San Juan 3 - Diósïri Karakata P´urheepecha Jimbo

Ménderu andajpenuni

¹ Jarhaspti fariseo ma, enga Nikodemu arhinhempka, enga judiouechani jinguni k'éri ambepka.

² Ima chúrekua niraspti Jesusini p'urhembeni, ka arhispti: –Jurhentpiri, míteskachi eskakini Diósï axaska jurhentpeni, jimboka nónema úpiringa xárhati milagru úani ísï eska t'u na úajka, enga Diósï no ima jinguni japiringa.

³ Jesusi arhispti: –Sési jimbokini arhixaka eska ne enga no ménderu uéntaska andajpenuni, eska ima no úsïnga Diósïri Irechekuani exeni.

⁴ Nikodemu kurhamarhespti: –¿Ka néna ua ma ménderu andajpenuni enga t'arhepeakia? ¿Andi ua ma nánde jémbani ménderu inchaakuntani, ka ménderu uéntani andajpenuni?

⁵ Jesusi arhispti: –Sési jimbokini arhisïnga eska ne enga no itsï ka espiritu jimbo andajpenuska, no úsïnga Diósïri Irechekuarhu inchani.

⁶ Ne enga k'uiripu uájpeka, parhakpeni anapuesti, ka ne enga espiritu jimbo andajpenuka, espirituesti.

⁷ Ásï nósesi xe engakini arhijka: K'uanisïndi eskari ménderu andajpenuntaaka.

⁸ Tarhiata nirasïndi nani enga isï uékajka, ka náuejki ri kurhani jarhani, nóri mítesïnga naniasï tarhiaxaki. Ísïstiksï iámendu imajtu engaksï espirituni jimbo andajpenuntajka.

⁹ Nikodemu ménderu kurhamarhespti: –¿Ka nénasï úaia ísï úkorheni?

¹⁰ Jesusi arhispti: –T'u, engari Israelicheri jurhentpirika, ¿Nóri míteski?

¹¹ Sési jimbokini arhisïnga eskani jucha imani ambe uandasïnga engachi míteka, ka imani ambechi uandantasïnga engachi exerika; ka chájtsï no jakajkusïnga engaksïni arhini jarhajka.

¹² Engajtsïni no jakajkuchejka parhakpeni anapu ambe engaksïni aianguni jarhajka, ¿Nénajtsïnisï jakajkucheaia engaksïni auandarhu anapu ambe uandaxecheaka?

¹³ “Nónema karhanchetisti auandarhu, imajku enga auandarhu uératini kétsetika; Acha Uájpanisïni arhini jaka.

¹⁴ Ka ísï eska Moisesi na akuitseni iótakuarhu tarhatapka jima enga nónema irekaka, Acha Uájpajtu ísï tarhatanhaati,

¹⁵ ka eska ne enga imani mintsikaaka, méntku isï anapu tsípekua jatsiati.”

Na enga xáni Diósï xénhchaka parhakpenini

¹⁶ “Jimboka Diósï parhakpeni anapuechani xáni xénhchaaska jimbosï jamberi Uájpani íntspeti, imani enga májkueka, eska ne enga imani mintsikajka no uarhiaka, eska méntku isï anapu tsípekua kámaaka.

¹⁷ Jimboka Diósï, Uájpani no parhakpeni arhinharhikpeni axaska, sánderu sáni axasti eska imani jimbo parhakpeni p'ímutanhantaaka.”

¹⁸ “Ne enga Diósï Uájpani jakajkujka, no k'amanharhiranhantaati; k'óru ima enga Diósï uájpani enga jandiójkueka no jakajkujka, k'amanharhirantskatestia jimboka no jakajkukusïnga.

¹⁹ Ima engaksï no jakajkujka, k'amanharhiranhantastiksïa, jimbokaksï nósesi ambe úsïrempka. Jiájkani enga parhakpeni anapu eramarhandekua juka, pájpakandekuanksï erakusti ka nóksï eramarhandekuani erakuni.

²⁰ Iámendu ima engaksï nósesi ambe niátajka nóksï xénhchasïndi eramarhandekuani, ka nóksï andarherasïndi jimboka ísï jámani mítekorheaka ambe engaksï úni jaka.

²¹ K'óru ima engaksï irekani jaka eska néka, andarherasïndiksï eramarhandekuani, eska xarharaaka eskaksï iámendu ambe ísï úsïnga eskamendu néka Diósïri eratsekua.”

Nónema úati ambe ma jatsikorheni enga no Diósï íntskuaka

²² Tátsekua enga na inde ambe úkorhepkia, Jesusiksï jurhengorhericha jinguni Judea isï niraspti, jimaksï jarhaspti namoni jurhia itsï atajtsïkpeni.

²³ Jini Enoni, Juánujtu itsï atajtsïkpexapti, jini enga Salimi no iauani jarharetinika, jimboka jimesï kánekua itsï uéraxapka; ka ninhasïrempti ka itsï atajtsïnhasïrempti.

²⁴ I ambe, urheta ísï úkorhespti engaksï Juánuni k'ataperakuarhu nótki incharani jápka.

²⁵ Ka máru Juánueri chúngumatichaksï uénaspti judio ma jinguni jupajtsïtperantskueri ambe uinhamu uandaxeni,

²⁶ ka Juánuniksï niraspti arhini: –Jurhentpiri, ima enga t'u jinguni jámani jápka Jordani iurhekuarhu parhikutini, ima engari aiangpekuntaka, imajtu itsï atajtsïkpexati ka iámenduksï chúxapasïndi.

²⁷ Juánu arhiaspti: –Nónema úati ambe ma jatsikorheni enga no Diósï íntskuaka.

²⁸ Chájtsïni sésimendu kurhajchaskia eskani ji no Krístueska, eskani imeska engani urhetatapunhaka.

²⁹ Tembuchakuarhu ma, tembuchasï tsípeni jarhajti tembunhani exeni; ka tembucheri p'íchpiri enga pámbeni jámani jarhajka, tsípenitsipesïndi tembuchani kurhajchani enga uandantani jarhajka. Jíjtuni iásï ísï tsípenitsipexaka.

³⁰ Imeri k'érikua jatsisti kánepani jarhani, ka ji sapichuentapani jarhani.

Ima enga auadarhu uératini jurhani jaka

³¹ “Ima enga auandarhu uératini jurhani jaka, iámendu karhakua jakuasti. Ima enga echeririka parhakpeni anapuesti, ka parhakpeni anapu ambe uandaxesïndi. K'óru ima enga auandarhu uératini jurhajka iámenduechani karhakua jakuasti,

³² ka uandantasïndi eska xáni ambe exeka ka kurhani; enga úka, imeri uandantskuani nónema jiókorhesïndi.

³³ K'óru enga nema jiókorhejka, ísï jámani chuperasïndi uandantani eska Diósï no chkuándirasïnga;

³⁴ jimbokachka ima enga Diósï axaka, Diósïri uandakuechani jimbo uandaxesïnga, jimboka Diósï imeri Espirituni kánhachani íntspesïnga.

³⁵ Diósï Táte, Uájpani xénhchasïndi, ka iámendu ambe jimbo juramukua íntskusti.

³⁶ Ne enga Uájpani mintsikajka, méntku isï anapu tsípekua jatsistia, ka ima enga Uájpani no uéjka mintsikani, imeni jásï tsípekua no intsïnhaati, ka Diósï ikimestia.”