San Juan 4 - Diósïri Karakata P´urheepecha Jimbo

Jesusi Samaria anapu ma uarhiti jinguni uandaxespti

¹ Fariseouechaksï mítespti eska Jesusi sánderu uáneraaxapka jurhengorherichani, ka eska Juánuni jinguni exentaparini, sánderu uánekua itsï atajtsikpexapka.

² Nójtu Jesusisï itsï atajtsïkpeni jápti, imeri jurhengorherichaksïsï ísï jámani jápti.

³ Enga Jesusi aiangunhapka eskaksï fariseouecha mítespkia, Judea uéakuntaspti ka Galilea k'uanhatsentani.

⁴ Níntani jámani, Samaria isï nitamantapirindi.

⁵ Ka ísï jámani Samaria anapu ma iretarhu jamantaspti enga Sikari arhinhajka, jimajku isï enga Jakobu uájpa Joseni echeri jurajkukuapka.

⁶ Jima jarhaspti itsï uératirhu enga Jakobu xéntapka. Jesusi, kuataratini xáni xanharani, imani itsï p'itakuarhu uaxamukuspti. Teruxutini isïspti.

⁷ Uarhiti ma Samaria anapu jima niáraspti itsï p'itani ka Jesusi arhispti: –Intsïmberini sáni itsï.

⁸ Jurhengorherichaksï iretarhu jámaxapti t'irekua sáni piákorheni.

⁹ Ka jimbokaksï judiouecha ikiatsperasïnga Samaria anapuecha jinguni, uarhiti arhispti: –¿Andirinisï jíndeni itsï kurhachejki? ¿T'úri judioueska, ka ji Samaria anapueska?

¹⁰ Jesusi arhispti: –Engari mítepiringa ambe enga Diósï íntspejka, ka ekari mítepiringa nékinisï itsï kurhacheni jaki, t'úrisï itsï kurhakupiringa, ka imakini itsï tsípiti íntskupirindi.

¹¹ Uarhiti arhispti: –Tata, itsï p'itarakua jámberiri no kámasïnga, ka jimini kánekua jauanhesti: ¿Nénarinisï itsï tsipiti íntskuaia?

¹² Íni itsïnijtsïni Juchari táte Jakobu jurajkuchesti, ixuksï itsïmasirempti imajtu ka imeri uájpecha ka karichicha enga ima kángorheauempka. ¿Andi t'u sánderu k'éri ambeski eska ima?

¹³ Jesusi arhispti: –Ne enga ixu p'itakata itsïmaska, ménderu k'arhichaati;

¹⁴ ka ne enga imani itsïmaska engani ji íntskuaka, nóteru méni k'arhichaatia. Jimboka itsï engani ji íntspejka, méntkisï anapu itsï uérati újpentasïndi, enga tsípekua méntkisï anapu íntspejka.

¹⁵ Uarhiti arhispti: –Tata, imeni jásï itsïrini íntsku, eskani nóteru méni jámaaka k'arhichani ka nóteru uétarheni eskani ji ixu juuaka itsï p'itani.

¹⁶ Jesusi arhispti: –Ni urheta p'irani chéti achetini.

¹⁷ Ka uarhiti arhispti: –Ji achetini no kámasïnga. Jesusi arhispti: –Sésiri arhisïnga eskari no kámasïnga achetini;

¹⁸ jimbokari iúmu káaskia, ka ima engari jinguni iásï jámani jaka no chéti achetisti. Ísïsti eskari na uandaka.

¹⁹ Ísï kurharini, uarhiti uandaspti: –Tata, jánhaskaskia eskari Diósïri uandariska.

²⁰ Juchari ióntki anapuechaksï Samaria anapuecha, ixu íni juátarhu Diósïni k'éri ambe arhisti; ka chájtsï judiouecha uandasïnga eska Diósï Jerusalenisï k'éri arhikueka.

²¹ Jesusi arhispti: –Uarhiti, jakajkucherini, jimboka janoxakaia jurhiata engajtsï cha k'éri ambe arhiaka Táteni ka no uétarheati eskajtsï ixu juuaka juátarhu níjtu Jerusaleni nirani.

²² Chájtsï no míteska nénijtsï kéri ambe arhisïni; ka jucha míteska néni enganichi k'éri ambe arhijka, jimboka p'ímutantskua judiouecha jimboeska.

²³ Ka janoxatiia jurhiata, ka iásïstia, eska ima engaksï sési jimbo k'éri ambe arhijka Táteni, sésimenduksï mintsita jinguni k'éri ambe arhiaka. Jimboka Táte imechanisï uékaani jaka engaksï ísï k'éri arhiaka.

²⁴ Diósï Espirituesti, ka ima engaksï k'éri ambe arhijka, sési jimboksï mintsita jinguni k'éri ambe arhisïndi.

²⁵ Uarhiti arhispti: –Ji míteska eska Mesiasi juuaka (enga Krístueka); ka eka ima janoaka, iámu ambejtsïni jánhastaati.

²⁶ Jesusi arhispti: –Jískachkania, engakini uandaxecheni jaka.

²⁷ Enga ísï úkorheni jápka, niántasptiksï jurhengorhericha, ka ískuksï pakarerani enga Jesusi uarhiti ma jinguni uandaxeni jápka. K'óru nónema tekaaspti kurhamarheni ima imani uarhitini jinguni ambesï uékempki, ka ambeksï uandaxexapi.

²⁸ Uarhiti jima jurajkuspti k'amukua ka iretarhu aiangpeparini jámaxapti:

²⁹ –Ju je exeni achetini ma engarini iámu ambe arhika eskani xáni ambe ji jámatika. ¿Cha no arhijki eska ima Diósïri axakatekia?

³⁰ Jiájkani k'óru uéakunhaspti iretarhu ka ninhaspti jima enga Jesusi jápka.

³¹ Enga nótki niaranhani jápka jurhegorherichaksï arhisïrempti Jesusini: –Jurhentpiri, a sáni ambe.

³² K'óru ima arhiaspti: –Ji jatsikorheska ma jásï t'irekua enga cha no míteka.

³³ Jurhengorherichaksï kurhamarhperaspti: –¿Andi nema juáku ambe ma t'irekua?

³⁴ Ka Jesusi arhiaspti: –Jucheti t'irekua aristi: Úni embe enga ima uéjka engarini axaka ka no jurarkukuni, k'amarakuni.

³⁵ Chájtsï uandasïnga: T'ámu kutsï jimboteru p'íkuntskueuatia; ka jíksïni arhixaka eskajtsï eraataaka tarhetani, jimboka p'ikuntskueskia.

³⁶ P'ikuntsti maiamunhasïndi, ka p'ikuntskata méntki isï anapu tsípekuesti, ka ísïksï jámani tsíri jatsïri ka p'ikunsti márku tsípeati.

³⁷ Jimbokaksï sésku arhisïnga eska: Ma tsíri jatsisïnga ka máteru nema p'ikuntani.

³⁸ Ka jíksïni chánksïni p'ikurantani jima axaska engajtsï nómbema ánchekorheta incharhetaka; máteruksï ánchekorhesti, ka chájtsï imecheri ánchekorheta jimbo sési uéraska.

³⁹ Uánekuaksï jakajkukuspti Jesusini imani ireta Samaria anapuecha, enga ima uarhiti k'amak'amasï aianguapka: “Iámu amberini arhisti eskani xáni ambe jámatika.”

⁴⁰ Ka ísï jimbo, engaksï Samariauecha niárapka, kómu arhisptiksï Jesusini eska jima pakarapiringa. Ima jima pakaraspti tsimani jurhia,

⁴¹ ka uánekuateruksï jakajkuspti kurharini enga ima uandempka.

⁴² Ka uarhitinksï arhispti. –Jakajkuskachia, no imani jimbojku engajtsïni t'u aianguka, támu jimbokani jucha kurhaskia ka míteskachi eska sési jimbo inde parhakpeni P'ímutantspitiska.

Jesusi irecheri ánchekorheri uájpani ma ambakerantasti

⁴³ Enga na nitamapka ima tsimani jurhia, Jesusi Samaria uéakuntaspti ka xanhari jatantaspti Galilea nirani.

⁴⁴ Jimajkani isï, Jesusi uandaspti eska Diósïri uandari ma, imeri iretarhu no janhanharhinhasïnga.

⁴⁵ Enga niárapka Galilea, jimesï anapuechaksï sési jiókaspti, jimbokaksï imajtu niraspka Páskueri k'uínchekuarhu Jerusaleni ka exesptiksï enga xáni ambe ima jima úpka.

⁴⁶ Jesusi k'uanhatsentaspti Kana, Galilea, jima enga itsïni kauikua úntapka. Ka irecheri jántspiri urhejtsïkuri ma, uájpani Kafarnaumi p'amenchataxapti.

⁴⁷ Enga urhejtsïkuri mítepka eska Jesusi Galilea niántaspka, Judea uéntatini, niraspti uandaxekuni ka kómu arhispti eska nipiringa chénjembo ka eska uájpani ambakerantapiringa, enga uarhini jápkia.

⁴⁸ Jesusi arhispti: –Chájtsï no úsïnga jakajkuni engajtsï no urheta ambe ma xarharani exejka ka milagruechani exearini.

⁴⁹ K'óru, urhejtsïkuri arhispti: –Tata, ju kókuani, k'óru t'uíni jucheti sapi uarhiatia.

⁵⁰ Jesusi jimajkani arhispti: –Ni níntani; chéti sapi sési jarhastia. Acheti jakajkuspti enga Jesusi uandapka ka níntaspti.

⁵¹ Enga níntani jápka kúmantasptiksï jántspiri jémbecha ka arhinksï: –¡Chári sapi sési jarhastia!

⁵² Ima kurhamarheaspti ambe jándu uénaspi imeri sapi sési p'ikuarherani, ka arhisptiksï: –Uitsindekua téjkamatiru kéndikukusti tinharakua.

⁵³ Tátjemba, jimajkani jánhaskantaspti eska ima jándu Jesusi arhispka: “Chéti sapi sési jarhastia”; ka iámenduksï jakajkukuspti Jesusini, imao anapuecha.

⁵⁴ Jesusi, íni tsimani úni jámani milagru úspti, enga Judea uéntatini Galilea janonguapka.