhajka, xántkuni arhinharhikpesïnga, ka jucheti arhijkutpekua no jukarisïndi, jimboka no jucheti eratsekueska, imanisïni uandajka eskarini na arhika ima engarini axaka.

³¹ Ekani ji jandiojkuni uandakorhentapiringa, jucheti uandantskua no ísïpirindi.

³² Jarhasti k'óru máteru enga jucheti jimbo uandantajka, ka ji míteska eska ima jucheti ambe jurhimbitku uandantasïnga.

³³ Chájtsï axajpeska Juánuni kurhamarheni, ka ima no chkuándiraparini jurhimbitku uandantasti.

³⁴ No jimbokani ji nemeri uandantskua jimbo jaka, íni ambe imani jimbojkuni uandasïnga, eska cha úaka p'ímutanhantani.

³⁵ Juánu erajkutarakua máespti enga étskurhitini jápka ka enga erandutpempka, ka chájtsï imeri t'íntskua jimbo no uékaska ióni tsípeni.

³⁶ Ka ji jatsiska k'óruni máteru xérpekua enga sánderu sési ambeka eska Juánueri uandantskua. Ambe engani ji újka, engarini Táte arhijka eskani úpiringa, inde jimbo xarharasïndi eskarini sési jimbo Táte axaska.

³⁷ Ka Táte, engarini axaka, jíndeni jimbo uandantasïndi. Chájtsï nómeni kurhariska ka níjtujtsï méni exe,

³⁸ ka imeri uandakuantsï no pakataska, jimbokajtsï no mintsïkasïnga imani enga axaka.

³⁹ Chájtsï karakatechani kánekua sési exeparini jurhengorhesïnga, jimbokajtsï méntku isï anapu irekuani jima xéntskuekasïnga; ka imaksï karakatecha jucheti ambesï uandantajti.

⁴⁰ Ka chájtsï no uéksïnga jurhani jíndeni jinguni ambakiti tsípekua p'irani.”

⁴¹ “Ji k'érikua no parhakpeni intsïnhasïnga.

⁴² Míteskaksïni k'óru eskajtsï no kámasïnga Diósïri uékperakua.

⁴³ Ji jucheti Táteri jimbo jurhaska, ka chájtsïni no jiókaska; ka enga máteru nema jutsïkorhepiringa imantsï jámapiringia jiókani.

⁴⁴ ¿Nénajtsï ua jakajkuni, engajtsï chájku k'éri ambe arhijperajka, ka imani t'íntskuani enga Diósï axajka, enga májkueka, nójtsï jirinhantani?

⁴⁵ Ásï eratseni ja je eskaksïni jucheti Táteni japarini uandachentaaka; Moisesijkuksïnisï uandachentajti, ima enga cha mintsikajka.

⁴⁶ Jimboka enga cha Moisesini jakajkukupiringa, jíndenijtujtsïni jakajkuchepiringa, jimboka Moisesi jucheti ambesï karaka.

⁴⁷ Ka ekajtsï imeri karakatani no jakajkujka ¿Nénajtsï jakajkua engaksïni ji arhini jaka?”