San Juan 21 - Diósïri Karakata P´urheepecha Jimbo

Jesusi iúmu tsimani jurhengorherichani xarhakuantaasti

¹ Tátsekua enga na ísï ambe úkorhepkia, Jesusi ménderu jurhengorherichani xarhakuaspti Tiberiasï anapu k'éri japundarhu uanamukuni. Arisï úkorhespti:

² Simoni Pédru ka Tomasi ima engaksï kuáti arhimpka, ka Nataneli enga Kana Galilea anapuepka ka Sebedeo uájpecha ka máteruksï tsimani jurhengorherichaksï márku jarhaspti.

³ Simoni Pédru arhiaspti: –Nipa ji kurucha p'itamani. Imaksï arhispti: –Juchajtuni niuaka t'u jinguni. Nirasptiksï ka icharhuta k'érirhu máksï jataspti, ka imani chúrekuaksï nóma kurucha úspti p'ímani.

⁴ Enga na erandepkia, Jesusi uanamukuni jarhaspti; ka jurhengorherichaksï no jánhaskaspti eska Jesusispka.

⁵ Jesusi arhiaspti: –Tumbicha, ¿Kámaxakijtsï kurucha? Imaksï arhispti: –Nómbe.

⁶ Jesusi arhiaspti: –Cheremakua jimini icharhuteri t'irerkandani k'uanima je, jimini jatamesti. Kuanimasptiksï ka nóterksï jámberi úsïremptia antsimantani xáni uanekua kurucha jatarhuni.

⁷ Ima jurhengorheri enga Jesusi xáni xénhchempka Pédruni arhispti: –¡Achesti! Pédru Jukantapaspti xukuparhakua, jimboka patsikjasï jámaxapka, ka k'éri japundarhu k'uanimespti.

⁸ Máteruechaksï icharhutani jatapunguaspti cheremakuani kurucha jinguni antsimaparini, jimbokaksï no iauani inchametini jámaxapka, ma ambokuta ísïjkuksï inchametini jámaxapti.

⁹ Uémentatinksï, kurhikakata ma exespti enga kurucha jatajpetini jápka ka kurhinda.

¹⁰ Jesusi arhiaspti: –Jua je máru indeni kuruchechani engajtsï p'itamaka.

¹¹ Simoni Pédru icharhutarhu karharaspti ka itsïrhu uanamukuni jamberi cheremakuani antsimaspti enga xáni k'érati kuruchecha jukarhuatini jápka, ka iúmu tsimani ekuatse ka témbeni tanimu kuruchesptiksï. Ka náuejki xáni uánepka, cheremakua no karukurhispti.

¹² Jesusi arhiaspti: –Juia je t'ireni. Nóma jurhengorheri tékaasïrempti kurhamarheni ima néspki, jimbokaksï mítespkia eska Achespka.

¹³ Tátsekua Jesusi andaparhakueraspti, kurhindani p'íkuspti ka imechani íntsaaspti; ka kuruchantu májkueni kámaspti.

¹⁴ Tanindarhuesptia enga Jesusi jurhengorherichani tsíntatini xarhakuantapkia.

Néna enga Jesusi Simoni Pédruni arhipka

¹⁵ Engaksï na k'amarapkia t'ireni, Jesusi Simoni Pédruni arhispti: –Simoni, Juánu Uájpa, ¿T'úrini sánderu xénhchasïnki eskaksï inde máteruecha? Pédru arhispti: –Jo, Acha, míteskari eskakini xénhchasïnga. Jesusi arhispti: –Sánirini eranguchea karichichani.

¹⁶ Ménderu uéntaspti kurhamarheni: –Simoni, Juánu uájpa, ¿T'úrini xénhchasïnki? Pédru arhispti: –Jo, Acha, mítetixakari eskakini xénhchasïnga. Jesusi arhispti: –Sánirini eranguchea karichichani.

¹⁷ Tánimu úni jámani kurhamarhespti: –Simoni, Juánu uájpa, ¿T'úrini xénhchasïnki? Ka jimboka Jesusi tanimu xanhari kurhamarhespkia Pédru, mískorheparini arhispti: –Acha, t'úri iámu mítetixaka; míteskari eskakini xénhchasïnga, Jesusi arhispti: –Sánirini eranguchea karichichani.

¹⁸ Sési jimbokinisï arhini jaka eskari t'u tumbiparini jóangorhekorhentasïrempka, ka nirasïrempkari nani engari t'u uékempka nirani; k'óru engari na t'arhepeakia, iójkurhantaakari ka máteru nemakini jóangorhetantantaati ka nani engari no ninhejchani jauaka jiniksïni páati.

¹⁹ Enga ísï arhini jápka, Jesusi jánhastpexapti néna enga Pédru uarhipiringa ka eska Diósïni imeri uarhikua jimbo k'érikuarhu pérapiringa. Ka arhisptiteru: –¡Chúxapurini!

Jurhengorheri enga Jesusi xáni xénhchempka

²⁰ Enga eraparhapka, Pédru exespti eska tátsepuxapka ima jurhengorheri enga Jesusi xáni xénhchempka, ima enga chúrekua t'irekuarhu ma akandani jakupka ka sánderu kánekua andanharhikuerapka ka enga kurhamarhepka: “Acha, ¿Nékinisï intsïnharhitpea?”

²¹ Enga Pédru exepka, Jesusini kurhamarhespti: –Acha, ka inde ¿Ambe úkorhenchaia?

²² Jesusi arhispti. –Ekani ji uékaska eska inde jauaka engani jamberi k'uanhatseska, ¿T'u ambeia? T'úrini chúxapa ka xántku.

²³ Jimbosï jakajkuticha jinguni ísï mítekorheni jápti eska ima jurhengorheri no uarhipiringa. Enga úpka Jesusi no arhispti Pédruni eska no uarhipiringa. Sánderu sáni arhispti: “Ekani ji uékaska eska inde jauaka engani jamberini k'uanhatseska, ¿T'u ambeia?”

²⁴ Indesï jurhengorheri indeni ambe uandantani jati ka enga karantaka, ka jucha míteska eska ísïska.

²⁵ Jesusi uánekua ambeteru úspti. Enga iámendu ambe karanhantapiringa, eranhaskasïnga eska iámu parhakpeni no jatanhepiringa xáni uáni karakatecha.